Fridge Safety : १. भिंतीपासून सुरक्षित अंतर राखा (वेंटिलेशनचे महत्त्व)
अनेकदा जागेची बचत करण्यासाठी आपण फ्रिज अगदी भिंतीला चिकटवून ठेवतो. इलेक्ट्रॉनिक्स तज्ज्ञ रोहित प्रजापती यांच्या मते, ही एक अत्यंत गंभीर चूक आहे. फ्रिजच्या मागील बाजूस असलेल्या कॉम्प्रेसरमधून उष्णता बाहेर पडत असते. जर भिंत आणि फ्रिजमध्ये किमान ५ ते ६ इंचांचे अंतर नसेल, तर हवा खेळती राहत नाही. परिणामी, कॉम्प्रेसर अतिउष्ण (Overheat) होऊन जळण्याची किंवा शॉर्ट सर्किट होण्याची दाट शक्यता असते. त्यामुळे फ्रिजभोवती पुरेशी मोकळी जागा ठेवणे अनिवार्य आहे.
२. व्होल्टेजमधील चढ-उतार आणि स्टेबलायझरचा वापर
उन्हाळ्यात विजेची मागणी वाढल्याने अनेकदा व्होल्टेज कमी-जास्त होण्याची समस्या उद्भवते. अचानक उच्च दाबाचा (High Voltage) विद्युत पुरवठा झाल्यास फ्रिजचा कॉम्प्रेसर निकामी होऊ शकतो किंवा भीषण अपघात घडू शकतो. अशा वेळी ‘व्होल्टेज स्टेबलायझर’चा वापर करणे अत्यंत सुरक्षित ठरते. तसेच, फ्रिज अतिशय अरुंद जागेत ठेवू नका, जिथे उष्णता साचून राहते.
३. दीर्घकाळानंतर फ्रिज सुरू करताना घ्यायची काळजी
काही घरांमध्ये फ्रिजचा वापर केवळ उन्हाळ्यातच केला जातो. अशा वेळी वर्षभर बंद असलेला फ्रिज पुन्हा सुरू करण्यापूर्वी वायरची नीट तपासणी करा. उंदरांनी वायर कुरतडली आहे का, कुठे कट पडला आहे का किंवा प्लग जळलेला दिसतोय का, हे बारकाईने तपासा. जर स्विचमधून ठिणग्या (Sparks) उडत असतील किंवा स्पर्श केल्यावर करंट लागत असेल, तर तज्ज्ञ इलेक्ट्रिशियनकडून त्याची दुरुस्ती करून घेतल्याशिवाय फ्रिज सुरू करू नका.
४. ऋतूनुसार तापमानाचे समायोजन (Temperature Setting)
प्रत्येक ऋतूत फ्रिजचे तापमान एकाच पातळीवर ठेवणे चुकीचे आहे. उन्हाळ्यात अन्न टिकवण्यासाठी कुलिंग थोडे वाढवणे गरजेचे असते, मात्र ते अतिशय कमी (Low Temperature) ठेवल्यास कॉम्प्रेसरवर अतिरिक्त ताण पडतो. विशेषतः जुन्या फ्रिजच्या बाबतीत अशा दबावामुळे कॉम्प्रेसरचा स्फोट होण्याचा धोका संभवतो. त्यामुळे हवामानानुसार मध्यम तापमान राखणे हिताचे आहे.
५. सूर्यप्रकाश आणि नियमित सर्व्हिसिंग
फ्रिज अशा ठिकाणी ठेवा जिथे सूर्याचा थेट प्रकाश पडणार नाही. बाहेरील उष्णतेमुळे फ्रिजचे तापमान वाढते आणि ते कमी करण्यासाठी कॉम्प्रेसरला दुप्पट काम करावे लागते, ज्यामुळे विजेचे बिलही वाढते आणि उपकरणाचे आयुष्यही कमी होते. जर फ्रिजमध्ये गरजेपेक्षा जास्त बर्फ साचत असेल किंवा कॉम्प्रेसरमधून विचित्र आवाज येत असेल, तर समजून जा की त्याला सर्व्हिसिंगची गरज आहे. तज्ज्ञांच्या मते, कार्यक्षमता टिकवण्यासाठी वर्षातून किमान दोन वेळा नामांकित तंत्रज्ञांकडून फ्रिजची तपासणी करून घेणे आवश्यक आहे.
(टीप : वरील बातमी केवळ माहिती म्हणून वाचकांपर्यंत पोहोचवत आहोत, या माहितीची पुष्टी आम्ही करत नाही..)
