Paneer for Weight Loss: अनेकांना असं वाटतं की पनीरमध्ये फॅट्स जास्त असतात, त्यामुळे वजन वाढू शकतं. पण सत्य याच्या उलट आहे. जर पनीर योग्य पद्धतीने आणि प्रमाणात खाल्लं, तर ते वजन कमी करण्यासाठी अत्यंत गुणकारी ठरतं.
पनीरमध्ये असलेल्या उच्च दर्जाच्या प्रोटीन्समुळे (प्रति सर्व्हिंग सुमारे २८ ग्रॅम) शरीरातील चयापचय क्रिया वेगवान होते आणि स्नायू मजबूत होतात. विशेष म्हणजे, पनीर खाल्ल्यावर पोट बराच वेळ भरलेलं राहतं, ज्यामुळे अवेळी खाण्याची सवय सुटते.
तुम्हीही वजन कमी करण्याच्या प्रयत्नात असाल, तर खालील ५ पौष्टिक आणि चविष्ट पनीर रेसिपीज नक्की ट्राय करा:
१. पनीर ओट्स चिल्ला (२२०-२४० कॅलरी)
सकाळच्या नाश्त्यासाठी हा एक परिपूर्ण पर्याय आहे, जो तुम्हाला दिवसभर ऊर्जा देईल.
- कसे बनवाल: अर्धा कप ओट्स मिक्सरमधून बारीक करून त्याचे पीठ करा. त्यात किसलेलं १०० ग्रॅम लो-फॅट पनीर, बारीक चिरलेला कांदा, हिरवी मिरची, कोथिंबीर, हळद आणि जिरे पूड मिक्स करा. थोडं पाणी घालून मध्यम जाड पीठ तयार करा आणि नॉन-स्टिक तव्यावर दोन्ही बाजूंनी भाजून घ्या.
२. क्रीमी पेस्टो पनीर (२२०-२४० कॅलरी)
ज्यांना काहीतरी वेगळं आणि पाश्चिमात्य चवीचं खायचं आहे त्यांच्यासाठी ही डिश उत्तम आहे.
- कसे बनवाल: तुळशीची पानं (बॅसिल), भिजवलेले बदाम किंवा काजू, लसूण, लिंबाचा रस आणि मीठ एकत्र वाटून ‘पेस्टो’ चटणी तयार करा. पॅनमध्ये अगदी थोडं ऑलिव्ह ऑइल घेऊन पनीरचे तुकडे गरम करा. त्यात तयार केलेली पेस्टो चटणी घालून मंद आचेवर १-२ मिनिटे परता.
३. तंदूरी पनीर टाकोज (२२०-२५० कॅलरी)
या रेसिपीमध्ये पिठाऐवजी कोबीच्या पानांचा वापर केल्यामुळे ‘कार्बोहायड्रेट्स’ कमी होतात.
- कसे बनवाल: पनीरच्या लांब पट्ट्या दही आणि मसाल्यांमध्ये (तिखट, हळद, आले-लसूण पेस्ट) १५ मिनिटे मॅरिनेट करा. तव्यावर कमी तेलात हे पनीर भाजून घ्या. आता कोबीच्या वाफवलेल्या पानामध्ये हे पनीर, कांदा, टोमॅटो आणि हिरवी चटणी घालून टाकोजप्रमाणे सर्व्ह करा.
४. पनीर चिली ब्रुशेटा (२००-२२० कॅलरी)
संध्याकाळच्या छोट्या भुकेसाठी हा एक चटपटीत आणि हेल्दी स्नॅक्स आहे.
- कसे बनवाल: मल्टीग्रेन किंवा बाजरीच्या ब्रेडचा तुकडा बेस म्हणून वापरा. पॅनमध्ये थोड्या तेलात आले-लसूण, कांदा आणि टोमॅटो मऊ होईपर्यंत शिजवा. त्यात मॅश केलेलं पनीर, सोया सॉस, चिली सॉस आणि मीठ घालून मिश्रण तयार करा. हे मिश्रण ब्रेडवर पसरवून कोथिंबीर आणि लिंबाचा रस टाकून खा.
५. पनीर पेपर फ्राय (२१०-२३० कॅलरी)
मसालेदार पण आरोग्याला पोषक अशी ही डिश झटपट तयार होते.
कसे बनवाल: एका पॅनमध्ये थोडं तेल गरम करून कढीपत्ता आणि आल्याची पेस्ट परता. त्यात कांद्याचे काप आणि पनीरचे तुकडे घाला. वरून भरपूर काळी मिरी पूड, हळद आणि मीठ घालून २-३ मिनिटे परता. सॅलड किंवा बाजरीच्या भाकरीसोबत हे पनीर चविष्ट लागते.
हे देखील वाचा –Best SUVs For Long Drive : लांबच्या ट्रिपसाठी ‘या’ आहेत देशातील सर्वोत्तम 5 SUV, फीचर्स खूपच जबरदस्त; पाहा किंमत
