India Protest US Attack: मध्य पूर्वेतील वाढत्या तणावादरम्यान ओमानच्या किनारपट्टीजवळ एका व्यापारी जहाजावर अमेरिकेने मोठा लष्करी हल्ला केला आहे. या जहाजावर २४ भारतीय खलाशी तैनात होते. या गंभीर घटनेची दखल घेत भारताने नवी दिल्लीत अमेरिकेच्या प्रभारी राजदूतांनातातडीने समन्स बजावले आणि या हल्ल्याबाबत तीव्र शब्दांत निषेध नोंदवला.
परराष्ट्र मंत्रालयाचे अतिरिक्त सचिव नागराज नायडू यांनी अमेरिकेचे प्रभारी राजदूत जेसन मीक्स यांना बोलावून भारतीय नागरिकांच्या सुरक्षेबाबत अत्यंत चिंता व्यक्त केली. भारताने या हल्ल्याचा तीव्र निषेध केला असून, युद्धाच्या या भडक्यात निष्पाप भारतीय नागरिक अडकल्याबद्दल तीव्र नाराजी जाहीर केली आहे.
२१ भारतीयांची सुटका; ३ खलाशी अजूनही बेपत्ता
परराष्ट्र मंत्रालयाने जारी केलेल्या अधिकृत पत्रकानुसार, ‘सेतेबेलो’ नावाच्या या रासायनिक आणि तेलवाहू जहाजावर एकूण २८ कर्मचारी होते, ज्यामध्ये २४ भारतीय होते:
- बचावकार्य: आतापर्यंत २४ पैकी २१ भारतीय खलाशांना सुखरूप वाचवण्यात यश आले आहे.
- बेपत्ता खलाशी: दुर्दैवाने या हल्ल्यानंतर ३ भारतीय खलाशी बेपत्ता असल्याची माहिती समोर आली आहे.
- शोध मोहीम: ओमानमधील भारतीय दूतावास स्थानिक प्रशासनाच्या आणि ओमानच्या नौदलाच्या सतत संपर्कात असून, बेपत्ता भारतीयांचा शोध घेण्यासाठी युद्धपातळीवर शोध आणि बचाव मोहीम राबवली जात आहे.
अमेरिकेने दिली हल्ल्याची कबुली; इंजिन रूमवर डागले क्षेपणास्त्र
अमेरिकेच्या सेंट्रल कमांडने एका प्रसिद्धीपत्रकाद्वारे या जहाजावर हल्ला केल्याच्या वृत्ताला दुजोरा दिला आहे. अमेरिकेच्या वेळेनुसार ९ जून रोजी रात्री ११ वाजून १४ मिनिटांनी हा हल्ला करण्यात आला:
- सूचनांचे उल्लंघन: अमेरिकन सैन्याने दिलेल्या आदेशांचे आणि सूचनांचे या जहाजावरील कर्मचाऱ्यांनी वारंवार उल्लंघन केल्याचा दावा अमेरिकेने केला आहे.
- अचूक वेधाचा मारा: त्यानंतर अमेरिकेच्या लढाऊ विमानाने या जहाजाच्या इंजिन रूमला लक्ष्य करत अचूक क्षेपणास्त्र डागले.
- इंजिन रूमला आग: ओमानमधील सोहार बंदरापासून साधारण २० सागरी मैल ईशान्येला हा हल्ला झाला, ज्यामुळे जहाजाच्या मुख्य इंजिन रूमला भीषण आग लागली. हे जहाज पलाऊ या देशाच्या ध्वजाखाली प्रवास करत होते.
इराणवरील सागरी आर्थिक कोंडीचे परिणाम
ब्रिटिश सागरी सुरक्षा कंपनी ‘अँम्ब्रे’च्या अहवालानुसार, हा हल्ला अमेरिकेने इराणवर लादलेल्या सागरी आर्थिक कोंडीचा (ब्लॉकेड) एक भाग आहे. इराणशी संबंधित असलेल्या किंवा त्यांच्या बंदरांकडे जाणाऱ्या संशयास्पद जहाजांवर अमेरिकन नौदल सातत्याने कारवाई करत आहे. एप्रिल महिन्यापासून या परिसरात दोन्ही देशांमधील तणाव टोकाला पोहोचला आहे.
यापूर्वी ‘मारिव्हिक्स’ नावाच्या आणखी एका जहाजावरही इराणच्या बंदराकडे जात असल्याच्या संशयावरून ओमानच्या आखातात असाच हल्ला करण्यात आला होता. अमेरिकेने आतापर्यंत इराणच्या गुप्त व्यापारी ताफ्यातील अनेक जहाजांना अडवले किंवा त्यांचे मार्ग बदलले आहेत.
भारताचे शांततेचे आणि मुत्सद्देगिरीचे आवाहन
व्यापारी आणि मालवाहू जहाजांवर होणारे असे हल्ले आंतरराष्ट्रीय व्यापारासाठी आणि मानवी सुरक्षेसाठी अत्यंत धोकादायक बनत चालले आहेत, असा इशारा भारताने दिला आहे. परराष्ट्र मंत्रालयाने म्हटले आहे की, “आम्ही या भागातील वाढता लष्करी तणाव त्वरित कमी करण्याचे आवाहन करतो. संबंधित देशांनी चर्चेच्या माध्यमातून राजनैतिक मार्ग काढून या समस्येवर तोडगा काढावा, जेणेकरून या सागरी क्षेत्रात पुन्हा शांतता आणि स्थैर्य प्रस्थापित होऊ शकेल.”
