Abhijeet Dipke on PM Modi : दिल्लीतील जंतरमंतर येथे स्पर्धा परीक्षांमधील गैरव्यवहाराविरोधात आंदोलन करणाऱ्या सोनम वांगचूक यांना दिल्ली पोलिसांनी मध्यरात्री बळजबरीने ताब्यात घेतल्याच्या घटनेनंतर आता आंदोलनकर्त्यांचा संताप अनावर झाला आहे. ‘कॉकरोच जनता पार्टी’चे संस्थापक अभिजित दीपके यांनी या दडपशाहीचा तीव्र शब्दांत निषेध करत थेट पंतप्रधान नरेंद्र मोदी यांच्यावर अत्यंत शेलक्या आणि आक्रमक शब्दांत हल्लाबोल केला. “या देशाच्या संपूर्ण इतिहासात नरेंद्र मोदी यांच्यासारखा संवेदनशून्य पंतप्रधान कधीच झाला नाही. हकनाक मुलांवर लाठीचार्ज करणारी अशी व्यक्ती पंतप्रधान असणे ही आपल्या देशासाठी अत्यंत शरमेची बाब आहे,” अशा अत्यंत तिखट शब्दांत त्यांनी आपला संताप व्यक्त केला. दीपके पुढे म्हणाले की, “आजपर्यंत आम्ही केवळ केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत होतो. परंतु, आता ज्या प्रकारे आमच्यावर दडपशाही केली जात आहे, ते पाहता नरेंद्र मोदी, आता थेट तुमचीच पाळी आहे.”
“पंतप्रधानपदाच्या प्रतिष्ठेलाच लागला डाग!” दीपके यांना अश्रू अनावर
ज्येष्ठ सामाजिक कार्यकर्ते सोनम वांगचूक यांना पोलिसांनी रात्रीच्या अंधारात एखाद्या गुन्हेगारासारखे ओढत नेल्याचे सांगताना अभिजित दीपके यांना पत्रकार परिषदेत आपले अश्रू अनावर झाले. ढसाढसा रडत त्यांनी आपली व्यथा मांडली. ते म्हणाले, “या महान भारताच्या भूमीत आजपर्यंत अनेक थोर, प्रगल्भ आणि संवेदनशील पंतप्रधान होऊन गेले आहेत, ज्यांनी पदाची प्रतिष्ठा राखली. परंतु, सद्यस्थितीतील शासनकर्त्यांमुळे या सर्वोच्च पंतप्रधानपदाचा आणि त्याच्या प्रतिष्ठेचाच अपमान होत आहे. परीक्षांमधील गोंधळामुळे आणि पेपरफुटीमुळे देशातील २० हून अधिक निष्पाप विद्यार्थ्यांचा मृत्यू झाला आहे. आम्हाला वाटले होते की, इतक्या मोठ्या प्रमाणावर तरुणांचे बळी गेल्यानंतर सरकारला जाग येईल आणि ते नैतिक जबाबदारी स्वीकारून शिक्षणमंत्र्यांचा राजीनामा घेतील. परंतु, या राज्यकर्त्यांनी ते किती निर्दयी आहेत हे आम्हाला दाखवून दिले आहे. त्यांना कोणाच्याही जिवाची पर्वा उरलेली नाही.”
“विद्यार्थ्यांच्या मृत्यूपेक्षा धर्मेंद्र प्रधान महत्त्वाचे आहेत का?”
पंतप्रधानांच्या भूमिकेवर थेट बोट ठेवत अभिजित दीपके यांनी अनेक तिखट प्रश्न उपस्थित केले. ते म्हणाले, “नरेंद्र मोदीजी, तुम्हाला केंद्रीय शिक्षणमंत्री धर्मेंद्र प्रधान यांच्याबद्दल इतकी काय आपुलकी वाटत आहे? तुम्ही त्यांचे इतके अतोनात संरक्षण का करत आहात? देशातील २० हून अधिक तरुणांच्या मृत्यू पावलेल्या समिधांपेक्षा तुम्हाला धर्मेंद्र प्रधान यांचे मंत्रीपद अधिक महत्त्वाचे आणि मौल्यवान वाटते का? परीक्षांमधील भ्रष्टाचाराविरोधात आणि आपल्या उज्वल भविष्यासाठी शांततापूर्ण मार्गाने न्यायाची मागणी करणाऱ्या निष्पाप विद्यार्थ्यांवर लाठीचार्ज केला जातो, त्यांच्यावर गुन्हे दाखल केले जातात, मात्र मूळ दोषी मोकळे फिरत आहेत, हे कसले न्याय कृत्य आहे?”
“६० वर्षांच्या वृद्ध देशभक्ताला गुन्हेगारासारखे ओढत नेले”
पोलिसांनी काल रात्री जंतरमंतर येथे केलेल्या कारवाईचे भीषण वास्तव सांगताना दीपके यांनी प्रशासनावर छळाचे गंभीर आरोप केले. ते म्हणाले, “गेल्या २० दिवसांपासून अन्न पाण्याचा पूर्ण त्याग केलेले ६० वर्षांचे वयोवृद्ध सोनम वांगचूक शांततेने बसले होते. त्यांना तेथून जाण्याची अजिबात इच्छा नव्हती. परंतु, मध्यरात्री पोलिसांनी त्यांना एखाद्या सराईत गुंडाप्रमाणे आणि गुन्हेगाराप्रमाणे ओढत नेले. केवळ ओढत नेले नाही, तर त्यांना अद्वातद्वा शिवीगाळ केली आणि त्यांचा शारीरिक व मानसिक छळ केला.
