Adani Airport City: भारतातील सर्वात मोठी खाजगी विमानतळ ऑपरेटर कंपनी असलेल्या अदानी एअरपोर्ट होल्डिंग्जची उपकंपनी ‘अदानी एअरपोर्ट सिटी लिमिटेड’ने देशात एक अत्यंत महत्त्वाकांक्षी प्रकल्प सुरू केला आहे. कंपनी आपल्या विमानतळ नेटवर्कच्या अवतीभवती एकात्मिक विमानतळ शहरे विकसित करणार आहे. या संकल्पनेतंर्गत विमानतळांच्या परिसरातच आधुनिक आदरातिथ्य, रिटेल खरेदी, मनोरंजनाची साधने, भव्य कॉन्व्हेंशन सेंटर आणि व्यावसायिक कार्यालये एकाच छताखाली आणली जाणार आहेत.
या संपूर्ण प्रकल्पाच्या पहिल्या टप्प्यासाठी अदानी समूह तब्बल 20000 कोटी रुपयांपेक्षा जास्त गुंतवणूक करणार आहे. या योजनेतंर्गत मुंबई, नवी मुंबई, अहमदाबाद, लखनऊ, जयपूर आणि गुवाहाटी या ६ महत्त्वाच्या शहरांमधील विमानतळ परिसरात तब्बल 22 दशलक्ष स्क्वेअर फूट क्षेत्राचा विकास केला जाणार आहे.
गुंतवणुकीचा ७०% वाटा मुंबई आणि नवी मुंबईत; पाहा जमिनीचे गणित
हा प्रकल्प देशातील ५ राज्यांमध्ये पसरलेल्या ६ विमानतळांच्या एकूण 655 एकरपेक्षा जास्त मोठ्या जमीन बँकेवर (लँड बँक) साकारला जाणार आहे. या प्रकल्पाचे सर्वात मोठे वैशिष्ट्य म्हणजे यातील सिंहाचा वाटा महाराष्ट्राला मिळाला आहे:
- मुंबईचे वर्चस्व: एकूण ६५५ एकर जमिनीपैकी तब्बल 440 एकर जमीन एकट्या मुंबई आणि नवी मुंबई विमानतळ परिसरात आहे.
- ७० टक्के निधी येथेच खर्च होणार: नियोजित २०,००० कोटी रुपयांच्या गुंतवणुकीपैकी तब्बल 70% रक्कम मुंबई महानगर प्रदेशात (एमएमआर) खर्च केली जाईल. मुंबई हे देशाचे प्रमुख आर्थिक, व्यावसायिक आणि विमान वाहतुकीचे प्रवेशद्वार असल्याने कंपनीने येथे सर्वाधिक लक्ष केंद्रित केले आहे.
सिंगापूरच्या ‘चांगी’ आणि दुबई विमानतळाच्या धर्तीवर उभारणी
हा प्रकल्प जागतिक स्तरावर यशस्वी ठरलेल्या सिंगापूरचे चांगी विमानतळ, दुबई इंटरनॅशनल, अॅमस्टरडॅमचे शिफोल आणि सोलच्या इंचेऑन विमानतळाच्या मॉडेलवरून प्रेरित आहे. अदानी एअरपोर्ट होल्डिंग्जचे संचालक जीत अदानी यांनी सांगितले की, जगातील सर्वात यशस्वी विमानतळ परिसर हे व्यापार, पर्यटन आणि शहरी विकासाचे मुख्य केंद्र बनले आहेत. भारताची विमान वाहतूक बाजारपेठ वेगाने विस्तारत असताना, विमानतळांना केवळ प्रवासापुरते मर्यादित न ठेवता गुंतवणूक आणि रोजगाराचे मोठे साधन बनवण्याची ही एक उत्तम संधी आहे.
हे प्रकल्प पादचाऱ्यांसाठी सुटसुटीत असणारे नागरिक पूरक जिल्हे म्हणून डिझाइन केले जात आहेत. येथे येणारे प्रवासी, व्यावसायिक आणि स्थानिक नागरिक हॉटेल, कार्यालये, रेस्टॉरंट्स आणि मनोरंजन केंद्रांपर्यंत अगदी सहज चालत जाऊ शकतील. तसेच हे संपूर्ण नेटवर्क मेट्रो, विमानतळ आणि शहराच्या सार्वजनिक वाहतूक व्यवस्थेशी थेट जोडलेले असेल.
आंतरराष्ट्रीय लक्झरी हॉटेल्सचे आगमन आणि पर्यावरणाची काळजी
या महाप्रकल्पाचा एक भाग म्हणून अदानी समूहाने जागतिक दर्जाच्या ‘आयएचजी हॉटेल्स अँड रिसॉर्ट्स’सोबत ५ लक्झरी आणि प्रीमियम हॉटेल्ससाठी करार केला आहे. या भागीदारीच्या माध्यमातून प्रसिद्ध ‘किम्पटन’ (Kimpton) ब्रँड पहिल्यांदाच भारतात पदार्पण करणार आहे.
हा संपूर्ण प्रकल्प स्थापत्य आणि पर्यावरणाच्या दृष्टीनेही अव्वल असणार आहे:
दिग्गज भागीदार: या प्रकल्पाच्या वास्तुकलेसाठी केपीएफ, बेनॉय आणि झनेरा स्पेस या जागतिक कंपन्या काम करत आहेत. तर प्रत्यक्ष बांधकामाची जबाबदारी एल अँड टी (L&T), टाटा प्रोजेक्ट्स आणि पीएसपी प्रोजेक्ट्स या दिग्गज कंपन्यांवर सोपवण्यात आली आहे.
गोल्ड प्री-सर्टिफिकेशन: या एअरपोर्ट सिटी प्रकल्पांना अमेरिकेच्या ग्रीन बिल्डिंग कौन्सिलकडून (USGBC) प्रतिष्ठित ‘लीड (LEED) गोल्ड’ प्री-सर्टिफिकेशन मिळाले आहे. याचा अर्थ हा प्रकल्प ऊर्जा बचत, पर्यावरणपूरक डिझाईन आणि संसाधनांचा योग्य वापर या नियमांचे काटेकोर पालन करून उभारला जात आहे.
