Mamata Banerjee Resignation: पश्चिम बंगाल विधानसभा निवडणुकीत भारतीय जनता पक्षाने (BJP) ऐतिहासिक विजय मिळवला असला, तरी राज्याच्या राजकारणातील नाट्य अजूनही संपलेले नाही. तृणमूल काँग्रेसच्या (TMC) सर्वेसर्वा ममता बॅनर्जी यांनी मुख्यमंत्री पदाचा राजीनामा देण्यास स्पष्ट नकार दिला आहे.
“ही निवडणूक निष्पक्ष झाली नाही, त्यामुळे आम्ही पराभूत झालो असे मी मानत नाही,” असे म्हणत ममता बॅनर्जी यांनी राजभवनावर जाण्यास नकार दिला.
बंगाल निवडणुकीची आकडेवारी:
- भाजप: 207 जागा (ऐतिहासिक बहुमत)
- तृणमूल काँग्रेस (TMC): 80 जागा
- काँग्रेस: 2 जागा
- इतर: 5 जागा
विशेष म्हणजे, मुख्यमंत्री ममता बॅनर्जी यांचा स्वतःच्या भवानीपूर मतदारसंघातून पराभव झाला आहे. तरीही त्यांनी पंतप्रधान नरेंद्र मोदी आणि गृहमंत्री अमित शाह यांच्यावर थेट हस्तक्षेपाचे आरोप करत निवडणूक आयुक्तांना या पराभवासाठी जबाबदार धरले आहे.
Mamata Banerjee Resignation:मुख्यमंत्री राजीनामा न दिल्यास काय होते?
साधारणपणे निवडणुकीत पराभव झाल्यावर मुख्यमंत्री राज्यपालांकडे जाऊन राजीनामा सोपवतात. परंतु ममता बॅनर्जी यांनी तसे करण्यास नकार दिल्याने आता संविधानातील तरतुदींनुसार पुढील पावले उचलली जाऊ शकतात:
१. राज्यपालांचे विशेष अधिकार (कलम 164): भारतीय संविधानाच्या कलम 164 नुसार, मुख्यमंत्री आणि इतर मंत्र्यांची नियुक्ती राज्यपाल करतात. मंत्र्यांचे पद हे राज्यपालांच्या ‘मर्जी’वर अवलंबून असते. जर एखाद्या मुख्यमंत्र्याकडे बहुमत नसेल आणि तरीही ते पद सोडण्यास तयार नसतील, तर राज्यपाल त्यांना बडतर्फ करू शकतात.
२. विधानसभेचा कार्यकाळ (कलम 172): सध्याच्या बंगाल विधानसभेचा कार्यकाळ 7 मे रोजी संपत आहे. कलम 172 नुसार, विधानसभेचा 5 वर्षांचा कार्यकाळ संपला की ती आपोआप विसर्जित होते. त्यानंतर नवीन आमदारांचा शपथविधी आणि नवीन सरकार स्थापन करण्याची प्रक्रिया राज्यपालांना सुरू करावीच लागते.
३. फ्लोअर टेस्ट आणि राष्ट्रपती राजवट: जर मुख्यमंत्री पदावरून पायउतार होण्यास तयार नसतील, तर राज्यपाल विधानसभेत बहुमत सिद्ध करण्यास सांगू शकतात. जर कोणतेही स्थिर सरकार स्थापन होऊ शकले नाही, तर अंतिम पर्याय म्हणून कलम 356 अंतर्गत राज्यात राष्ट्रपती राजवट लागू केली जाऊ शकते.
हे देखील वाचा – West Bengal CM Race: बंगालमध्ये भाजपचा ऐतिहासिक विजय! आता मुख्यमंत्री कोण? ‘या’ नावांची जोरदार चर्चा
