Crime News : वडील आणि मुलाच्या पवित्र नात्याला काळिमा फासणारी एक अत्यंत संतापजनक आणि तितकीच धक्कादायक घटना अहिल्यानगर जिल्ह्यातील श्रीरामपूर तालुक्यात उघडकीस आली आहे. दत्तनगर परिसरात राहणाऱ्या एका पोटच्या मुलानेच आपल्या जन्मदात्या पित्याची धारदार शस्त्राने सपासप वार करून निर्घृण हत्या केली. या अंगावर शहारे आणणाऱ्या घटनेमुळे संपूर्ण परिसरात प्रचंड खळबळ उडाली असून, कौटुंबिक वादातून नातेसंबंधातील तणाव किती टोकाला जाऊ शकतो याचे हे एक अत्यंत विदारक उदाहरण समोर आले आहे.
धारदार चाकूने सपासप वार-
अधिकच्या माहितीनुसार, मुसा हसन बागवान असे हत्या झालेल्या दुर्दैवी पित्याचे नाव असून, आशपाक बागवान असे हत्या करणाऱ्या आरोपी मुलाचे नाव आहे. ही थरारक घटना काल रात्री साधारण साडेअकरा वाजण्याच्या सुमारास घडली. गेल्या काही दिवसांपासून मुसा बागवान आणि त्यांचा मुलगा आशपाक यांच्यात सातत्याने कौटुंबिक कारणांवरून खटके उडत होते. काल रात्री या वादाने अचानक उग्र रूप धारण केले. घरात सुरू असलेल्या तीव्र शाब्दिक चकमकीचे रूपांतर हाणामारीत झाले. या दरम्यान संतापाने आंधळा झालेल्या आशपाकने घरातील धारदार चाकू काढून आपल्या वडिलांवर सपासप वार करण्यास सुरुवात केली.
उपचारादरम्यान मृत्यू आणि परिसरात शोककळा-
या भीषण हल्ल्यात मुसा बागवान हे रक्ताच्या थारोळ्यात पडले आणि गंभीर जखमी झाले. त्यांच्या ओरडण्याचा आवाज ऐकून कुटुंबातील इतर सदस्य आणि परिसरातील नागरिक मदतीसाठी धावून आले. त्यांनी जखमी मुसा बागवान यांना तातडीने उपचारासाठी जवळच्या रुग्णालयात दाखल केले. मात्र, गंभीर स्वरूपाच्या जखमांमुळे आणि प्रचंड रक्तस्त्राव झाल्याने उपचारादरम्यान त्यांचा दुर्दैवी मृत्यू झाला. या घटनेची माहिती मिळताच कुटुंबीयांवर दुःखाचा डोंगर कोसळला असून संपूर्ण दत्तनगर परिसरात भीतीचे आणि तीव्र संतापाचे वातावरण निर्माण झाले आहे.
आरोपी मुलगा अटकेत; पोलिसांचा तपास सुरू-
घटनेची माहिती मिळताच श्रीरामपूर पोलिसांनी तातडीने घटनास्थळी धाव घेऊन परिस्थिती नियंत्रणात आणली. या प्रकरणाचे गांभीर्य लक्षात घेऊन स्थानिक पोलिसांसोबतच फॉरेन्सिक पथकालाही पाचारण करण्यात आले होते.
गुन्ह्या कृत्य केल्यानंतर पळून जाण्याच्या तयारीत असलेल्या आरोपी आशपाक बागवान याला पोलिसांनी तातडीने बेड्या ठोकल्या आहेत. त्याच्याविरुद्ध भारतीय न्याय संहितेच्या संबंधित कलमांनुसार खुनाचा गुन्हा दाखल करण्यात आला असून, त्याला पोलीस कोठडीत ठेवण्यात आले आहे.
