UPI Payment: कधीकधी डिजिटल पेमेंट करताना केलेली एक लहानशी दुर्लक्षलेली चूक खूप महागात पडू शकते. हॉटेलमध्ये बिल भरताना किंवा दुकानात पैसे देताना मूळ रकमेच्या पुढे चुकून एक जादा शून्य टाईप होतो आणि सेकंदाच्या आत हजारो रुपये ट्रान्सफर होतात.
युपीआय पेमेंटचे तंत्रज्ञान अत्यंत वेगवान असल्याने, आपली चूक लक्षात येईपर्यंत पैसे समोरच्या व्यक्तीच्या खात्यात जमा झालेले असतात. बँक खात्यातून पैसे कपात झाल्याचा मेसेज आल्यावर मोठा धक्का बसतो.
ऑनलाईन व्यवहार वाढल्यापासून अशा प्रकारच्या चुका होणे खूप सामान्य झाले आहे. घाईघाईत चुकीचा आकडा टाईप करणे किंवा चुकीचा क्युआर कोड स्कॅन झाल्यामुळे पैसे जास्त प्रमाणात ट्रान्सफर होतात. जर तुमच्यासोबतही असा प्रकार घडला असेल, तर गोंधळून न जाता त्वरित काही सोप्या स्टेप्स फॉलो केल्यास तुमचे पैसे सुरक्षितपणे परत मिळू शकतात.
जास्त पैसे ट्रान्सफर झाल्यास तात्काळ करायच्या ३ महत्त्वाच्या गोष्टी:
चुकून जास्त पैसे गेल्यास खालील मार्गांचा अवलंब करून प्रक्रियेला गती देता येते:
- १. संबंधित व्यक्तीकडे त्वरित मागणी करा: पैसे जास्त गेल्याचे समजताच सर्वात आधी ज्या व्यक्तीला किंवा दुकानदाराला पैसे मिळाले आहेत, त्यांच्याशी थेट संपर्क साधून अतिरिक्त रक्कम परत करण्याची विनंती करावी.
- २. व्यवहाराचे पुरावे जपून ठेवा: समस्येचे निवारण करण्यासाठी तुमच्याकडे व्यवहाराचे सर्व डिजिटल पुरावे असणे आवश्यक आहे. यासाठी ट्रान्झॅक्शन आयडी (Transaction ID), पैशांच्या देवाणघेवाणीचा स्क्रीनशॉट आणि पेमेंट पावती सुरक्षित ठेवा.
- ३. अॅप आणि बँकेत अधिकृत तक्रार: केवळ तोंडी विनंतीवर अवलंबून न राहता, तुमच्या युपीआय अॅपमध्ये किंवा संबंधित बँकेच्या अॅप्लिकेशनमध्ये जाऊन या चुकीच्या व्यवहाराविरोधात तात्काळ तक्रार नोंदवणे अत्यंत गरजेचे आहे.
पैसे परत मिळायला किती वेळ लागतो? समोरच्याने नकार दिल्यास काय आहे नियम?
एकदा यशस्वी झालेले युपीआय पेमेंट थेट रिव्हर्स किंवा कॅन्सल करण्याचा कोणताही पर्याय अॅपमध्ये उपलब्ध नसतो. ही रक्कम परत मिळवण्यासाठी दोन्ही बाजूच्या बँकांची मध्यस्थी आवश्यक ठरते. जर समोरची व्यक्ती सहकार्य करण्यास तयार असेल, तर काही दिवसांतच पैसे परत मिळतात. मात्र, समोरच्याने व्यवहार मान्य करण्यास नकार दिला, तर या प्रक्रियेला काही आठवडे लागू शकतात.
कायद्याचा विचार केला तर, चुकीमुळे खात्यात आलेले अतिरिक्त पैसे स्वतःकडे ठेवण्याचा समोरच्या व्यक्तीला कोणताही कायदेशीर अधिकार नाही. जर समोरची व्यक्ती पैसे परत देण्यास स्पष्ट नकार देत असेल, तर ग्राहकाने आपल्या मुख्य बँकेत जाऊन अधिकृत लेखी तक्रार दाखल करावी.
एकदा पैसे यशस्वीरित्या जमा झाले की बँक ते स्वतःहून काढून घेऊ शकत नाही, त्यामुळे बँकेच्या मदतीने कायदेशीर प्रक्रियेचा पाठोरावा करणे हाच एकमेव मार्ग उरतो.
हे देखील वाचा – Kunal Shah WhatsApp Head: भारतीय उद्योजकाचा डंका! ‘CRED’ चे संस्थापक कुणाल शाह सांभाळणार व्हॉट्सअॅपची जागतिक धुरा
