Brazil Hot Air Balloon Accident | ब्राझीलमध्ये एका हॉट-एअर बलूनला आकाशात आग लागल्याने 8 जणांचा मृत्यू झाल्याची भयानक घटना घडली आहे. ब्राझीलच्या सांता कॅटरीना राज्यातील Praia Grande येथे ही घटना घडली.
आग लागून हॉट-एअर बलून कोसळल्याने 8 जणांचा मृत्यू झाला, तर 13 जण जखमी झाले.सांता कॅटरीना लष्करी अग्निशमन दलाने या घटनेची पुष्टी केली आहे.
अपघात कसा घडला?
लष्करी अग्निशमन दलाच्या माहितीनुसार, हॉट-एअर बलूनमध्ये पायलटसह 21 प्रवासी होते. सकाळच्या सुमारास बलूनला अचानक आग लागली आणि तो धूर सोडत जमिनीकडे कोसळला. व्हायरल फुटेजमध्ये बलून हवेत असताना आग लागल्याचे दिसत आहे. बचावलेल्या 13 प्रवाशांना तातडीने जवळच्या रुग्णालयात दाखल करण्यात आले आहे. कोणतीही व्यक्ती बेपत्ता नसल्याची खात्री अधिकाऱ्यांनी केली आहे.
आगीचे नेमके कारण अद्याप अस्पष्ट आहे. याबाबत तपास सुरू असून, बलूनच्या तांत्रिक क्षमतेसह उड्डाण सुरक्षिततेच्या नियमांचा आढावा घेतला जाणार आहे.
Praia Grande आणि बलूनिंगची लोकप्रियता
Praia Grande हे हॉट-एअर बलूनिंगसाठी प्रसिद्ध पर्यटन स्थळ आहे. विशेषतः जून महिन्यात सेंट जॉनसारख्या कॅथोलिक संतांच्या सणांदरम्यान येथे बलून उड्डाणांचे मोठे आयोजन होते. या अपघाताने या लोकप्रिय पर्यटक आकर्षणाच्या सुरक्षिततेवर प्रश्नचिन्ह उपस्थित केले आहे.
अधिकाऱ्यांनी या अपघाताच्या कारणांचा तपास सुरू केला आहे. बलूनच्या तांत्रिक बिघाडापासून ते मानवी चुकांपर्यंत सर्व शक्यतांचा विचार केला जात आहे. हॉट-एअर बलूनिंगच्या सुरक्षितता नियमांवरही यानिमित्ताने चर्चा होण्याची शक्यता आहे.
