Sushma Andhare : मराठी मनोरंजन सृष्टीतील आघाडीची अभिनेत्री, निवेदिका आणि उद्योजिका प्राजक्ता माळी सध्या आपल्या एका राजकीय विधानामुळे चर्चेच्या केंद्रस्थानी आली आहे. नुकत्याच आयोजित करण्यात आलेल्या ‘नारी शक्ती वंदन’ महिला संमेलनात प्राजक्ताने राज्याचे मुख्यमंत्री देवेंद्र फडणवीस यांच्या कार्यशैलीचे जाहीरपणे कौतुक केले. मात्र, या कौतुकसोहळ्यावर शिवसेना (उद्धव बाळासाहेब ठाकरे) पक्षाच्या उपनेत्या सुषमा अंधारे यांनी तीव्र शब्दांत आक्षेप घेत प्राजक्ता माळीला लक्ष्य केले आहे.
काय म्हणाल्या प्राजक्ता माळी?
या कार्यक्रमाला मुख्यमंत्री देवेंद्र फडणवीस आणि बॉलीवूड अभिनेत्री रवीना टंडन यांचीही विशेष उपस्थिती होती. व्यासपीठावरून बोलताना प्राजक्ता माळीने मुख्यमंत्र्यांच्या संयमी व्यक्तिमत्त्वाचे आणि प्रशासकीय कौशल्याचे कौतुक केले. ती म्हणाली, “महाराष्ट्रात सध्या सुरू असलेले भोंदूबाबांचे प्रकरण मुख्यमंत्र्यांनी अत्यंत संवेदनशीलतेने हाताळले आहे. जिथे वडिलांप्रमाणे कठोर होण्याची गरज असते, तिथे ते कठोर होतात आणि जिथे आईचे ममत्व हवे असते, तिथे ते अत्यंत आपुलकीने प्रश्न सोडवतात. महिलांचा सन्मान कसा करावा, हे प्रत्येकाने त्यांच्याकडून शिकण्यासारखे आहे.”
प्राजक्ताने पुढे त्यांच्या वक्तृत्वावर भाष्य करताना नमूद केले की, “मुख्यमंत्र्यांवर कितीही चिखलफेक झाली किंवा त्यांना समाजमाध्यमांवर कितीही ट्रोल केले गेले, तरी त्यांच्या वाणीतून कधीही अपशब्द बाहेर पडत नाही. मी आजवर कधीही त्यांचा सूर ढळलेला पाहिलेला नाही, जे अत्यंत कौतुकास्पद आहे.”
सुषमा अंधारे यांचा प्रहार: “हास्यजत्रेतील स्कीटपेक्षाही हास्यास्पद”-
प्राजक्ता माळीने केलेल्या या स्तुतीसुमनांना सुषमा अंधारे यांनी आपल्या खास शैलीत प्रत्युत्तर दिले आहे. समाजमाध्यमांवर आपली भूमिका मांडताना अंधारे यांनी प्राजक्ताला आरसा दाखवण्याचा प्रयत्न केला. त्यांनी लिहिले की, “प्राजक्ताजी, तुम्ही ‘हास्यजत्रा’ कार्यक्रमाच्या निवेदिका आहात आणि तो कार्यक्रम आम्ही आवडीने पाहतो. मात्र, राज्यात महिलांच्या लैंगिक शोषणाचे अनेक गंभीर प्रश्न प्रलंबित असताना तुम्ही त्याबद्दल कधीही एक शब्दही बोलला नाहीत. आता जेव्हा तुम्ही थेट मुख्यमंत्र्यांच्या ब्रँडिंगसाठी पुढाकार घेता, तेव्हा ते हास्यजत्रेतील एखाद्या प्रहसनापेक्षाही (स्कीट) अधिक हास्यास्पद वाटते.”
चर्चेला उधाण आणि लोकभावना-
प्राजक्ता माळीचे हे विधान आणि त्यानंतर सुषमा अंधारे यांनी घेतलेला समाचार यामुळे मनोरंजन आणि राजकीय विश्वात मोठी चर्चा सुरू झाली आहे. एकीकडे प्राजक्ताच्या चाहत्यांनी तिच्या स्पष्टवक्तेपणाचे समर्थन केले आहे.
