Cancer Treatment India: भारतात कॅन्सर या आजाराचे प्रमाण अत्यंत वेगाने वाढत आहे. अनेक रुग्णांना यासाठी रुग्णालयात जाऊन अत्यंत महागडी आणि वेदनादायी केमोथेरपी घ्यावी लागते. यामध्ये रुग्णाला तासनतास सलाईनच्या सुईद्वारे औषध दिले जाते, ज्यामुळे रुग्ण आणि त्याचे नातेवाईक दोघांनाही मोठा त्रास सहन करावा लागतो.
मात्र, आता कॅन्सरच्या रुग्णांसाठी एक अतिशय दिलासादायक बातमी समोर आली आहे. भारतात फुफ्फुसाच्या कॅन्सरवर उपचारासाठी ‘टेसिट्रिक एससी’ (Tecentriq SC) नावाचे एक नवीन औषध लाँच करण्यात आले आहे. विशेष म्हणजे, या औषधाचा डोस देण्यासाठी तासनतास थांबण्याची गरज नसून अवघ्या 7 मिनिटांत हा उपचार पूर्ण होतो.
Cancer Treatment India: काय आहे हे नवीन औषध?
स्वित्झर्लंडमधील प्रसिद्ध फार्मा कंपनी ‘रोश’ (Roche) ने हे औषध भारतीय बाजारात आणले आहे. भारतात दरवर्षी सुमारे 80,000 फुफ्फुसाच्या कॅन्सरचे रुग्ण आढळतात. यापूर्वी 2018 मध्ये या औषधाचे सलाईनद्वारे दिले जाणारे व्हर्जन भारतात उपलब्ध होते, ज्याला खूप वेळ लागायचा.
मात्र, आता लाँच झालेले ‘टेसिट्रिक एससी’ हे जगातील पहिले ‘सबक्युटेनियस’ म्हणजेच त्वचेच्या खाली दिले जाणारे इम्युनोथेरपी औषध आहे. हे औषध सलाईनमधून देण्याऐवजी थेट रुग्णाच्या त्वचेखाली म्हणजेच मांडीवर इंजेक्शनद्वारे दिले जाते. रुग्णालयातील ओपीडीमध्ये प्रशिक्षित परिचारिका अवघ्या 4 ते 8 मिनिटांत (सरासरी 7 मिनिटांत) हे इंजेक्शन देऊ शकतात. हे औषध युनायटेड किंगडममध्ये 2023 मध्ये पहिल्यांदा मंजूर झाले होते आणि आता ते 85 देशांमध्ये वापरले जात आहे.
Cancer Treatment India: किंमत आणि उपलब्धता
भारताच्या ड्रग्ज कंट्रोलर जनरलने (DCGI) या औषधाला मंजुरी दिली आहे. जर्मनीमधून आयात केल्या जाणाऱ्या या औषधाच्या एका व्हायलची (कुपी) किंमत सुमारे 3.7 लाख रुपये आहे. रुग्णांना दर तीन आठवड्यांनी हे इंजेक्शन घ्यावे लागते आणि साधारणपणे याचे 6 सायकल पूर्ण करावे लागतात. केंद्र सरकारच्या आरोग्य योजनेचे (CGHS) कार्ड धारक असलेल्या रुग्णांनाही या औषधाचा लाभ घेता येऊ शकतो.
Cancer Treatment India: हे औषध शरीरात कसे काम करते?
आपल्या शरीरातील रोगप्रतिकारक शक्ती कॅन्सरच्या पेशींवर हल्ला करू नये म्हणून कॅन्सरच्या पेशी शरीरात एक विशिष्ट कवच (PD-L1 रिसेप्टर्स) तयार करतात. हे औषध कॅन्सर पेशींचे ते कवच नष्ट करण्याचे काम करते. यामुळे शरीरातील नैसर्गिक रोगप्रतिकारक शक्ती सक्रिय होते आणि ती स्वतःच कॅन्सरच्या पेशींचा खात्मा करू लागते.
Cancer Treatment India: रुग्ण आणि डॉक्टरांना काय फायदा?
- वेळेची 80% बचत: सलाईन लावण्यासाठी लागणारी पूर्वतयारी आणि बेड किंवा खुर्चीसाठी करावी लागणारी प्रतीक्षा आता पूर्णपणे संपणार आहे.
- रुग्णालयांची क्षमता वाढणार: जितक्या वेळात एका रुग्णाला सलाईनद्वारे जुने औषध दिले जायचे, तेवढ्याच वेळात रुग्णालय आता किमान 5 रुग्णांवर उपचार करू शकतील.
- कमी मानसिक ताण: अभ्यासानुसार, 5 पैकी 4 रुग्णांनी सलाईनपेक्षा या इंजेक्शनच्या पद्धतीला पसंती दिली आहे. यामुळे रुग्णांना कमी वेदना आणि कमी मानसिक त्रास होतो.
काही संभाव्य दुष्परिणाम
हे औषध अत्यंत प्रभावी असले तरी कंपनीच्या माहितीनुसार याचे काही दुष्परिणाम देखील होऊ शकतात. यामध्ये फुफ्फुस, आतडे, लिव्हर, हार्मोन्सच्या ग्रंथी, किडनी आणि त्वचेच्या समस्यांचा समावेश असू शकतो. तसेच ज्या रुग्णांचे बोन मॅरो ट्रान्सप्लांट झाले आहे, त्यांना काही अतिरिक्त गुंतागुंत होऊ शकते.
हे देखील वाचा – CJI Surya Kant: “काही तरुण झुरळांसारखे…”; सरन्यायाधीश सूर्यकांत यांच्या ‘त्या’ वक्तव्यावर अखेर मोठे स्पष्टीकरण!
