Maharashtra Rain Update : राज्यामध्ये पेरणीच्या तयारीला लागलेल्या बळीराजाची आणि उकाड्याने हैराण झालेल्या मुंबईकरांची पावसाची प्रतीक्षा आणखी वाढण्याची चिन्हे आहेत. गेल्या आठवड्याभरापासून महाराष्ट्रातील मान्सूनची पुढची वाटचाल पूर्णपणे ठप्प झाली आहे. ‘मुंबईत पावसाचे आगमन कधी होणार?’ असा प्रश्न आता सर्वांनाच पडला आहे.
हवामान अभ्यासकांच्या मते, आता २५ जूननंतरच मुंबईसह राज्यात मान्सून पुन्हा सक्रिय होण्याची आणि पुढे सरकण्याची शक्यता आहे. सध्या हा पाऊस कोकणातील हर्णै ते सोलापूर या मर्यादित पट्ट्यातच स्थिरावला असून, पुढे जाण्यासाठी वातावरण अनुकूल नसल्याने त्याची गती पूर्णपणे मंदावली आहे. २३ जूनच्या सुमारास वातावरणात काहीसा बदल पाहायला मिळू शकतो, त्यानंतर मान्सून पुन्हा सक्रिय होऊ शकतो.
मान्सूनची गती का मंदावली? ‘ही’ आहेत मुख्य कारणे
हवामान अभ्यासकांनी दिलेल्या विश्लेषणानुसार, वातावरणातील काही विशिष्ट बदलांमुळे पावसाच्या प्रगतीला ब्रेक लागला आहे:
- उष्ण वाऱ्यांचा प्रभाव: देशाच्या वायव्य भागाकडून वाहणाऱ्या कोरड्या आणि उष्ण वाऱ्यांमुळे पावसाच्या ढगांना अडथळा निर्माण होत आहे.
- वाऱ्यांची चुकीची प्रणाली: अरबी समुद्रामध्ये साडेतीन ते चार किलोमीटर उंचीवर विरुद्ध दिशेने वाहणाऱ्या प्रत्यावर्ती वाऱ्यांची प्रणाली सक्रिय झाली आहे.
- कमकुवत प्रवाह: यंदा मान्सूनचा प्रवाह सध्या कमजोर पडला असून, यामुळे ८ जूनपासून राज्याच्या मान्सून रेषेत कोणताही मोठा बदल किंवा प्रगती झालेली नाही.
पाऊस तर लांबलाच, उलट उष्णतेच्या लाटेचा इशारा!
पावसाची चातकासारखी वाट पाहत असतानाच नागरिकांना आता पुन्हा एकदा कडक उन्हाचा आणि उकाड्याचा सामना करावा लागणार आहे. हवामान अभ्यासकांनी दिलेल्या अंदाजानुसार, १९ जूनपर्यंत मध्य महाराष्ट्र, मराठवाडा आणि विदर्भातील काही जिल्ह्यांमध्ये नागरिकांना उष्णतेच्या लाटेचा त्रास होऊ शकतो. तसेच मुंबई आणि कोकण किनारपट्टीच्या भागात दमट हवामानामुळे रात्रीच्या वेळी प्रचंड उकाडा जाणवणार आहे.
घाईघाईत पेरणी करू नका; शेतकऱ्यांना संयम राखण्याचे आवाहन
पावसाने ओढ दिल्यामुळे खरीप हंगामातील पेरण्यांचे नियोजन कोलमडले आहे. या परिस्थितीवर बोलताना हवामान अभ्यासकांनी शेतकऱ्यांसाठी एक अत्यंत महत्त्वाचा सल्ला दिला आहे:
- ओलावा येण्याची प्रतीक्षा करा: शेतात जोपर्यंत पुरेशा प्रमाणात पाणी मुरत नाही आणि पेरणीयोग्य कडक ओलावा निर्माण होत नाही, तोपर्यंत शेतकऱ्यांनी पेरणीची घाई करू नये.
- जुलैमध्ये चित्र स्पष्ट होणार: जून महिन्याच्या शेवटच्या आठवड्यातील पावसाची स्थिती आणि जुलै महिन्याच्या सुरुवातीला वातावरणात होणारे बदल पाहूनच शेतकऱ्यांनी पेरणीचा अंतिम निर्णय घ्यावा, जेणेकरून दुबार पेरणीचे संकट टाळता येईल.
हे देखील वाचा – Shiv Sena Political Crisis: “उद्धवजी, वहिनी आणि आदित्य… आता पक्षात तिघेच उरणार”; रामदास कदमांचा टोला
