Pune Crime News : गुन्हेगारांवर वचक निर्माण करून सर्वसामान्यांना सुरक्षा प्रदान करण्याची जबाबदारी असलेल्या पोलीस दलातील काही कर्मचाऱ्यांनीच खंडणीखोरीचा मार्ग स्वीकारल्याने पुणे पोलीस दलात मोठी खळबळ उडाली आहे. एका नामांकित शैक्षणिक संस्थेच्या महिला प्राचार्याला ‘पॉक्सो’ कायद्याची भीती दाखवून सात लाख रुपये उकळल्याप्रकरणी एका पोलीस उपनिरीक्षकासह तीन पोलीस कर्मचाऱ्यांवर बंडगार्डन पोलीस ठाण्यात गुन्हा दाखल करण्यात आला आहे. पोलीस आयुक्त अमितेश कुमार यांनी या प्रकरणाची अत्यंत गंभीर दखल घेत भ्रष्ट कर्मचाऱ्यांविरुद्ध कठोर कारवाईचे संकेत दिले आहेत.
भय दाखवून उकळली सात लाखांची खंडणी-
या प्रकरणातील मुख्य संशयित आरोपींमध्ये पोलीस उपनिरीक्षक अजित बडे (सायबर पोलीस स्टेशन), पोलीस कर्मचारी सुदाम तायडे (शिवाजीनगर पोलीस स्टेशन) आणि महिला पोलीस कर्मचारी सोनाली हिंगे यांचा समावेश आहे. विशेष म्हणजे, सोनाली हिंगे ही शिवाजीनगर पोलीस ठाण्यात ‘दामिनी मार्शल’ म्हणून कार्यरत असून सोशल मीडियावर ती ‘रील स्टार’ म्हणून प्रसिद्ध आहे. मिळालेल्या माहितीनुसार, या तिघांनी संगनमत करून संबंधित महिला प्राचार्याला गाठले. त्यांच्यावर बाललैंगिक अत्याचार प्रतिबंधक कायद्यांतर्गत (पॉक्सो) गंभीर गुन्हा दाखल करून त्यांना अटक करण्याची धमकी या पोलिसांनी दिली. कायदेशीर कारवाई आणि अटकेच्या दहशतीखाली असलेल्या प्राचार्यांकडून प्रकरण मिटवण्यासाठी सात लाख रुपयांची मागणी करण्यात आली. बदनामीच्या भीतीने पीडित प्राचार्यांनी ही रक्कम दिली, मात्र नंतर हा सर्व प्रकार फसवणुकीचा असल्याचे लक्षात येताच त्यांनी वरिष्ठांकडे धाव घेतली.
पोलीस आयुक्तांचा दणका आणि तपासाचे आदेश-
पीडित महिलेने पुण्याचे पोलीस आयुक्त अमितेश कुमार यांची भेट घेऊन सर्व आपबिती सांगितली. आयुक्तांनी या प्रकरणाचे गांभीर्य ओळखून तत्काळ प्राथमिक चौकशीचे आदेश दिले. या चौकशीत संबंधित पोलीस कर्मचाऱ्यांचा सहभाग निष्पन्न होताच, आयुक्तांनी त्यांच्यावर गुन्हा दाखल करण्याचे आदेश दिले. वर्दीचा गैरवापर करून सामान्य नागरिकांना लुटणाऱ्या अशा प्रवृत्तींची गय केली जाणार नाही, अशी ठाम भूमिका आयुक्तांनी घेतली आहे. या कारवाईमुळे पोलीस दलातील चुकीची कामे करणाऱ्या कर्मचाऱ्यांचे धाबे दणाणले आहेत.
खाकीवरील विश्वासाला तडा-
रक्षकच जेव्हा भक्षक बनतात, तेव्हा समाजात पोलिसांविषयी अविश्वासाचे वातावरण निर्माण होते. शिवाजीनगर आणि सायबर सारख्या महत्त्वाच्या विभागातील कर्मचाऱ्यांनी अशा प्रकारे गुन्हेगारी कट रचल्याने पोलीस दलाची प्रतिमा मलीन झाली आहे. विशेषतः सोशल मीडियावर सक्रिय असणाऱ्या आणि तरुणांमध्ये ओळख असलेल्या महिला पोलीस कर्मचाऱ्याचा यात सहभाग असल्याने या प्रकरणाची सर्वत्र चर्चा होत आहे.
