Petrol Diesel Price Hike: देशात महागाईचा आणखी एक मोठा भडका उडाला आहे. सरकारी तेल कंपन्यांनी पेट्रोल आणि डिझेलच्या किमतीत पुन्हा एकदा मोठी वाढ केली आहे. नव्या दरवाढीनुसार, पेट्रोल प्रति लिटर 2.61 रुपयांनी तर डिझेल प्रति लिटर 2.71 रुपयांनी महागले आहे.
गेल्या अवघ्या दोन आठवड्यांमध्ये इंधनाचे दर वाढण्याची ही चौथी वेळ आहे. या चार दरवाढींमुळे मिळून पेट्रोल आणि डिझेलच्या किमतीत तब्बल 7.5 रुपयांची एकूण वाढ झाली आहे. यामुळे आधीच महागाईने होरपळणाऱ्या सर्वसामान्यांच्या खिशाला मोठा फटका बसला आहे.
Petrol Diesel Price Hike: चार प्रमुख शहरांमधील आजचे नवीन दर
या ताज्या दरवाढीनंतर देशातील प्रमुख महानगरांमध्ये पेट्रोल आणि डिझेलचे प्रति लिटर दर खालीलप्रमाणे पोहोचले आहेत:
- मुंबई: पेट्रोल 111.21 रुपये आणि डिझेल 97.83 रुपये
- दिल्ली: पेट्रोल 102.12 रुपये आणि डिझेल 95.20 रुपये
- कोलकाता: पेट्रोल 113.51 रुपये आणि डिझेल 99.82 रुपये
- चेन्नई: पेट्रोल 107.77 रुपये आणि डिझेल 99.55 रुपये
Petrol Diesel Price Hike: इंधन महागण्याचे मुख्य कारण काय?
आंतरराष्ट्रीय बाजारात कच्च्या तेलाच्या किमती वाढूनही देशात प्रदीर्घ काळ इंधनाचे दर स्थिर ठेवण्यात आले होते. यामुळे तेल कंपन्यांना मोठा तोटा सहन करावा लागत होता. हा तोटा भरून काढण्यासाठी कंपन्यांनी ही दरवाढ केली आहे.
या आंतरराष्ट्रीय दरवाढीचे मुख्य कारण म्हणजे अमेरिका आणि इराण यांच्यात पश्चिम आशियामध्ये सुरू असलेला वाद आहे. या वादामुळे जागतिक तेल पुरवठ्यासाठी अत्यंत महत्त्वाचा असलेला ‘हॉर्मुजची सामुद्रधुनी’ हा सागरी मार्ग बंद झाला आहे, ज्याचा थेट परिणाम पुरवठ्यावर झाला आहे.
Petrol Diesel Price Hike: कंपन्यांना दररोज १,००० कोटींचा फटका
जागतिक बाजारपेठेत कच्च्या तेलाचे दर सातत्याने बदलत आहेत. जेव्हा शांतता कराराची चर्चा सुरू होते तेव्हा किमती घसरतात, पण तोडगा निघत नाही हे स्पष्ट होताच दर पुन्हा वाढतात.
सरकारने जवळपास 76 दिवस ग्राहकांना दिलासा दिला होता आणि किमती वाढू दिल्या नव्हत्या. मात्र, यामुळे तेल कंपन्यांना दररोज सुमारे 1,000 कोटी रुपयांचा तोटा सहन करावा लागत होता. इतका मोठा तोटा कंपन्या जास्त काळ सहन करू शकत नसल्याने अखेर ही दरवाढ करणे भाग पडले, असे अधिकार्यांचे म्हणणे आहे.
Petrol Diesel Price Hike: जागतिक बाजारात सध्या काय स्थिती?
दुसरीकडे, अमेरिका आणि इराणमधील वाद मिटवण्यासाठी शांतता करार होण्याची शक्यता निर्माण झाल्याने आंतरराष्ट्रीय बाजारात कच्च्या तेलाच्या किमतीत 5 टक्क्यांपेक्षा जास्त मोठी घसरण पाहायला मिळाली आहे. उत्तर समुद्रातील ब्रेंट क्रूडचा भाव 5.1 टक्क्यांनी घसरून 98.22 डॉलर प्रति बॅरलवर आला आहे, तर वेस्ट टेक्सास इंटरमीडिएट क्रूडचा दर 5.2 टक्क्यांनी घसरून 91.57 डॉलर प्रति बॅरल झाला आहे.
Petrol Diesel Price Hike: सर्वसामान्यांवर होणार थेट परिणाम
एप्रिल 2022 पासून देशात इंधनाचे दर स्थिर होते. केवळ 2024 च्या लोकसभा निवडणुकीपूर्वी मार्च महिन्यात पेट्रोल-डिझेल २ रुपयांनी स्वस्त करण्यात आले होते. त्यानंतर आता मे महिन्यात सातत्याने दर वाढत आहेत.
या नवीन दरवाढीमुळे वाहतूक खर्च आणि लॉजिस्टिकचा खर्च मोठ्या प्रमाणावर वाढणार आहे. याचा थेट परिणाम भाजीपाला, दूध आणि इतर जीवनावश्यक वस्तूंच्या किमतींवर होऊन येत्या काळात सर्वसामान्यांना अधिक महागाईचा सामना करावा लागू शकतो, असा इशारा आर्थिक विश्लेषकांनी दिला आहे.
हे देखील वाचा – IPL 2026 Playoff Schedule: आयपीएल प्ले-ऑफचे चित्र स्पष्ट! ‘या’ संघात होणार सामने; पाहा संपूर्ण शेड्युल
