Spain FIFA World Cup Winner: फुटबॉल जगतातील सर्वात मोठ्या महाकुंभाचा अंतिम सामना अखेर संपला असून स्पेनने पुन्हा एकदा जागतिक फुटबॉलच्या शिखरावर झेप घेतली आहे. एका अत्यंत चुरशीच्या आणि अटीतटीच्या सामन्यात स्पेनने गतविजेत्या अर्जेंटिनाचा 1-0 असा पराभव करत फिफा विश्वचषक 2026 च्या ट्रॉफीवर आपले नाव कोरले. सामन्यात बदली खेळाडू म्हणून मैदानात आलेल्या फेरान टॉरेसने 106 व्या मिनिटाला गोल करून स्पेनला ऐतिहासिक विजय मिळवून दिला.
हा सामना फुटबॉल इतिहासातील सर्वात संथ आणि तणावपूर्ण फायनलपैकी एक ठरला. दोन्ही बलाढ्य संघांमध्ये 90 मिनिटांपर्यंत एकही गोल होऊ शकला नाही. सामना पेनल्टी शूटआऊटकडे सरकत असतानाच टॉरेसने स्पेनसाठी 20 व्या प्रयत्नात गोलचा डेडलॉक तोडला. या विजयानंतर मैदानात प्रचंड राडा पाहायला मिळाला, जिथे अर्जेंटिनाच्या खेळाडूंचा संयम सुटल्याने खेळाडूंमध्ये हाणामारी आणि ढकलाढकली सुरू झाली.
मेस्सी आणि लॅमिन यामल फिके पडले; बदली खेळाडूंनी फिरवला सामना
या ऐतिहासिक सामन्यात दोन्ही संघांच्या प्रमुख स्टार्सची जादू चालली नाही. सामन्याचे प्रमुख विश्लेषण खालीलप्रमाणे आहे:
- मेस्सीचे अपयश: ब्राझीलचे महान खेळाडू कॅफू यांच्यानंतर 3 विश्वचषक फायनल खेळणारा लायोनेल मेस्सी जगातील दुसरा खेळाडू ठरला. मात्र, या सामन्यात तो पूर्णपणे फिका पडला आणि आपल्या संघाला विजय मिळवून देण्यात अपयशी ठरला.
- लॅमिन यामल शांत: स्पेनचा युवा स्टार लॅमिन यामल यालाही अर्जेंटिनाच्या बचावात्मक फळीने पूर्णपणे बांधून ठेवले होते.
- बदली खेळाडू ठरले हिरो: दोन्ही मुख्य खेळाडू चमकले नसले तरी स्पेनचे बदली खेळाडू फेरान टॉरेस आणि निको विल्यम्स यांनी उत्तरार्धात मैदानात वेगवान ऊर्जा आणली आणि सामना स्पेनच्या बाजूने झुकवला.
- सर्वात वयस्कर प्रशिक्षक: स्पेनचे मुख्य प्रशिक्षक लुईस डी ला फुएंटे यांनी वयाच्या 65 व्या वर्षी हा विश्वचषक जिंकून इतिहास रचला आहे. विश्वचषक जिंकणारे ते इतिहासातील सर्वात वयस्कर प्रशिक्षक बनले आहेत.
अर्जेंटिनाचा लाजीरवाणा रेकॉर्ड; ९0 मिनिटांत एकही शॉट नाही
या सामन्यात अर्जेंटिनाचा संघ बचावात्मक आणि आक्रमक पवित्र्यात खेळण्याऐवजी केवळ फाऊल करण्यात व्यस्त दिसला.
१. शॉट-शाय अर्जेंटिना: विश्वचषक फायनलच्या इतिहासात पहिल्यांदाच असा विक्रम झाला, जिथे अर्जेंटिनाचा संघ संपूर्ण 90 मिनिटांत गोलच्या दिशेने एकही शॉट (टार्गेटवर किंवा टार्गेटबाहेर) मारू शकला नाही. फिफाच्या अधिकृत आकडेवारीनुसार त्यांनी नंतर केवळ 2 जुजबी प्रयत्न केले.
२. रेड कार्डचा फटका: अर्जेंटिनाचे खेळाडू सतत जर्सी ओढणे आणि धक्के मारण्यात व्यस्त होते. अखेर भरपाई वेळेत पॉऊ कुबार्सीला चुकीच्या पद्धतीने पाडल्यामुळे अर्जेंटिनाच्या एन्झो फर्नांडिसला रेड कार्ड दाखवून मैदानातून बाहेर काढण्यात आले.
३. व्हीआयपी बॉक्समध्ये उपस्थिती: अमेरिकेत सुरू असलेल्या या महामुकाबल्याचा आनंद घेण्यासाठी अमेरिकेचे राष्ट्राध्यक्ष डोनाल्ड ट्रम्प आणि फिफा प्रमुख गियानी इन्फँटिनो व्हीआयपी बॉक्समध्ये एकत्र उपस्थित होते.
शकिरा आणि मडोनाचा डान्स ठरला फुटबॉलपेक्षा मनोरंजक!
सामन्याचा पूर्वार्ध इतका संथ होता की फुटबॉलपेक्षा हाफटाईममधील मनोरंजनच चाहत्यांच्या लक्षात राहिले. हाफटाईम शोमध्ये मडोना, ज्युस्टिन बीबर आणि प्रसिद्ध काल्पनिक प्रशिक्षक टेड लॅसो यांनी उपस्थिती लावली होती. शकिराने तिच्या प्रसिद्ध गाण्यांवर परफॉर्मन्स दिला.
मैदानातील मोठ्या स्क्रीनवर ‘डायनामाइट’ आणि ‘लाईट इट अप’ असे शब्द चमकत होते, पण मैदानातील दोन्ही संघ मात्र शांत होते. सामान्यतः 15 मिनिटांचा असणारा हा हाफटाईम ब्रेक गाणी, नृत्य आणि फटाक्यांच्या आतषबाजीमुळे दुप्पट वेळेचा झाला, तरीही खेळाच्या वेगात कोणताही बदल झाला नाही. मात्र, या संथ खेळानंतरही स्पेनच्या संघाने अखेर बाजी मारत विश्वविजेतेपदावर कब्जा केला.
