PM Surya Ghar Yojana: दरवर्षी उन्हाळा वाढला की घराघरांमध्ये पंखे, कुलर आणि एसीचा वापर मोठ्या प्रमाणावर सुरू होतो. परिणामी, महिन्याचे विजेचे बिल हजारांच्या घरात जाते, ज्यामुळे सर्वसामान्यांचे बजेट कोलमडते. इंधनाचे वाढते दर आणि महागडी वीज यावर कायमस्वरूपी तोडगा म्हणून केंद्र सरकारने ‘पीएम सूर्य घर मोफत वीज योजना’ सुरू केली आहे.
ही योजना देशातील 1 कोटी कुटुंबांपर्यंत सौर ऊर्जा पोहोचवण्यासाठी गेमचेंजर ठरत आहे. या योजनेचा मुख्य उद्देश नागरिकांना स्वतःची वीज स्वतः तयार करण्याची संधी देणे आणि त्यांचे वीज बिल थेट शून्य रुपयांवर आणणे हा आहे. विशेष म्हणजे, या योजनेचा लाभ घेण्यासाठी मार्च 2027 ही अंतिम मुदत निश्चित करण्यात आली आहे.
PM Surya Ghar Yojana: योजनेचे स्वरूप आणि बँकेकडून स्वस्त कर्ज
या योजनेअंतर्गत घरांच्या छतावर सोलर पॅनेल बसवण्यासाठी सरकारकडून मोठे आर्थिक सहाय्य दिले जाते. छतावर तयार झालेली वीज तुम्ही घरगुती वापरासाठी वापरू शकता आणि गरजेपेक्षा जास्त असलेली वीज ग्रीडमध्ये पाठवून अतिरिक्त कमाई देखील करू शकता.
सोलर प्लांट बसवण्यासाठी साधारणपणे 80 हजार रुपयांपासून ते 2 लाख रुपयांपर्यंत खर्च येतो. सर्वसामान्यांना हा खर्च एकदम करणे शक्य व्हावे, म्हणून सरकार केवळ 7 टक्के व्याजदराने 2 लाख रुपयांपर्यंतचे अतिशय स्वस्त कर्ज (लोन) उपलब्ध करून देत आहे. एका सामान्य कुटुंबाच्या मोठ्या गरजा पूर्ण करण्यासाठी 3 किलोवॅटचा सोलर सिस्टम पुरेसा ठरतो.
PM Surya Ghar Yojana: सबसिडीचे संपूर्ण गणित: कोणाला किती पैसे मिळणार?
जर तुम्ही सरकारी योजनेशिवाय बाजारातून थेट सोलर पॅनेल लावले, तर प्रति किलोवॅट 60 हजार ते 80 हजार रुपये खर्च येतो. मात्र, या सरकारी योजनेत तुम्हाला 40 ते 60 टक्क्यांपर्यंत थेट आर्थिक सूट मिळते:
- 1 किलोवॅट सिस्टीम: सुमारे 30 हजार रुपयांपर्यंत सबसिडी दिली जाते.
- 2 किलोवॅट सिस्टीम: सुमारे 60 हजार रुपयांपर्यंत सबसिडी मिळते.
- 3 किलोवॅट किंवा त्याहून मोठा सिस्टीम: जास्तीत जास्त 78 हजार रुपयांपर्यंतची केंद्रीय सबसिडी मंजूर केली जाते.
राज्यांची अतिरिक्त मदत: केंद्र सरकारच्या 78 हजार रुपयांच्या मदतीशिवाय काही राज्य सरकारे स्वतःकडून वेगळी सबसिडी देत आहेत.
PM Surya Ghar Yojana: अर्ज करण्यासाठी पात्रता आणि नियम
- अर्ज करणाऱ्या नागरिकाच्या नावावर स्वतःचे पक्के घर आणि हक्काची छत असणे गरजेचे आहे.
- संबंधित व्यक्तीच्या नावावर एक चालू वीज कनेक्शन (लाईट बिल) असणे आवश्यक आहे.
घरबसल्या ऑनलाइन अर्ज करण्याची सोपी पद्धत
सोलर पॅनेल लावण्यासाठी तुम्हाला खालील ६ टप्प्यांचा अवलंब करावा लागेल:
१. नोंदणी करा: सर्वात आधी अधिकृत संकेतस्थळ www.pmsuryaghar.gov.in वर जा. तिथे तुमचे राज्य, वीज वितरण कंपनीचे (DISCOM) नाव आणि ग्राहक क्रमांक (कंज्युमर नंबर) टाकून रजिस्ट्रेशन करा.
२. फॉर्म भरा: मोबाईल नंबर वापरून लॉगिन करा आणि ‘रूफटॉप सोलर’ या पर्यायावर जाऊन ऑनलाईन अर्ज सबमिट करा.
३. मंजुरी आणि इन्स्टॉलेशन: वीज कंपनीकडून मंजुरी मिळाल्यानंतर, पोर्टलवर दिलेल्या मान्यताप्राप्त विक्रेत्यांच्या (व्हेंडर्स) यादीतील एकाची निवड करून छतावर पॅनेल बसवून घ्या.
४. नेट मीटरिंग: काम पूर्ण झाल्यावर प्लांटचे फोटो आणि आवश्यक माहिती पोर्टलवर अपलोड करा आणि ‘नेट मीटर’ जोडणीसाठी अर्ज करा.
५. अंतिम तपासणी: वीज कंपनीचे अधिकारी तुमच्या घरी येऊन प्लांटची प्रत्यक्ष पाहणी करतील. सर्व सेटअप योग्य असल्यास नेट मीटर लावले जाईल आणि पोर्टलवर सर्टिफिकेट जारी होईल.
६. खात्यात पैसे जमा: शेवटी पोर्टलवर बँकेचे पासबुक किंवा कॅन्सल चेक अपलोड करा. हा शेवटचा टप्पा पूर्ण झाल्यानंतर अवघ्या 30 दिवसांच्या आत सबसिडीची संपूर्ण रक्कम थेट तुमच्या बँक खात्यात जमा केली जाते.
हे देखील वाचा – Vaibhav Sooryavanshi IPL Record: 15 वर्षांच्या पोराचा धमाका! ख्रिस गेलचा सर्वात मोठा रेकॉर्ड मोडत वैभव सूर्यवंशीने रचला इतिहास
