France Plane Crash: फ्रान्समधून एक अत्यंत हृदयद्रावक आणि धक्कादायक बातमी समोर आली आहे. देशाच्या ईशान्य भागातील नॅन्सी जवळील टॉमब्लेन येथे स्कायडायव्हर्सना घेऊन जाणाऱ्या एका विमानाला भीषण अपघात झाला आहे. हा विमान अपघात इतका भयानक होता की, विमानातील सर्वच्या सर्व 11 जणांचा जागीच मृत्यू झाला. मृतांमध्ये १ पायलट, ५ प्रशिक्षित मार्गदर्शक (इंस्ट्रक्टर्स) आणि ५ विद्यार्थ्यांचा समावेश असल्याची माहिती स्थानिक प्रशासनाने दिली आहे.
स्थानिक आरोग्य संघटनेने दिलेल्या माहितीनुसार, मृत पावलेले सर्व विद्यार्थी हे नॅन्सी शहरातील खाजगी क्षेत्रातील परिचारक होते. आपल्या आयुष्यातील पहिल्या वहिल्या स्कायडायव्हिंगचा थरारक अनुभव घेण्यासाठी हे सर्व जण एकत्र आले होते. मात्र, दुर्दैवाने हा त्यांचा पहिलाच अनुभव शेवटचा ठरला.
डोळ्यांसमोर कोसळले विमान; नातेवाईकांवर दुःखाचा डोंगर
हा अपघात रविवारी सकाळी 11 च्या सुमारास घडला. या दुर्घटनेचे सर्वात मोठे दुःखद वैशिष्ट्य म्हणजे, स्कायडायव्हिंग पाहण्यासाठी मृतांचे अनेक नातेवाईक मैदानावर उपस्थित होते. आपल्या माणसांना हवेत झेप घेताना पाहण्यासाठी जमलेल्या या नातेवाईकांच्या डोळ्यांसमोरच हे विमान उभ्या रेषेत जमिनीवर कोसळले. या भयानक दृश्यामुळे हादरलेल्या कुटुंबांना मानसिक आधार देण्यासाठी प्रशासनाने तात्काळ वैद्यकीय आणि समुपदेशन पथके तैनात केली आहेत.
- प्रत्यक्षदर्शीने काय पाहिले?: अपघाताच्या वेळी रस्त्यावरून जाणाऱ्या एका कार चालकाने सांगितले की, तो मॉलमध्ये खरेदीसाठी जात असताना अचानक एक विमान वेगाने थेट जमिनीच्या दिशेने झेपावले आणि रस्त्याशेजारील एका गवताळ भागात कोसळले.
- विमानाचे मॉडेल: दुर्घटनाग्रस्त झालेले विमान ‘पिलेट्स’ (Pilatus) कंपनीचे असून ते जर्मनीमध्ये नोंदणीकृत होते. पॅराशूट उड्डाणे आणि स्कायडायव्हिंगसाठी या प्रकारच्या विमानांचा जगभरात मोठ्या प्रमाणावर वापर केला जातो.
दिवसातील तिसरे उड्डाण; अपघाताचे कारण अस्पष्ट
राष्ट्रीय पॅराशुटीस्ट युनियनने दिलेल्या माहितीनुसार, या विमानाने रविवारी घेतलेले हे दिवसातील तिसरे उड्डाण होते. हे विमान चालवण्यासाठी अत्यंत तांत्रिक कौशल्याची गरज असते आणि दर २ वर्षांनी त्याची सखोल तपासणी करणे बंधनकारक असते.
स्थानिक प्रशासक प्रिफेक्ट इव्हस सेगुय यांनी स्पष्ट केले की, विमानाने आपत्कालीन लँडिंगचा कोणताही प्रयत्न केला नाही, ते थेट उभ्या रेषेत खाली आले. विमान निवासी वस्तीच्या अगदी जवळ कोसळले असले, तरी सुदैवाने जमिनीवरील कोणतीही व्यक्ती यात जखमी झालेली नाही. मात्र, या अपघातामुळे टॉमब्लेन आणि परिसरातील वीज पुरवठा पूर्णपणे खंडित झाला आहे.
परिसर रिकामा करण्याचे आवाहन; उच्चस्तरीय चौकशी सुरू
फ्रान्सचे परिवहन मंत्री फिलिप टॅबारोट यांनी या घटनेचे वर्णन ‘भयंकर शोकांतिका’ असे केले असून मृतांच्या परिवाराबद्दल तीव्र संवेदना व्यक्त केल्या आहेत. ते लवकरच गृहमंत्री लॉरेंट नुनेझ यांच्यासह घटनास्थळाला भेट देणार आहेत.
पोलिसांनी खबरदारीचा उपाय म्हणून नागरिकांना साल्व्हाडोर अलेंडे रस्त्याकडे न जाण्याचे आणि अपघात क्षेत्रापासून दूर राहण्याचे आवाहन केले आहे, जेणेकरून रुग्णवाहिका आणि इतर आपत्कालीन वाहनांना अडथळा निर्माण होणार नाही. उप सरकारी वकील अमौरी लॅकोटे यांनी या संपूर्ण प्रकरणाच्या फॉरेन्सिक आणि हवाई वाहतूक विभागामार्फत उच्चस्तरीय चौकशीचे आदेश दिले आहेत.
