Ambadas Danve : जिल्हा परिषद आणि पंचायत समितीच्या निवडणुकांनंतर छत्रपती संभाजीनगर जिल्ह्यात राजकीय वातावरण कमालीचे तापले आहे. या निवडणुकीत भारतीय जनता पक्षाने २३ जागांवर विजय मिळवून सर्वात मोठा पक्ष होण्याचा मान मिळवला. विजयाचा हाच सिलसिला कायम राखण्यासाठी भाजपने आज झालेल्या पंचायत समिती सभापती आणि उपसभापती निवडीमध्ये आपली संपूर्ण ताकद पणाला लावली होती. सत्तास्थापनेसाठी आवश्यक असलेले संख्याबळ जुळवण्यासाठी भाजपने व्यूहरचना आखली होती. मात्र, याच प्रक्रियेदरम्यान शिवसेना (उद्धव बाळासाहेब ठाकरे) पक्षाचे तीन सदस्य भाजपच्या गोटात सामील झाल्याने जिल्ह्यात खळबळ उडाली आणि एका मोठ्या संघर्षाला तोंड फुटले.
आपल्या पक्षाचे तीन सदस्य फोडून भाजपने सत्तेचे गणित जुळवल्याची माहिती मिळताच शिवसेना (उद्धव बाळासाहेब ठाकरे) पक्षाचे नेते आणि विधान परिषदेचे विरोधी पक्षनेते अंबादास दानवे आक्रमक झाले. आपल्या पक्षाचे सदस्य भाजपच्या संपर्कात असल्याचे आणि त्यांना अज्ञातस्थळी नेण्यात आल्याचे समजताच दानवे यांचा संयम सुटला. पंचायत समितीच्या आवारातच त्यांनी भाजपचे सभापती पदाचे उमेदवार कल्याण गायकवाड यांची गचांडी धरली आणि त्यांना जाहीरपणे कानफटावले. एका वरिष्ठ लोकप्रतिनिधीने अशा प्रकारे थेट शारीरिक संघर्षाची भूमिका घेतल्याने उपस्थित सर्वच जण अवाक झाले.
या घटनेचे पडसाद उमटायला वेळ लागला नाही. आपल्या उमेदवाराला मारहाण झाल्याचे पाहताच भाजपचे कार्यकर्ते संतप्त झाले, तर दुसरीकडे शिवसेनेचे कार्यकर्तेही आक्रमक झाले. दोन्ही बाजूंचे कार्यकर्ते एकमेकांसमोर उभे ठाकल्याने पंचायत समिती परिसरात तणावाचे वातावरण निर्माण झाले होते. दोन्ही गटांकडून जोरदार घोषणाबाजी करण्यात आली, ज्यामुळे काही काळ तिथे गोंधळाची स्थिती निर्माण झाली.
छत्रपती संभाजीनगरमध्ये राजकीय संघर्ष शिगेला; पंचायत समिती सदस्य ‘बेपत्ता’ झाल्याने अंबादास दानवे यांचा रुद्रावतार
छत्रपती संभाजीनगर पंचायत समितीच्या सभापती आणि उपसभापती निवडीच्या निमित्ताने जिल्ह्यात राजकीय नाट्याचा अंक पाहायला मिळाला. या पंचायत समितीमध्ये भारतीय जनता पक्षाचे सात सदस्य निवडून आले असून, सत्तेचे समीकरण स्वतःच्या बाजूने वळवण्यासाठी भाजपने कंबर कसली होती. बहुमताचा आकडा गाठण्यासाठी आणि प्रतिष्ठेची पदे पदरात पाडून घेण्यासाठी भाजपच्या उमेदवाराने शिवसेना (उद्धव बाळासाहेब ठाकरे) पक्षाच्या तीन सदस्यांना आपल्या गोटात सामील करून घेतल्याची जोरदार चर्चा सुरू झाली. ही ‘कुणकुण’ लागताच जिल्ह्याचे राजकीय वातावरण कमालीचे तापले.
मिळालेल्या माहितीनुसार, शिवसेना (ठाकरे गट) पक्षाचे हे तीन सदस्य कालपर्यंत पक्षाचे तालुकाप्रमुख आणि उपजिल्हाप्रमुखांच्या नियमित संपर्कात होते. मात्र, आज निवडीचा दिवस उजाडताच हे तिन्ही सदस्य अचानक बेपत्ता झाल्याचे लक्षात आले. आपल्या पक्षाचे सदस्य अशा प्रकारे ‘गायब’ झाल्याची माहिती मिळताच विधान परिषदेचे विरोधी पक्षनेते अंबादास दानवे यांचा संताप अनावर झाला. भाजपच्या सभापती पदाच्या उमेदवाराने या सदस्यांना पैशांचे प्रचंड आमिष दाखवून आणि पोलीस बळाचा गैरवापर करून पळवून नेल्याचा गंभीर आरोप दानवे यांनी केला.
हा तणाव वाढलेला असतानाच, पंचायत समितीच्या आवारात भाजपचे सभापती पदाचे उमेदवार कल्याण गायकवाड दाखल झाले. त्यांना पाहताच अंबादास दानवे यांनी संतप्त होऊन त्यांच्या दिशेने धाव घेतली. यावेळी त्यांनी गायकवाड यांची कॉलर पकडून त्यांना जाब विचारला आणि याच झटापटीत त्यांच्या कानशिलात लगावल्याचा आरोप केला जात आहे.
छत्रपती संभाजीनगर पंचायत समितीच्या सभापती निवडणुकीदरम्यान झालेला राडा आता अधिकच चिघळला असून, शिवसेना (उद्धव बाळासाहेब ठाकरे) पक्षाचे नेते अंबादास दानवे यांनी आपल्या आक्रमक कृतीचे उघडपणे समर्थन केले आहे. भाजप उमेदवाराशी झालेल्या झटापटीनंतर प्रसारमाध्यमांशी संवाद साधताना दानवे यांनी अत्यंत संतप्त प्रतिक्रिया दिली. “जर मध्येच कोणाची मध्यस्थी आली नसती, तर पुढे काय झाले असते हे मी आता सांगू शकणार नाही,” असे म्हणत त्यांनी आपल्या रुद्रावताराची कबुलीच दिली. भाजपच्या ‘फोडाफोडी’च्या राजकारणामुळे संयम सुटल्याचे सांगत त्यांनी या संपूर्ण प्रकाराला भाजपच्या कार्यपद्धतीला जबाबदार धरले आहे.
अंबादास दानवे यांनी भारतीय जनता पक्षावर लोकशाहीचा गळा आवळल्याचा गंभीर आरोप केला. ते म्हणाले की, “भाजप आता लोकशाही मार्गाने निवडणुका लढवणे विसरली आहे. केवळ पैसा आणि सत्तेच्या जोरावर इतर पक्षांचे लोक फोडणे, हेच त्यांचे राजकारण झाले आहे. जर त्यांना सत्तेसाठी खरोखरच मदतीची आवश्यकता होती, तर त्यांनी आमच्याशी रीतसर चर्चा करायला हवी होती. आम्ही आमच्या पक्षश्रेष्ठींची परवानगी घेऊन योग्य तो निर्णय घेतला असता. परंतु, परस्पर आमच्या सदस्यांना पैशांचे आमिष दाखवून आणि पोलीस यंत्रणेचा धाक दाखवून त्यांना अज्ञातस्थळी गायब करणे, हा कोणता प्रकार आहे?” असा संतप्त सवाल त्यांनी यावेळी उपस्थित केला.
या प्रकरणाचा निषेध म्हणून अंबादास दानवे यांनी आपल्या समर्थकांसह पंचायत समिती कार्यालयाच्या मुख्य प्रवेशद्वाराबाहेरच ठिय्या आंदोलन सुरू केले. त्यांच्या या आंदोलनामुळे परिसरातील राजकीय वातावरण प्रचंड तापले होते. दानवे यांच्या आक्रमक पवित्रा पाहून भाजपचे कार्यकर्तेही मोठ्या संख्येने गोळा झाले आणि त्यांनीही प्रतिघोषणाबाजी सुरू केली. दोन्ही बाजूंचे कार्यकर्ते एकमेकांशी भिडण्याच्या तयारीत असल्याने परिस्थिती हाताबाहेर जाण्याची भीती निर्माण झाली होती.
छत्रपती संभाजीनगर पंचायत समिती निवडणुकीत ‘शिवसेना’ ठरली मोठा भाऊ; नऊ तालुक्यांत महायुतीचे वर्चस्व-
छत्रपती संभाजीनगर जिल्ह्यातील नऊ पंचायत समित्यांच्या एकूण १२६ जागांसाठी झालेल्या निवडणुकीचा निकाल जाहीर झाला असून, यात मुख्यमंत्री एकनाथ शिंदे यांच्या नेतृत्वाखालील ‘शिवसेना’ पक्षाने निर्विवाद यश संपादन केले आहे. एकूण ५३५ उमेदवारांच्या राजकीय भवितव्याचा फैसला या निवडणुकीत झाला. जिल्हाभरातील राजकीय बलाबल पाहता, ५५ जागांवर विजय मिळवत शिवसेनेने सर्वाधिक संख्याबळासह ‘मोठ्या भावा’ची भूमिका बजावली आहे. या पाठोपाठ भारतीय जनता पक्षाने ३८ जागा जिंकून जिल्ह्यात आपले स्थान बळकट केले आहे.
इतर पक्षांच्या कामगिरीवर नजर टाकल्यास, राष्ट्रवादी काँग्रेसला १२ जागांवर यश मिळाले आहे, तर शिवसेना (उद्धव बाळासाहेब ठाकरे) पक्षाने ११ जागा जिंकल्या आहेत. काँग्रेस पक्षाला केवळ तीन जागांवर समाधान मानावे लागले असून, राष्ट्रवादी काँग्रेस (शरदचंद्र पवार) पक्षाला दोन जागा प्राप्त झाल्या आहेत. या निकालांनी जिल्ह्याच्या ग्रामीण राजकारणातील सत्तेचे नवे समीकरण स्पष्ट केले आहे.
तालुकानिहाय निकालांचे सविस्तर माहिती-
शिवसेनेने आपल्या ५५ जागांच्या विजयात पैठण तालुक्यातून १७, सिल्लोड व कन्नडमधून प्रत्येकी ८, वैजापूरमधून ७, छत्रपती संभाजीनगरमधून ६, गंगापूरमधून ५, तर सोयगाव आणि फुलंब्रीतून प्रत्येकी २ सदस्य निवडून आणले आहेत. विशेष म्हणजे, पैठण तालुक्यात १८ पैकी १७ जागा जिंकून शिवसेनेने तिथे एकतर्फी बहुमत प्रस्थापित केले आहे.
भारतीय जनता पक्षाने ३८ जागांच्या बळावर जिल्ह्यात दुसरे स्थान मिळवले आहे. यात सिल्लोडमध्ये १०, छत्रपती संभाजीनगरमध्ये ७, गंगापूरमध्ये ६, कन्नडमध्ये ४, सोयगाव, फुलंब्री व खुलताबादमध्ये प्रत्येकी ३, तर वैजापूरमध्ये २ जागांवर भाजपचे उमेदवार विजयी झाले आहेत.
सत्तेची गणिते आणि युतीचे समीकरण-
पैठण तालुका वगळता इतर सर्व पंचायत समित्यांमध्ये कोणत्याही एका पक्षाला स्पष्ट बहुमत मिळालेले नाही. त्यामुळे सभापती आणि उपसभापती निवडीमध्ये महायुती किंवा अन्य राजकीय आघाड्या अपरिहार्य ठरणार आहेत.
