FIFA World Cup: फुटबॉल विश्वातील सर्वात मोठी स्पर्धा म्हणजेच फिफा विश्वचषक खेळण्याचे भारताचे स्वप्न यंदाही अपूर्णच राहिले आहे. भारताचा मुख्य संघ या स्पर्धेत कधीही खेळू शकलेला नाही, ही कोट्यवधी भारतीय क्रीडाप्रेमींसाठी अत्यंत निराशाजनक बाब आहे. 2022 च्या विश्वचषकादरम्यान भारतातील तब्बल 745 दशलक्ष लोकांनी टीव्ही आणि डिजिटल माध्यमांवरून या खेळाचा आनंद घेतला होता, ज्यामुळे भारत ही जगातील दुसरी सर्वात मोठी फुटबॉल बाजारपेठ बनली आहे.
यंदा अमेरिका, कॅनडा आणि मेक्सिकोमध्ये होणाऱ्या या महाकुंभात 48 देश आमनेसामने असतील. भारताचा संघ यात नसला, तरी भारतीय चाहत्यांसाठी एक अभिमानास्पद आणि आनंदाची गोष्ट समोर आली आहे. या विश्वचषकात वेगवेगळ्या देशांमधून तब्बल 4 असे खेळाडू खेळणार आहेत, ज्यांचे मूळ भारताशी जोडलेले आहे. पंजाब ते केरळ असा त्यांच्या कुटुंबाचा इतिहास असून या खेळाडूंचा रंजक प्रवास खालीलप्रमाणे आहे:
१. सरप्रीत सिंग (न्यूझीलंड)
भारतीय फुटबॉल चाहत्यांमध्ये सरप्रीत सिंग हे नाव अत्यंत परिचित आहे. ऑकलंडमध्ये जन्मलेल्या सरप्रीतचे आई-वडील मूळचे पंजाबमधील जालंधरचे आहेत. त्याचा परिवार ऑकलंडमध्ये किराणा दुकान चालवायचा. एका अस्सल पंजाबी कुटुंबात वाढलेल्या सरप्रीतने न्यूझीलंड फुटबॉलमध्ये स्वतःचे मोठे स्थान निर्माण केले आहे.
- युरोपियन क्लबचा प्रवास: सरप्रीतने 2017 आणि 2019 च्या 20 वर्षांखालील विश्वचषकात न्यूझीलंडचे प्रतिनिधित्व केले होते. त्यानंतर 2019 मध्ये जर्मनीच्या प्रसिद्ध ‘बायर्न म्युनिक’ क्लबने त्याला करारबद्ध करून इतिहास रचला होता. 27 वर्षांचा हा आक्रमक मिडफिल्डर सध्या सर्बियाच्या टीएससी क्लबकडून खेळतो असून त्याने न्यूझीलंडसाठी 24 आंतरराष्ट्रीय सामने खेळले आहेत.
२. तहसिन मोहम्मद जमशेद (कतार)
अवघ्या 19 वर्षांचा हा तरुण विंगर कतारमधील फुटबॉलचा उगवता तारा मानला जातो. तहसिनचा जन्म कतारमध्ये झाला असला तरी त्याचे संपूर्ण कुटुंब केरळचे आहे. त्याचे वडील जमशेद हे कालिकत विद्यापीठ आणि केरळच्या सब-ज्युनिअर संघातून फुटबॉल खेळले आहेत, तर त्याची आई श्यामा ही कन्नूरची आहे.
- पारपत्राचा रंजक विशेष: तहसिन अल दुहैल या कतारच्या आघाडीच्या क्लबकडून खेळतो. त्याने 2024 मध्ये अफगाणिस्तानविरुद्धच्या पात्रता सामन्यातून आंतरराष्ट्रीय पदार्पण केले होते. विशेष म्हणजे, तहसिनकडे भारताचे पासपोर्ट असून कतारकडून आंतरराष्ट्रीय स्तरावर खेळण्यासाठी त्याला तिथले विशेष मिशन पासपोर्ट देण्यात आले आहे.
३. सॅम्युअल मुतुसामी (डीआर काँगो)
सॅम्युअल मुतुसामीची कथा सर्वात वेगळी आणि रंजक आहे. फ्रान्समध्ये जन्मलेल्या सॅम्युअलचे वडील इंडो-ग्वाडेलूपियन समुदायाचे असून ते मूळ तमिळ वंशाचे आहेत. १९ व्या शतकात भारतातून स्थलांतरित झालेल्या मजुरांचे वंशज कॅरिबियन बेटांवर स्थायिक झाले होते, तिथून हा वारसा पुढे आला. सॅम्युअलची आई काँगोची आहे, ज्यामुळे त्याला डीआर काँगो देशाकडून खेळण्याची संधी मिळाली. 29 वर्षांचा हा खेळाडू त्याच्या उत्कृष्ट खेळासाठी ओळखला जातो आणि त्याने आतापर्यंत 57 आंतरराष्ट्रीय सामने खेळले आहेत.
४. निशाण वेलुपिल्ले (ऑस्ट्रेलिया)
मेलबर्नमध्ये जन्मलेला आणि वाढलेला निशाण वेलुपिल्ले हा ऑस्ट्रेलियाच्या संघातील सर्वात धोकादायक आक्रमक खेळाडू मानला जातो. त्याचे वडील शशीनाथ वेलुपिल्ले हे श्रीलंका तमिळ वंशाचे आहेत, तर आई गिलियन ही अँग्लो-इंडियन आहे.
धडाकेबाज पदार्पण: निशाणने 2024 मध्ये ऑस्ट्रेलियाच्या मुख्य संघात स्थान मिळवले. चीनविरुद्धच्या पात्रता सामन्यात मैदानात आल्यावर अवघ्या 7 मिनिटांत त्याने गोल करून ऑस्ट्रेलियाला 3-1 असा विजय मिळवून दिला होता. या अफाट कामगिरीमुळे ऑस्ट्रेलियाच्या 26 जणांच्या मुख्य संघात 25 वर्षांच्या निशाणला स्थान देण्यात आले आहे.
