NEET-UG 2026 Re-exam Date: वैद्यकीय प्रवेशासाठी अत्यंत महत्त्वाची असलेली ‘नीट’ (NEET-UG 2026) परीक्षा अखेर रद्द करण्यात आली आहे. ३ मे रोजी झालेला हा पेपर फुटल्याच्या गंभीर आरोपानंतर नॅशनल टेस्टिंग एजन्सीने (NTA) ही घोषणा केली. या प्रकरणाचा तपास आता सीबीआयकडे (CBI) सोपवण्यात आला असून, दोषींवर कडक कारवाई करण्याचे आश्वासन सरकारने दिले आहे.
पुनर्परीक्षेचे वेळापत्रक कधी येणार?
NTA चे महासंचालक अभिषेक सिंह यांनी सांगितले की, विद्यार्थ्यांचे शैक्षणिक वर्ष वाया जाऊ नये यासाठी आम्ही लवकरात लवकर परीक्षा घेण्याचा प्रयत्न करत आहोत.
- वेळापत्रक: पुढील ७ ते १० दिवसांत परीक्षेच्या नवीन तारखा आणि पूर्ण वेळापत्रक जाहीर केले जाईल.
- परीक्षा शुल्क: पुनर्परीक्षेसाठी विद्यार्थ्यांकडून कोणतेही अतिरिक्त शुल्क घेतले जाणार नाही. यापूर्वी भरलेले शुल्क विद्यार्थ्यांना परत केले जाणार असल्याचेही सिंह यांनी स्पष्ट केले.
पेपरफुटीबाबत मोठा खुलासा
अभिषेक सिंह यांनी या घटनेची जबाबदारी स्वीकारताना सांगितले की, परीक्षेपूर्वी पीडीएफ (PDF) स्वरूपात काही प्रश्न विद्यार्थ्यांमध्ये फिरत होते. त्यातील काही प्रश्न प्रत्यक्ष प्रश्नपत्रिकेशी मिळतेजुळते आढळल्याने, परीक्षेची पारदर्शकता टिकवण्यासाठी हा निर्णय घेण्यात आला. जरी संपूर्ण पेपर फुटला नसला तरी, एक प्रश्न जरी मॅच झाला तरी ती आमच्या ‘झिरो टॉलरन्स’ धोरणाचे उल्लंघन आहे, असे त्यांनी नमूद केले.
विद्यार्थी आणि पालकांना दिलासा
या घटनेमुळे देशभरातील सुमारे २३ लाख विद्यार्थ्यांचे भविष्य टांगणीला लागले आहे. ३ मे रोजी भारतातील ५५१ शहरांमध्ये आणि परदेशातील १४ शहरांमध्ये ही परीक्षा पार पडली होती. “हे विद्यार्थ्यांसाठी आणि त्यांच्या पालकांसाठी अत्यंत त्रासदायक आहे याची आम्हाला जाणीव आहे. आम्ही संपूर्ण प्रक्रियेची जबाबदारी स्वीकारतो आणि भविष्यात अशा घटना पुन्हा होणार नाहीत, याची खात्री देतो,” असे आश्वासन NTA कडून देण्यात आले आहे.
फसवणुकीपासून सावध राहा!
काही समाजकंटक पेपर देण्याच्या नावाखाली विद्यार्थ्यांकडून ओटीपी (OTP) मागवून बँक खाती रिकामी करत असल्याचे प्रकार समोर आले आहेत. अशा लोकांपासून सावध राहण्याचे आवाहन करण्यात आले असून, चुकीच्या मार्गाने पेपर विकणाऱ्यांवर कडक कारवाई केली जाईल, असेही प्रशासनाने स्पष्ट केले आहे.
