FIFA World Cup 2026 Prize Money: फिफा विश्वचषक 2026 च्या थरारक अंतिम सामन्यात अर्जेंटिनाचा पराभव करत स्पेनने ऐतिहासिक विजेतेपद पटकावले आहे. या विजयासह स्पेनने केवळ सोन्याची ट्रॉफीच आपल्या नावावर केली नाही, तर फुटबॉल इतिहासातील आजवरची सर्वात मोठी बक्षीस रक्कमही घरी नेली आहे. यंदाच्या महाकुंभासाठी फिफाने आपले बजेट लक्षणीयरीत्या वाढवले होते, ज्याचा मोठा फायदा सहभागी देशांना झाला आहे.
अमेरिकेच्या मेटलाइफ स्टेडियमवर खेळवल्या गेलेल्या अंतिम सामन्यात स्पेनने लायोनेल मेस्सीच्या अर्जेंटिनाला अतिरिक्त वेळेत 1-0 ने धूळ चारली. उपविजेत्या ठरलेल्या अर्जेंटिनालाही अंतिम सामन्यातील पराभवानंतर मोठी रक्कम मिळाली आहे. या संपूर्ण स्पर्धेत पैशांचे वाटप कसे झाले आणि कोणत्या संघाला किती निधी मिळाला, याचे सविस्तर गणित समोर आले आहे.
2022 च्या तुलनेत यंदा बजेटमध्ये प्रचंड वाढ; एकूण 652 दशलक्ष डॉलर्सचा खजिना
फिफाने यंदा बक्षीस रकमेचे जुने सर्व रेकॉर्ड मोडीत काढले आहेत. २०२२ मध्ये कतार येथे झालेल्या विश्वचषकात एकूण बक्षीस रक्कम 440 दशलक्ष डॉलर्स (सुमारे 380 दशलक्ष पाउंड) इतकी होती.
या वर्षी म्हणजेच 2026 च्या विश्वचषकात हा निधी थेट 652 दशलक्ष डॉलर्स (सुमारे 493 दशलक्ष पाउंड) वर पोहोचला आहे. या स्पर्धेत सहभागी झालेल्या एकूण 48 देशांना ते कोणत्या टप्प्यापर्यंत पोहोचले, त्यानुसार निश्चित रक्कम देण्यात आली आहे. हा निधी पुढील फेऱ्यांमध्ये एकत्रित (क्युम्युलेटिव्ह) न जोडता प्रत्येक टप्प्यासाठी स्वतंत्रपणे निश्चित करण्यात आला होता.
विजेत्या स्पेनला किती मिळाले? पाहा प्रत्येक फेरीनिहाय रकमेचे वाटप
स्पर्धेत सहभागी झालेल्या आणि वेगवेगळ्या फेऱ्या गाठणाऱ्या संघांना मिळालेल्या रकमेचा अधिकृत तपशील खालीलप्रमाणे आहे:
- विजेता संघ (स्पेन – 1 संघ): विश्वविजेत्या स्पेनला तब्बल 50 दशलक्ष डॉलर्स (सुमारे 38 दशलक्ष पाउंड) इतकी घसघशीत रक्कम मिळाली आहे.
- उपविजेता संघ (अर्जेंटिना – 1 संघ): अंतिम सामन्यात पराभूत झालेल्या अर्जेंटिनाला 35 दशलक्ष डॉलर्स (सुमारे 26 दशलक्ष पाउंड) देण्यात आले आहेत.
- तिसरे स्थान (1 संघ): तिसऱ्या क्रमांकावर राहिलेल्या संघाला 32 दशलक्ष डॉलर्स (सुमारे 24 दशलक्ष पाउंड) मिळाले.
- चौथे स्थान (1 संघ): चौथ्या स्थानावरील संघाला 30 दशलक्ष डॉलर्स (सुमारे 23 दशलक्ष पाउंड) देण्यात आले.
ग्रुप स्टेज आणि इतर बाद फेऱ्यांमधील बक्षिसांचे गणित
उपांत्यपूर्व आणि सुरुवातीच्या टप्प्यात बाहेर पडलेल्या संघांनाही फिफाकडून मोठी रक्कम मिळाली आहे:
- क्वार्टर-फायनल (4 संघ): या टप्प्यात पोहोचलेल्या प्रत्येक संघाला 17 दशलक्ष डॉलर्स (एकूण 68 दशलक्ष डॉलर्स) मिळाले.
- राउंड ऑफ 16 (8 संघ): अंतिम 16 मध्ये पोहोचलेल्या प्रत्येक संघाला 15 दशलक्ष डॉलर्स (एकूण 120 दशलक्ष डॉलर्स) देण्यात आले.
- राउंड ऑफ 32 (16 संघ): या फेरीत स्थान मिळवणाऱ्या प्रत्येक संघाला 13 दशलक्ष डॉलर्स (एकूण 208 दशलक्ष डॉलर्स) मिळाले.
- ग्रुप स्टेज (16 संघ): सुरुवातीच्या ग्रुप स्टेजमधून बाहेर पडलेल्या प्रत्येक संघालाही रिकाम्या हाताने परतावे लागले नाही; त्यांना प्रत्येकी 9 दशलक्ष डॉलर्स (एकूण 144 दशलक्ष डॉलर्स) देण्यात आले.
फिफाच्या या ऐतिहासिक बक्षीस वितरणामुळे यंदाचा विश्वचषक खेळाडू आणि त्यांच्या देशांच्या फुटबॉल बोर्डासाठी आर्थिकदृष्ट्या कमालीचा यशस्वी ठरला आहे.
