TMC Politics: पश्चिम बंगालच्या विधानसभा निवडणुकीत सुवेंदू अधिकारी यांच्याकडून पराभूत झाल्यानंतर, मुख्यमंत्री ममता बॅनर्जी यांना संसदेत पाठवण्यासाठी तृणमूल काँग्रेस (TMC) नव्या मार्गांचा शोध घेत असल्याच्या चर्चांना उधाण आले आहे. याच दरम्यान एका वृत्तपत्राने प्रसिद्ध केलेल्या बातमीमुळे राज्यातील राजकीय वातावरण कमालीचे तापले होते.
या बातमीनुसार, माजी क्रिकेटपटू यूसुफ पठाण याला खासदारकीचा राजीनामा देण्यास सांगण्यासाठी टीएमसीने चक्क भारतीय क्रिकेट संघाचा माजी कर्णधार सौरव गांगुली याची मध्यस्थ म्हणून मदत घेतली होती. या खळबळजनक दाव्यानंतर आता स्वतः सौरव गांगुलीने समोर येत यावर आपले मौन सोडले आहे आणि सत्याचा खुलासा केला आहे.
काय होता तो गाजलेला ‘बहरामपूर’ प्लॅन?
सोशल मीडिया आणि राजकीय वर्तुळात व्हायरल झालेल्या त्या अहवालात नेमका काय दावा करण्यात आला होता, त्याचे तपशील खालीलप्रमाणे आहेत:
- सुरक्षित जागेचा शोध: वर्ष 2024 च्या निवडणुकीत यूसुफ पठाण याने काँग्रेसचे ज्येष्ठ नेते अधीर रंजन चौधरी यांचा पराभव करून बहरामपूर जागा जिंकली होती. या मतदारसंघात सुमारे 50 ते 52% मुस्लिम मतदार असल्याने ही जागा ममता बॅनर्जी यांच्यासाठी सर्वात सुरक्षित मानली जात होती.
- गांगुलीकडे जबाबदारी?: यूसुफ पठाण आणि सौरव गांगुली हे आयपीएलमध्ये कोलकाता नाईट रायडर्स (KKR) संघात एकत्र खेळले आहेत. त्यामुळे गांगुलीच्या माध्यमातून पठाणला खासदारकी सोडण्यास राजी करावे, असा प्लॅन पक्षाने आखल्याचे वृत्तपत्रात म्हटले होते.
- पठाणचा नकार: या अहवालात असाही दावा केला गेला होता की, जेव्हा असा प्रस्ताव यूसुफ पठाणसमोर ठेवण्यात आला, तेव्हा त्याने त्याला साफ नकार दिला.
सौरव गांगुलीने सोडले मौन
या संपूर्ण प्रकरणावर तीव्र आक्षेप घेत सौरव गांगुलीने शनिवारी एक सविस्तर पत्रक जारी केले असून हे सर्व दावे पूर्णपणे खोटे आणि कपोलकल्पित असल्याचे म्हटले आहे.
गांगुलीने स्पष्ट केले की, त्याचा राजकारणाशी कधीही संबंध आलेला नाही आणि प्रसारमाध्यमांनी कोणतीही शहानिशा न करता अशा बातम्या प्रसिद्ध करू नयेत. “माझ्या नावाचा वापर करून जे काही आरोप केले जात आहेत, त्यात सत्याचा अंशही नाही. ममता बॅनर्जी यांनी मला यूसुफ पठाण यांच्याकडे कोणताही निरोप घेऊन जाण्यास सांगितले नव्हते. तसेच मी या विषयावर पठाण यांच्याशी साधा संपर्कही साधलेला नाही. त्यामुळे त्यांनी नकार देण्याचा प्रश्नच उद्भवत नाही,” अशा कडक शब्दांत गांगुलीने ही अफवा फेटाळून लावली.
TMC मध्ये अंतर्गत बंडाची टांगती तलवार
हा वाद अशा वेळी समोर आला आहे जेव्हा तृणमूल काँग्रेसच्या संसदीय गोटात मोठ्या बंडाची तयारी सुरू असल्याची कुजबूज आहे. सूत्रांनुसार, पक्षाचे बंडखोर नेते रितब्रत बॅनर्जी यांच्या संपर्कात टीएमसीचे तब्बल 23 खासदार आहेत. पक्षातील ही अंतर्गत धुसफूस थांबवण्यासाठी आणि आगामी रणनीती ठरवण्यासाठी ममता बॅनर्जी आणि त्यांचे पुतणे अभिषेक बॅनर्जी ८ जून रोजी दिल्लीला रवाना होणार आहेत.
तिथे ते ‘इंडिया’ (INDIA) आघाडीच्या महत्त्वाच्या बैठकीला उपस्थित राहून नाराज खासदारांची मनधरणी करण्याचा प्रयत्न करतील. आता सौरव गांगुलीच्या या स्पष्टीकरणानंतर बंगालमधील या राजकीय नाट्याला कोणते नवीन वळण मिळते, हे पाहणे महत्त्वाचे ठरेल.
हे देखील वाचा – LPG Price Hike: सर्वसामान्यांना महागाईचा मोठा झटका! घरगुती गॅस सिलिंडरच्या किमतीत पुन्हा वाढ; पाहा नवीन दर
