Rohit Pawar : शेतकऱ्यांच्या विविध प्रलंबित मागण्यांसाठी आणि संपूर्ण कर्जमाफीसाठी राष्ट्रवादी काँग्रेस शरदचंद्र पवार पक्षाचे आमदार रोहित पवार हे पंढरपूर येथे ‘अन्नत्याग आंदोलन’ करत आहेत. विठ्ठलाच्या चरणी न्याय मागण्यासाठी रोहित पवार यांच्याकडून हे उपोषण केले जात आहे. मात्र, या आंदोलनाला सुरुवातीलाच प्रशासकीय आणि अंतर्गत राजकीय अडचणींचा सामना करावा लागत असल्याचे चित्र समोर आले आहे. एकीकडे पोलिसांनी या आंदोलनाला परवानगी नाकारली आहे, तर दुसरीकडे पक्षांतर्गत आमदारांमध्येच समन्वयाचा अभाव म्हणजेच विसंवाद असल्याचे उघड झाले आहे.
सोलापूर जिल्ह्यातील शरद पवार गटाच्या आमदारांना आंदोलनाची माहितीच नाही
या आंदोलनाच्या निमित्ताने राष्ट्रवादी काँग्रेस शरदचंद्र पवार पक्षातील अंतर्गत विसंवाद चव्हाट्यावर आला आहे. सोलापूर जिल्ह्यात शरद पवार यांच्या पक्षाचे एकूण चार आमदार आणि एक खासदार आहेत. असे असतानाही, रोहित पवार यांच्या या महत्त्वपूर्ण आंदोलनाचा कोणताही निरोप जिल्ह्यातील स्वतःच्याच पक्षाच्या आमदारांना देण्यात आलेला नाही. आमदार उत्तम जानकर आणि आमदार अभिजीत पाटील या दोन प्रमुख आमदारांनी आपल्याला या आंदोलनाची कोणत्याही प्रकारची पूर्वकल्पना किंवा माहिती नसल्याची थेट कबुली दिली आहे. त्यामुळे एवढ्या मोठ्या आंदोलनादरम्यान पक्षातील स्थानिक लोकप्रतिनिधींना विश्वासात का घेण्यात आले नाही, असा प्रश्न आता उपस्थित होत आहे.
कायदा-सुव्यवस्थेचे कारण देत पोलिसांची नोटीस
रोहित पवार यांच्या आंदोलनाला पंढरपूर पोलिसांनी अधिकृत परवानगी दिलेली नाही. आंदोलन सुरू होण्यापूर्वीच पोलिसांकडून आमदार रोहित पवार यांना एक कायदेशीर नोटीस बजावण्यात आली. पंढरपूर येथील छत्रपती शिवाजी महाराज चौकातील वाहतूक व्यवस्था विस्कळीत होऊ नये आणि कायदा व सुव्यवस्थेचा कोणताही प्रश्न निर्माण होऊ नये, या कारणास्तव पोलिसांनी ही नोटीस दिली आहे. पंढरपूर नगरपालिकेने या आंदोलनासाठी शहरातील इतर कोणत्याही मोकळ्या जागेचा वापर करण्याचे सुचवले होते. मात्र, छत्रपती शिवाजी महाराज चौकातच आंदोलन करण्याच्या भूमिकेवर रोहित पवार ठाम राहिल्याने प्रशासनाने ही नोटीस जारी केली.
“कितीही अडथळे आणले तरी आंदोलन थांबणार नाही” – रोहित पवार
पोलिसांकडून नोटीस मिळताच आमदार रोहित पवार यांनी सोशल मीडियावर एक सविस्तर पोस्ट शेअर करत राज्य सरकारवर कडाडून टीका केली आहे. रोहित पवार यांनी आपल्या पोस्टमध्ये लिहिले, “विठुरायाची पंढरी सर्व भक्तांसाठी कायम खुली असतानाही, हे सरकार बॅरिकेड्स लावून आमच्या मार्गात अडथळे आणण्याचा प्रयत्न करत आहे. महामानव डॉ. बाबासाहेब आंबेडकरांनी दिलेल्या संविधानाने देशातील प्रत्येक नागरिकाला शांततापूर्ण मार्गाने आंदोलन करण्याचा अधिकार दिला आहे. त्यामुळे माझ्या अन्नदात्या शेतकऱ्यासाठी पुकारलेल्या या अन्नत्याग आंदोलनात सरकारने कितीही अडथळे आणले तरी हे आंदोलन थांबणार नाही.”
त्यांनी पुढे सरकारला इशारा देताना म्हटले की, “सत्तेचा अहंकार जनतेच्या ताकदीसमोर कधीही टिकत नसतो, हे सरकारने लक्षात ठेवावे. उलट लढणाऱ्यांचे हात धरून आणि बोलणाऱ्यांचे तोंड दाबून सरकार स्वतःचाच पराभव सिद्ध करत आहे. सरकारच्या दबावामुळे जिल्हा आणि स्थानिक प्रशासनाकडून आमच्या मार्गात अडचणी निर्माण केल्या जात असल्या, तरी मनाने मात्र प्रशासनातील सर्व अधिकारी आणि कर्मचारी आमच्याच सोबत आहेत, हे सरकारने विसरू नये.” या राजकीय संघर्षामुळे आता पंढरपूरमधील वातावरण कमालीचे तापले आहे.
