IIT Bombay mess menu LPG shortage : पश्चिम आशियातील युद्धामुळे निर्माण झालेल्या जागतिक एलपीजी टंचाईची झळ आता देशातील नामांकित शिक्षण संस्थांपर्यंत पोहोचली आहे. मुंबईतील आयआयटी पवईमधील मेस मेनूमध्ये १४ मार्चपासून मोठे बदल लागू करण्यात आले आहेत. देशातील गॅस साठ्यावर असलेला ताण कमी करण्यासाठी आणि उपलब्ध साठा जपून वापरण्यासाठी हा निर्णय घेण्यात आला असल्याचे मेस कौन्सिलने स्पष्ट केले आहे.
मेसच्या मेनूमध्ये नेमके काय बदलले?
विद्यार्थ्यांना पाठवण्यात आलेल्या अधिकृत माहितीनुसार, गॅसची जास्त बचत करण्यासाठी जेवणाच्या पद्धतीत काही तात्पुरते बदल करण्यात आले आहेत:
- मर्यादित पदार्थ: जेवणात आता केवळ एकच शाकाहारी भाजी दिली जाईल आणि जास्तीचा मांसाहारी पदार्थ मिळणार नाही.
- तळलेले पदार्थ बंद: ज्या पदार्थांना शिजवण्यासाठी जास्त वेळ किंवा गॅस लागतो (तळलेले आणि उकडलेले पदार्थ), ते मेनूमधून पूर्णपणे काढून टाकण्यात आले आहेत.
- मिठाईऐवजी पर्यायी व्यवस्था: रात्रीच्या जेवणातील गोड पदार्थांऐवजी आता मिल्कशेक किंवा आईस्क्रीम दिले जाईल.
- फळे आणि दूध: दुपारच्या आणि रात्रीच्या जेवणात फळांचा समावेश करण्यात आला आहे, तर दूध आता गरम करण्याऐवजी साध्या किंवा थंड स्वरूपात दिले जाईल.
प्रतिबंधात्मक उपाय म्हणून पाऊल
आयआयटी मुंबईच्या प्रवक्त्यांनी सांगितले की, ही केवळ एक खबरदारीची उपाययोजना आहे. संस्थेमध्ये बायोगॅस आणि इलेक्ट्रिक पर्यायांचा वापर आधीच सुरू आहे, तरीही एलपीजीचा साठा संपू नये म्हणून हे पाऊल उचलले आहे. चहा पार्टी, विशेष दुपारचे जेवण किंवा गाला डिनर यांसारखे कार्यक्रम गॅस पुरवठा सुरळीत होईपर्यंत अनिश्चित काळासाठी पुढे ढकलण्यात आले आहेत.
स्थिती सुधारल्यावर नियमित मेनू
येणाऱ्या मेस कमिटीच्या बैठकीत या बदलांमुळे झालेल्या कपातीवर आणि भरपाईवर चर्चा केली जाईल. परिस्थिती सुधारताच जुना मेनू पुन्हा लागू केला जाईल, असे आश्वासन प्रशासनाने दिले आहे. तसेच, विद्यार्थ्यांनी कोणत्याही अफवांवर विश्वास ठेवून घाबरून जाऊ नये, असे आवाहनही करण्यात आले आहे. युद्धाच्या या काळात संसाधनांचा योग्य वापर करणे ही काळाची गरज असल्याचे मेस कौन्सिलने म्हटले आहे.
