Bigg Boss Marathi 6 : कलर्स मराठीवरील अत्यंत लोकप्रिय आणि वादग्रस्त रिअॅलिटी शो ‘बिग बॉस मराठी’चे सहावे पर्व सध्या यशाच्या शिखरावर आहे. शंभर दिवसांच्या या आव्हानात्मक प्रवासातील ७० दिवस पूर्ण झाले असून, आता हा खेळ अंतिम टप्प्यात म्हणजेच शेवटच्या ३० दिवसांच्या निर्णायक वळणावर येऊन ठेपला आहे. जसजसा ग्रँड फिनाले जवळ येत आहे, तसतशी घरातील स्पर्धा अधिक तीव्र आणि क्लिष्ट होताना दिसत आहे. प्रत्येक स्पर्धक स्वतःला सिद्ध करण्यासाठी आणि प्रेक्षकांची मने जिंकण्यासाठी सर्वस्व पणाला लावत आहे.
नुकताच पार पडलेला ‘फॅमिली वीक’ प्रेक्षकांसाठी अत्यंत भावूक ठरला. या सप्ताहात स्पर्धकांच्या कुटुंबीयांनी घरात हजेरी लावली होती. यामध्ये प्रभू शेळके आणि त्याच्या कुटुंबीयांची झालेली भेट पाहून प्रेक्षकांचे डोळेही पाणावले होते. प्रभूचा आतापर्यंतचा संयमी आणि प्रामाणिक खेळ पाहता, तो किमान पुढील एक-दोन आठवडे तरी घरात टिकून राहील, अशी त्याच्या चाहत्यांना खात्री होती. मात्र, नुकत्याच समोर आलेल्या काही अनपेक्षित माहितीमुळे चाहत्यांना मोठा धक्का बसला आहे.
सोशल मीडियावर रंगलेल्या चर्चांनुसार, प्रभू शेळके या आठवड्यात घराबाहेर पडणार (Evicted) असल्याचे संकेत मिळत आहेत. जरी या वृत्ताला अद्याप अधिकृत दुजोरा मिळालेला नसला, तरी विविध चाहत्यांच्या पेजेसवर आणि सोशल मीडिया प्लॅटफॉर्मवर प्रभूच्या एक्झिटची जोरदार चर्चा सुरू आहे.
खेळातील सातत्य आणि वैयक्तिक अस्तित्वाचा प्रश्न-
प्रभू शेळकेच्या खेळाचे विश्लेषण केल्यास असे दिसून येते की, सुरुवातीच्या काळात प्रेक्षकांच्या पसंतीस पडलेला हा खेळाडू हळूहळू आपला प्रभाव गमावत गेला. अनेक चाहत्यांच्या मते, प्रभूचा स्वतःचा असा स्वतंत्र खेळ गेल्या काही दिवसांपासून पूर्णपणे हरवला होता. तो बहुतांश वेळ घरातील अन्य स्पर्धक तन्वीच्या प्रभावाखाली किंवा तिच्या मागे-पुढे करतानाच दिसून आला. एखाद्या प्रबळ स्पर्धकाकडे असणारी निर्णयक्षमता आणि स्वतंत्र रणनीती प्रभूच्या बाबतीत कमी पडल्याचे चित्र निर्माण झाले.
विवादास्पद घटना आणि कामगिरी-
प्रभूच्या प्रवासातील काही महत्त्वाच्या घटनांनी प्रेक्षकांचे लक्ष वेधले होते, मात्र त्या नकारात्मक ठरल्या. त्याने प्राजक्ता शुक्रेची ‘पॉवर की’ चोरून मिळवलेली कॅप्टनसीची उमेदवारी असो किंवा घरातील क्षुल्लक कारणांवरून, विशेषतः ‘अंड्यांच्या’ वाटपावरून केलेले वाद असो; या गोष्टींमुळे त्याची प्रतिमा मलीन झाली.
प्रेक्षकांचा कौल आणि सोशल मीडियावरील कल
सोशल मीडियावर सागर कारंडे आणि प्रभू शेळके या दोघांनाही घराबाहेर काढण्याची मागणी सातत्याने होत होती. प्रभूचा खालावलेला खेळ आणि घराप्रती असलेल्या योगदानाचा अभाव यामुळे प्रेक्षकांनी अखेर त्याला घरचा रस्ता दाखवल्याची दाट शक्यता वर्तवली जात आहे.
