Mumbai Local : मुंबईची जीवनवाहिनी मानल्या जाणाऱ्या लोकल ट्रेन प्रवासादरम्यान काही सेकंदांची घाई किंवा आळस माणसाच्या जीवावर कसा बेतू शकतो, याचे जिवंत आणि धक्कादायक उदाहरण समोर आले आहे. सोशल मीडियावर सध्या अंगावर काटा आणणारा एक थरारक व्हिडिओ प्रचंड वेगाने व्हायरल होत आहे. हा व्हिडिओ पश्चिम रेल्वेवरील ‘वसई रोड’ रेल्वे स्थानकावरील (Vasai Road Railway Station) असल्याचा दावा नेटकऱ्यांकडून केला जात आहे. पादचारी पुलाचा (Footover Bridge) वापर करून जिना चढण्याचा त्रास टाळण्यासाठी एका तरुणाने थेट मृत्यूलाच आमंत्रण देणारा जीवघेणा शॉर्टकट निवडल्याचे या व्हिडिओमध्ये स्पष्ट दिसत आहे. हा व्हिडिओ नेमका कोणत्या तारखेचा आणि कधीचा आहे, याविषयी रेल्वे प्रशासनाकडून अद्याप कोणतीही अधिकृत किंवा स्वतंत्र पुष्टी करण्यात आलेली नाही.
समोरून भरधाव मेल-एक्सप्रेस आली अन्… लोकलमधून चुकीच्या बाजूने उतरण्याचा थरार
व्हायरल झालेल्या व्हिडिओमधील दृश्यानुसार, एक तरुण लोकल ट्रेनमधून प्लॅटफॉर्मच्या बाजूने उतरण्याऐवजी अत्यंत बेजबाबदारपणे चुकीच्या बाजूने (राँग साईड) खाली उतरला. पादचारी पुलाचा वापर न करता रेल्वे रुळ ओलांडून (Railway Track Crossing) थेट दुसऱ्या प्लॅटफॉर्मवर जाण्याचा त्याचा मानस होता.
हा तरुण दोन रेल्वे रुळांच्या मध्ये बसवण्यात आलेल्या लोखंडी सुरक्षा रेलिंगवर चढला आणि ती ओलांडण्याचा प्रयत्न करू लागला. नेमक्या त्याच वेळी समोरच्या रुळावरून एक अत्यंत भरधाव मेल-एक्सप्रेस गाडी वेगाने धावत आली. भरधाव एक्सप्रेस आणि रेलिंगवर अडकलेला तरुण हे पाहून समोरच्या प्लॅटफॉर्मवरील आणि लोकल ट्रेनमधील इतर प्रवाशांच्या काळजाचा ठोका चुकला. प्रवाशांनी त्या तरुणाला सतर्क करण्यासाठी घटनास्थळी एकच आरडाओरडा आणि किंचाळ्या मारण्यास सुरुवात केली.
भीतीने पाय घसरला; सुदैवाने टळला भीषण अपघात
समोरून येणारा मृत्यू आणि प्रवाशांचा गदारोळ ऐकून तो तरुण काही क्षणांसाठी रेलिंगवरच स्तब्ध झाला. मात्र, ज्या लोकल ट्रेनमधून तो उतरला होता, ती लोकल सुरू होऊन निघून जाईल या भीतीने त्याने अत्यंत घाईघाईत पुन्हा रेलिंग ओलांडण्याचा प्रयत्न केला. याच धावपळीत आणि घाबरलेल्या मनःस्थितीत सुरक्षा लोखंडी रेलिंगवरून त्याचा पाय घसरला. तो रेल्वे रुळांच्या अगदी जवळ कोसळला. काही सेकंदांचा फरक पडला असता, तर तो थेट भरधाव एक्सप्रेसच्या खाली आला असता. मात्र, ‘काळ आला होता पण वेळ आली नव्हती’ या म्हणीप्रमाणे सुदैवाने त्याचा जीव वाचला आणि एक मोठी भीषण दुर्घटना टळली.
रेल्वे प्रशासनाचे आवाहन; केवळ काही सेकंदांसाठी आयुष्य धोक्यात टाकू नका
स्थानकावर उपस्थित असलेल्या लोकल ट्रेनमधील एका सुज्ञ प्रवाशाने हा अंगावर काटा आणणारा संपूर्ण प्रकार आपल्या मोबाईल कॅमेऱ्यात चित्रीत केला होता. हा व्हिडिओ इंटरनेटवर प्रसिद्ध होताच प्रवाशांच्या अशा जीवघेण्या निष्काळजीपणाबाबत नेटकऱ्यांनी तीव्र संताप व्यक्त केला आहे.
रेल्वे प्रशासन (Railway Authority) दररोज प्रवाशांना रेल्वे रुळ ओलांडू नका, पादचारी पुलाचा (FOB) किंवा सरकत्या जिन्याचा (Escalator) वापर करा, असे वारंवार आवाहन करत असते. मात्र, तरीही काही प्रवासी केवळ काही सेकंद किंवा मिनिटे वाचवण्याच्या नादात स्वतःचे संपूर्ण आयुष्य आणि कुटुंबाला उद्ध्वस्त करण्याचा धोका पत्करतात.
