Women’s Day Special: आंतरराष्ट्रीय महिला दिनाचे औचित्य साधून ८ मार्च रोजी पुणे महानगर परिवहन महामंडळ मर्यादित (पीएमपीएमएल) तर्फे महिलांसाठी खास पर्यटन बस सेवा जाहीर करण्यात आली आहे. महिलांना घराबाहेर पडून आपल्या मित्र-मैत्रिणी आणि कुटुंबासोबत आनंद साजरा करता यावा, हा या उपक्रमामागील मुख्य उद्देश आहे.
पर्यटन बस सेवेची वैशिष्ट्ये:
- कमी शुल्क: प्रति व्यक्ती केवळ ५०० रुपयांचे नाममात्र शुल्क आकारले जाणार आहे.
- वेळ: सर्व बसेस सकाळी ८:३० ते ९:०० या वेळेत सुटतील आणि त्याच दिवशी सायंकाळी परत शहरात पोहोचतील.
- प्रमुख बोर्डिंग पॉईंट्स: पुणे स्टेशन, स्वारगेट आणि हडपसर गाडीतळ येथून बसेस उपलब्ध असतील.
- पर्यटन स्थळे: मोरुगाव, जेजुरी, सासवड, नारायणपूर, थेऊर, रामदरा, सिंहगड पायथा, खडकवासला आणि पानशेत धरण, तुळापूर, रांजणगाव, लोणावळा, भुलेश्वर आणि बनेश्वर अशा धार्मिक, ऐतिहासिक आणि निसर्गरम्य ठिकाणांचा यात समावेश आहे.
महिला प्रवाशांचा सकारात्मक प्रतिसाद
पीएमपीएमएलच्या या निर्णयाचे महिला प्रवाशांनी स्वागत केले आहे. पीएमपीएमएल प्रशासनाच्या मते, या बस फेऱ्यांचे नियोजन महिला प्रवाशांच्या सोयीचा विचार करून करण्यात आले आहे. या सेवेला महिलांकडून चांगला प्रतिसाद मिळेल अशी अपेक्षा असून, इच्छुकांना लवकरात लवकर जागा आरक्षित करण्याचा सल्ला देण्यात आला आहे.
