ZIM vs IND T20 Series 2026: भारतीय टी२० संघाचा नवा कर्णधार म्हणून जबाबदारी स्वीकारल्यानंतर श्रेयस अय्यर आजपासून सुरू होणाऱ्या तीन सामन्यांच्या टी२० मालिकेत आपल्या पहिल्या विजयासाठी मैदानात उतरेल. भारत आणि झिम्बाब्वे यांच्यातील ही टी२० मालिका हरारे येथे खेळवली जाणार आहे.
आयर्लंडविरुद्ध २-० अशी हार आणि त्यानंतर इंग्लंडविरुद्ध ४-० अशा पराभवानंतर भारतीय संघ सध्या आपल्या टी२० इतिहासातील सर्वात मोठ्या विजयहीन टप्प्यातून जात आहे. त्यामुळे या मालिकेत विजय मिळवून पुनरागमन करण्याचा भारतीय संघाचा मानस असेल.
संघात मोठे बदल; नव्या चेहऱ्यांना संधी अन् संजू सॅमसन बाहेर
भारतीय क्रिकेट नियामक मंडळाने (BCCI) या मालिकेसाठी १५ सदस्यांचा एक नवीन संघ जाहीर केला आहे:
- नव्या खेळाडूंची एन्ट्री: यष्टीरक्षक फलंदाज प्रभसिमरन सिंग, वेगवान गोलंदाज यश ठाकूर आणि अशोक शर्मा यांना प्रथमच भारतीय टी२० संघात स्थान मिळाले आहे. अष्टपैलू हर्ष दुबेलाही संघात बोलावण्यात आले आहे.
- दिग्गजांना विश्रांती व डच्चू: टी२० विश्वचषक विजयात महत्त्वाची भूमिका बजावणाऱ्या संजू सॅमसनला खराब फॉर्ममुळे संघातून वगळण्यात आले आहे. याशिवाय अक्षर पटेल, अर्शदीप सिंग आणि हर्षित राणा यांनाही विश्रांती देण्यात आली आहे.
- युवा सनसनाटी वैभव सूर्यवंशी: केवळ १५ वर्षांचा युवा फलंदाज वैभव सूर्यवंशी संघात आपले स्थान टिकवून आहे. याच हरारे मैदानावर त्याने अंडर-19 विश्वचषक फायनलमध्ये 80 चेंडूत 175 धावांची तुफानी खेळी केली होती.
- पुनरागमन: रिंकू सिंग आणि वेगवान गोलंदाज मयांक यादव संघात परतले आहेत. जखमी वरुण चक्रवर्तीच्या जागी फिरकीपटू रवी बिश्नोईचा संघात समावेश करण्यात आला आहे.
आमनेसामने आकडेवारी आणि थेट प्रक्षेपण कुठे पाहायचे?
टी२० प्रकारात भारतीय संघाचे पारडे झिम्बाब्वेविरुद्ध नेहमीच जड राहिले आहे. आतापर्यंत खेळवलेल्या १४ सामन्यांपैकी भारताने ११ सामने जिंकले आहेत, तर झिम्बाब्वेला केवळ ३ सामन्यांत विजय मिळवता आला आहे.
- लाइव्ह स्ट्रीमिंग: भारतात या मालिकेचे लाईव्ह स्ट्रीमिंग फॅनकोड ॲपवर उपलब्ध असेल.
- टीव्ही ब्रॉडकास्ट: युनायटेड ८ स्पोर्ट्स वाहिनीवर आणि डीडी फ्री डिशद्वारे डीडी स्पोर्ट्सवर सामने थेट पाहता येतील.
मालिकेचे संपूर्ण वेळापत्रक (भारतीय वेळेनुसार):
- १ ला टी२० सामना: २३ जुलै (गुरुवार) – हरारे, दुपारी ४:३० वाजता
- २ रा टी२० सामना: २५ जुलै (शनिवार) – हरारे, दुपारी ४:३० वाजता
- ३ रा टी२० सामना: २६ जुलै (रविवार) – हरारे, दुपारी ४:३० वाजता
दोन्ही संघ खालीलप्रमाणे आहेत:
झिम्बाब्वे संघ: सिकंदर रझा (कर्णधार), ब्रायन बेनेट, रायन बर्ल, तनाका चिवंगा, बेन कुरन, ब्रॅड इव्हान्स, वेस्ली मधेवेरे, तादिवानाशे मरुमानी, वेलिंग्टन मसाकाद्झा, ब्लेसिंग मुझाराबानी, डिऑन मायर्स, रिचर्ड नगारवा, न्यूमन न्यामहूरी, मिल्टन शुम्बा, तफाद्झ्वा त्सिगा.
भारतीय संघ: श्रेयस अय्यर (कर्णधार), तिलक वर्मा (उपकर्णधार), वैभव सूर्यवंशी, अभिषेक शर्मा, ईशान किशन, शिवम दुबे, सुर्यांश शेडगे, रिंकू सिंग, हर्ष दुबे, रवी बिश्नोई, प्रिन्स यादव, यश ठाकूर, अशोक शर्मा, मयांक यादव, प्रभसिमरन सिंग (यष्टीरक्षक).
