Pulitzer Prize: पत्रकारिता क्षेत्रातील अत्यंत मानाचा समजला जाणारा ‘पुलित्झर पुरस्कार’ (Pulitzer Prize) यंदा दोन भारतीय पत्रकारांनी पटकावला आहे. आनंद आर.के. आणि सुपर्णा शर्मा या भारतीय पत्रकारांना त्यांच्या उत्कृष्ट वृत्तांकनासाठी हा गौरव प्राप्त झाला आहे. सायबर फसवणूक आणि डिजिटल पाळत ठेवण्याच्या वाढत्या धोक्यांवर त्यांनी केलेले काम जागतिक स्तरावर वाखाणले गेले आहे.
‘trAPPed’ मालिकेसाठी मिळाला सन्मान
आनंद आणि सुपर्णा यांनी ‘ब्लूमबर्ग’साठी तयार केलेल्या “trAPPed” या विशेष मालिकेसाठी हा पुरस्कार जिंकला आहे. त्यांनी हा बहुमान नॅटली ओबिको पिअरसन यांच्यासोबत विभागून घेतला आहे. ‘इलस्ट्रेटेड रिपोर्टिंग आणि कमेंटरी’ या श्रेणीमध्ये त्यांना हा पुरस्कार जाहीर करण्यात आला आहे. या मालिकेमध्ये चित्रे आणि शब्दांचा प्रभावी वापर करून सायबर गुन्ह्यांचे भयानक वास्तव जगासमोर मांडण्यात आले आहे.
‘डिजिटल अरेस्ट’ची थरारक कहाणी
पुरस्कारासाठी निवडण्यात आलेल्या वृत्तांकनामध्ये भारतातील एका न्यूरोलॉजिस्टची (मज्जातज्ज्ञ) हृदयद्रावक कथा सांगण्यात आली आहे. या डॉक्टरला त्यांच्या फोनद्वारे ‘डिजिटल अरेस्ट’मध्ये कसे ठेवण्यात आले आणि सायबर गुन्हेगारांनी त्यांचे मानसिक शोषण कसे केले, याचे सविस्तर चित्रण यात करण्यात आले आहे. जागतिक स्तरावर डिजिटल फसवणुकीचे आव्हान किती मोठे होत आहे, हे या मालिकेतून अधोरेखित होते.
पत्रकारितेतील सर्वोच्च बहुमान
कोलंबिया विद्यापीठातर्फे दिले जाणारे पुलित्झर पुरस्कार हे पत्रकारिता, साहित्य आणि संगीत या क्षेत्रातील सर्वोच्च सन्मान मानले जातात. उत्कृष्ट रिपोर्टिंग आणि प्रभावी कथाकथनासाठी हे पुरस्कार दिले जातात. भारतीय पत्रकारांनी मिळवलेल्या या यशामुळे आंतरराष्ट्रीय स्तरावर भारतीय पत्रकारितेचा दबदबा पुन्हा एकदा सिद्ध झाला आहे.
हे देखील वाचा –
West Bengal CM Race: बंगालमध्ये भाजपचा ऐतिहासिक विजय! आता मुख्यमंत्री कोण? ‘या’ नावांची जोरदार चर्चा
