FIFA World Cup 2026: फिफा विश्वचषक 2026 मध्ये साखळी फेरीचे सामने आता अंतिम टप्प्यात आले आहेत. ४८ संघांचा हा वर्ल्ड कप कंटाळवाणा होईल आणि सामने एकतर्फी होतील, अशी शंका घेणाऱ्यांना छोट्या देशांच्या खेळाडूंनी मैदानावर आपल्या कामगिरीने चोख उत्तर दिले आहे. अमेरिका, कॅनडा आणि मेक्सिकोमध्ये सुरू असलेल्या या स्पर्धेत केप व्हर्डे, कुराकाओ आणि इराणसारख्या देशांच्या गोलकीपर्सनी अप्रतिम खेळ केला आहे.
या सगळ्यात सर्वात मोठी चर्चा रंगली आहे ती इराणचा ६ फूट ४ इंच उंचीचा गोलकीपर अलिरेझा बैरणवंद याची. फिफा रँकिंगमध्ये जगातील ९ व्या क्रमांकावर असलेल्या बलाढ्य बेल्जियमविरुद्ध इराणने 0-0 अशी ऐतिहासिक बरोबरी साधली.
या सामन्यात अलिरेझाने तब्बल ७ गोल रोखत ‘प्लेअर ऑफ द मॅच’चा किताब पटकावला. मात्र, मैदानावरील या यशापेक्षा अलिरेझाचा इथपर्यंत पोहोचण्याचा संघर्ष चित्रपटालाही मागे पाडणारा आहे.
वडिलांचा विरोध, गरिबी आणि रस्त्यावरील आयुष्य; असा होता अलिरेझाचा प्रवास
अलिरेझा बैरणवंदचा हा प्रवास अत्यंत खडतर आणि प्रेरणादायी राहिला आहे:
- घरून पळ काढला: इराणच्या लोरेस्तानमधील एका गरीब भटक्या कुटुंबात अलिरेझाचा जन्म झाला. घरात कमालीची गरिबी होती आणि वडिलांचा फुटबॉल खेळण्याला तीव्र विरोध होता. फुटबॉल खेळण्यासाठी लागणारे ग्लोव्हज खरेदी करणेही कुटुंबाला परवडणारे नव्हते. अखेर स्वप्न पूर्ण करण्यासाठी तो किशोरवयातच घर सोडून तेहरानला जाणाऱ्या बसमध्ये बसला.
- रस्त्यावर काढल्या रात्री: तेहरानमध्ये आल्यावर त्याच्याकडे राहण्यासाठी घर नव्हते की ओळखीचे कोणी. तो कित्येक महिने स्थानिक फुटबॉल क्लबच्या बाहेर रस्त्यावरच झोपायचा.
- पोटासाठी केली धुणीभांडी: जगण्यासाठी आणि जेवणाचा खर्च भागवण्यासाठी त्याने रस्त्यावर झाडू मारला, कार वॉशमध्ये गाड्या धुतल्या, कपड्यांच्या कारखान्यात मजूर म्हणून काम केले आणि रात्रीच्या वेळी पिझ्झा शॉपमध्ये पीठ मळण्याचेही काम केले.
मेंढ्या राखता राखता बनवले 2 गिनीज वर्ल्ड रेकॉर्ड
अलिरेझा लहान असताना डोंगराळ भागात मेंढ्यांचे रक्षण करण्यासाठी जड दगड लांब अंतरावर फेकण्याचा ‘दालपरान’ नावाचा स्थानिक खेळ खेळायचा. या खेळामुळे त्याच्या हाताचे स्नायू प्रचंड मजबूत झाले, ज्याचा फायदा त्याला फुटबॉलमध्ये झाला. आज त्याच्या नावावर फुटबॉल जगतातील २ अधिकृत ‘गिनीज वर्ल्ड रेकॉर्ड’ आहेत:
१. फुटबॉलमधील सर्वात लांब थ्रो: ऑक्टोबर 2016 मध्ये दक्षिण कोरियाविरुद्धच्या सामन्यात त्याने हाताने बॉल तब्बल 200.14 फूट (61.002 मीटर) दूर फेकून पहिला जागतिक विक्रम केला होता.
२. इतिहासातील सर्वात लांब ड्रॉप कीक: त्याने पायाने मारलेली ड्रॉप कीक तब्बल 255.95 फूट (78.014 मीटर) मोजली गेली आहे, जो दुसरा जागतिक विक्रम आहे.
व्हिसाची समस्या आणि मेक्सिकोत कॅम्प; इराणचा मोठा चमत्कार
इराणच्या संघासाठी हा विश्वचषक केवळ मैदानावरच नाही, तर मैदानाबाहेरही एका मोठ्या प्रशासकीय युद्धासारखा आहे. राजकीय तणाव आणि व्हिसाच्या कडक नियमांमुळे इराणच्या संघाला अमेरिकेत स्वतःचा सराव कॅम्प उभारता आला नाही. इतर संघांना आलिशान सुविधा मिळत असताना इराणच्या खेळाडूंना मेक्सिकोच्या सीमेवर कॅम्प लावावा लागला आहे.
सामन्याच्या अवघ्या २४ तास आधी खेळाडूंना अमेरिकेत प्रवेश करण्याची परवानगी मिळते. अशा प्रवासाच्या थकव्यानंतर आणि मानसिक दडपणाखाली खेळताना बेल्जियमसारख्या बलाढ्य संघाला एकाही गोलशिवाय रोखणे हा फुटबॉल इतिहासातील एक चमत्कार मानला जात आहे. २ सामन्यांत २ गुणांसह इराणने या जागतिक स्पर्धेतील आपले आव्हान अजूनही जिवंत ठेवले आहे.
हे देखील वाचा – Sanjay Raut Target Rebels: “तुमच्या हिंमत असेल तर …”; बंडखोर खासदारांवर संजय राऊतांचा घणाघात
