Arvind Kejriwal on Sonam Wangchuk: आम आदमी पार्टीचे राष्ट्रीय संयोजक आणि दिल्लीचे माजी मुख्यमंत्री अरविंद केजरीवाल यांनी देशाच्या शिक्षण व्यवस्थेवरून केंद्र सरकारवर जोरदार निशाणा साधला आहे. राष्ट्रीय परीक्षांमधील, विशेषतः वैद्यकीय प्रवेशासाठीच्या नीट (NEET) परीक्षेतील कथित घोटाळ्यांच्या विरोधात दिल्लीतील जंतरमंतर येथे गेल्या काही दिवसांपासून आंदोलन सुरू आहे.
केजरीवाल यांनी या आंदोलनस्थळाला भेट देऊन आंदोलकांचे नेतृत्व करणारे प्रसिद्ध पर्यावरणवादी आणि सामाजिक कार्यकर्ते सोनम वांगचुक यांची भेट घेतली.
या भेटीनंतर प्रसारमाध्यमांशी बोलताना आणि सोशल मीडियावर पोस्ट करताना केजरीवाल यांनी एक मोठी मागणी केली आहे. केंद्रीय शिक्षणमंत्री धर्मेंद्र प्रधान यांना त्यांच्या पदावरून तातडीने हटवण्यात यावे आणि त्यांच्या जागी सोनम वांगचुक यांची देशाचे नवीन शिक्षणमंत्री म्हणून नियुक्ती करण्यात यावी, असे केजरीवाल यांनी म्हटले आहे. या ठिकाणी बोलताना केजरीवाल यांना 4 एप्रिल 2011 रोजी झालेल्या अण्णा हजारे यांच्या भ्रष्टाचारविरोधी आंदोलनाची आठवण झाली. तत्कालीन सरकारने जनतेचा आवाज ऐकला नाही आणि अहंकारापोटी 3 वर्षांनंतर सत्ता गमावली, तशीच वेळ या सरकारवर येईल, असा इशाराही त्यांनी दिला.
२५ दिवसांपासून आंदोलन सुरू; सोनम वांगचुक यांच्या उपोषणाचा १९ वा दिवस
जंतरमंतर येथील आंदोलनाची तीव्रता दिवसेंदिवस वाढत चालली असून परिस्थिती गंभीर बनत आहे:
- सोनम वांगचुक यांचे उपोषण: विद्यार्थ्यांच्या हक्कासाठी सोनम वांगचुक यांनी 28 जूनपासून बेमुदत उपोषण सुरू केले आहे. आज त्यांच्या उपोषणाचा 19 वा दिवस आहे.
- दीर्घ आंदोलन: कॉकरोच जनता पार्टी या संघटनेच्या माध्यमातून गेल्या 25 दिवसांपेक्षा जास्त काळापासून जंतरमंतरवर हे आंदोलन सुरू असून शिक्षणमंत्र्यांच्या राजीनाम्याची मागणी केली जात आहे.
- चलो संसद मार्च: आगामी पावसाळी अधिवेशनाच्या पहिल्याच दिवशी म्हणजेच 20 जुलै रोजी आंदोलकांनी संसदेवर ‘चलो संसद’ मोर्चा काढण्याची घोषणा केली आहे.
वांगचुक यांची प्रकृती चिंताजनक; वजनात 9 किलोची घट
सलग 19 दिवस अन्नत्याग केल्यामुळे सोनम वांगचुक यांच्या प्रकृतीमध्ये मोठी घसरण झाली आहे. डॉक्टरांनी त्यांची प्रकृती चिंताजनक असल्याचे घोषित केले आहे.
- वजन घटले: उपोषणादरम्यान वांगचुक यांचे वजन 9 किलोग्रॅमपेक्षा जास्त घटले आहे.
- वैद्यकीय अहवाल: सध्या त्यांची ब्लड शुगर 80 mg/dL, नाडीचे ठोके दर मिनिटाला 72 आणि रक्तदाब (बीपी) बसलेल्या स्थितीत 101/65 mmHg तर झोपलेल्या स्थितीत 105/61 mmHg एवढा नोंदवला गेला आहे. त्यांच्या शरीरात यूरिक अॅसिडचे प्रमाण वाढले असून स्नायू कमकुवत होत असल्याचे डॉक्टरांनी सांगितले.
असे असले तरी, बुधवारी रात्री जारी केलेल्या एका व्हिडिओ संदेशात वांगचुक यांनी उपोषण सोडण्यास स्पष्ट नकार दिला आहे. माझ्या प्रकृतीला कोणताही तात्काळ धोका नाही, त्यामुळे समर्थकांनी मला उपोषण सोडण्याचा आग्रह न करता 20 जुलैच्या संसद मार्चच्या तयारीवर लक्ष केंद्रित करावे, असे आवाहन त्यांनी केले आहे.
न्यायालय आणि वकील संघटनेकडून उपोषण मागे घेण्याचे आवाहन
वांगचुक यांच्या खालावत जाणाऱ्या प्रकृतीमुळे सर्वोच्च न्यायालय बार असोसिएशनने (SCBA) एक ठराव मंजूर करून त्यांना उपोषण मागे घेण्याची विनंती केली आहे. असोसिएशनचे अध्यक्ष विकास सिंह यांनी स्वतः जंतरमंतरवर जाऊन वांगचुक यांना एक पत्र सुपूर्द केले. या बिघडलेल्या व्यवस्थेसाठी तुम्ही प्राण देण्याची गरज नाही, तर या व्यवस्थेशी लढण्यासाठी देशातील जनतेला तुम्ही जिवंत आणि सक्रिय हवे आहात, असे या पत्रात म्हटले आहे.
दुसऱ्या बाजूला, दिल्ली उच्च न्यायालयाने या प्रकरणाची दखल घेत प्रशासनाला महत्त्वाचे निर्देश दिले आहेत. सोनम वांगचुक यांच्या प्रकृतीची दररोज वैद्यकीय तपासणी करण्यात यावी आणि आवश्यकतेनुसार त्यांना तात्काळ वैद्यकीय उपचार पुरवले जावेत, असे न्यायालयाने म्हटले आहे. कोणत्याही नागरिकाचा जीव हा अत्यंत मौल्यवान आहे, असे नमूद करत केंद्र आणि दिल्ली सरकारनेही या वैद्यकीय देखरेखीच्या व्यवस्थेला न्यायालयात मान्यता दिली आहे.
