PM Modi Convoy: जागतिक स्तरावरील वाढता तणाव आणि इंधनाच्या वाढत्या किमती लक्षात घेता पंतप्रधान नरेंद्र मोदी यांनी काटकसरीचे मोठे उदाहरण देशासमोर ठेवले आहे. मोदींनी स्वतःच्या अधिकृत ताफ्यातील गाड्यांची संख्या थेट ५० टक्क्यांनी कमी करण्याचे आदेश दिले आहेत. केंद्राच्या या निर्णयामुळे आता सरकारी खर्चात मोठी कपात होण्याचे संकेत मिळाले आहेत.
PM Modi Convoy: स्वतःपासून केली सुरुवात
पंतप्रधानांच्या सुरक्षेची जबाबदारी असलेल्या एसपीजी (SPG) दलाला मोदींनी ताफ्यातील वाहने निम्मी करण्याच्या सूचना दिल्या आहेत. नवीन वाहनांची खरेदी टाळून ताफ्यात असलेल्या इलेक्ट्रिक वाहनांचा वापर वाढवण्यासही त्यांनी सांगितले आहे.
विशेष म्हणजे, सुरक्षा नियमावलीशी कोणतीही तडजोड न करता ही कपात अंमलात आणली जात आहे. दिल्लीबाहेरच्या अलीकडील दौऱ्यांमध्ये पंतप्रधानांचा ताफा पूर्वीपेक्षा बराच छोटा दिसल्याचे सूत्रांनी सांगितले.
PM Modi Convoy: मुख्यमंत्र्यांकडूनही निर्णयाचे स्वागत
पंतप्रधानांच्या या पावलावर पाऊल ठेवत अनेक राज्यांच्या मुख्यमंत्र्यांनीही आपल्या ताफ्यात कपात केली आहे:
- उत्तर प्रदेश: मुख्यमंत्री योगी आदित्यनाथ यांनी मंत्र्यांच्या ताफ्यातील गाड्या ५० टक्क्यांनी कमी करण्याचे आदेश दिले आहेत. तसेच वर्क फ्रॉम होम आणि व्हर्च्युअल मीटिंगवर भर दिला आहे.
- मध्य प्रदेश: मुख्यमंत्री मोहन यादव यांनी आपल्या ताफ्यातील गाड्यांची संख्या १३ वरून ८ वर आणली आहे.
- केंद्रीय मंत्री: रामदास आठवले यांनी मुंबईत मेट्रोने प्रवास करून इंधन बचतीचा संदेश दिला, तर युपीचे मंत्री दिनेश खटीक यांनी एस्कॉर्ट गाड्या सोडून दुचाकीवरून जिल्हा दौरा सुरू केला आहे.
PM Modi Convoy: अनावश्यक खर्चाला कात्री
सरकारी विभागांमध्ये आता इंधन बचतीसाठी मेट्रोनं प्रवास करणे, कारपुलिंगचा वापर करणे आणि अनावश्यक विमान प्रवास टाळण्यावर चर्चा सुरू आहे. परकीय चलन साठा टिकवण्यासाठी पंतप्रधानांनी यापूर्वीच देशवासीयांना सोन्याची खरेदी लांबणीवर टाकण्याचे आणि सार्वजनिक वाहतुकीचा वापर करण्याचे आवाहन केले होते.
पंतप्रधानांच्या या निर्णयामुळे सरकारी यंत्रणेत काटकसरीचे नवे पर्व सुरू झाले असून, याचा सकारात्मक परिणाम अर्थव्यवस्थेवर होईल, अशी अपेक्षा व्यक्त केली जात आहे.
हे देखील वाचा – NEET-UG 2026 Re-exam Date: पेपरफुटीच्या आरोपानंतर NEET परीक्षा पुन्हा कधी होणार? NTA ने दिली माहिती
