LPG Price Hike: सर्वसामान्यांच्या खिशाला आज महागाईचा मोठा फटका बसला आहे. ७ मार्च २०२६ पासून घरगुती स्वयंपाकाच्या गॅस सिलिंडरच्या किमतीत प्रति सिलिंडर ६० रुपयांची वाढ करण्यात आली आहे. त्याचबरोबर, हॉटेल आणि रेस्टॉरंट व्यवसायात वापरल्या जाणाऱ्या १९ किलोच्या व्यावसायिक गॅस सिलिंडरच्या दरातही ११५ रुपयांनी वाढ झाली आहे.
विविध शहरांतील नवीन दर (१४.२ किलो घरगुती सिलिंडर):
- दिल्ली: ९१३ रुपये.
- मुंबई: ९१२.५० रुपये.
- कोलकाता: ९३९ रुपये.
- चेन्नई: ९२८.५० रुपये.
व्यावसायिक सिलिंडरचे वाढलेले दर (१९ किलो):
व्यावसायिक वापराच्या सिलिंडरसाठी आता ग्राहकांना अधिक मोजावे लागणार आहेत. दिल्लीत हा दर १,८८३ रुपये, मुंबईत १,८३५ रुपये, कोलकात्यात १,९९० रुपये, तर चेन्नईमध्ये २,०४३.५० रुपये झाला आहे. गेल्या एप्रिल २०२५ पासून घरगुती गॅसचे दर स्थिर होते, मात्र आता झालेल्या या मोठ्या वाढीमुळे सर्वसामान्यांचे बजेट कोलमडणार आहे.
ऊर्जा तुटवड्याची भीती नाही: सरकार
गॅसच्या किमती वाढल्या असल्या तरी, देशात इंधन किंवा उर्जेचा कोणताही तुटवडा नसल्याचे पेट्रोलियम आणि नैसर्गिक वायू मंत्री हरदीप सिंग पुरी यांनी स्पष्ट केले आहे. “नागरिकांना स्वस्त आणि शाश्वत इंधन पुरवणे ही आमची प्राथमिकता आहे. देशात इंधनाचा पुरेसा साठा उपलब्ध आहे, त्यामुळे नागरिकांनी घाबरून जाऊ नये,” असे आवाहन त्यांनी केले आहे.
इंधन साठा आणि उपाययोजना:
इंडियन ऑइल कॉर्पोरेशनने स्पष्ट केले आहे की, सोशल मीडियावर इंधन तुटवड्याबाबत पसरवल्या जाणाऱ्या बातम्या पूर्णपणे निराधार आहेत. भारत सध्या कच्च्या तेलाच्या आणि एलपीजीच्या बाबतीत अतिशय सुरक्षित स्थितीत आहे.
- विविध स्त्रोतांकडून आयात: भारत आता रशियासह इतर देशांकडूनही कच्च्या तेलाची आयात करत आहे, ज्यामुळे होर्मुझ सामुद्रधुनीतील कोणत्याही संभाव्य अडथळ्याचा मोठा परिणाम होणार नाही.
- एलपीजी उत्पादन वाढ: सरकारने सर्व रिफायनरींना एलपीजी उत्पादन वाढवण्याचे निर्देश दिले आहेत. याशिवाय, जानेवारी महिन्यापासून अमेरिकेतूनही एलपीजीची आयात सुरू झाली असून, नोव्हेंबर २०२५ मध्ये केलेल्या करारानुसार भारताला अमेरिकेकडून मोठा पुरवठा मिळणार आहे.
सरकार सध्या परिस्थितीवर बारकाईने लक्ष ठेवून असून, देशांतर्गत मागणी पूर्ण करण्यासाठी सर्व पर्यायी मार्ग खुले ठेवले आहेत.
