Crime News: गुजरातच्या मेहसाणा जिल्ह्यातील वडनगर तालुक्यातून एक सुन्न करणारी घटना समोर आली आहे. शहापूर गावात एका घराच्या अंगणात ३ फूट खोल खड्ड्यातून एका महिलेचा आणि तिच्या २ वर्षांच्या मुलीचा सांगाडा पोलिसांना सापडला आहे. या मायलेकींची हत्या महिलेच्या पतीने केल्याचे प्राथमिक तपासात निष्पन्न झाले आहे.
आत्महत्येपूर्वी चिठ्ठीत दिली कबुली
या प्रकरणाचा खुलासा तेव्हा झाला जेव्हा ४ मे रोजी आरोपी गिरीश बाबू परमार याने स्वतः आत्महत्या केली. गिरीशने वडनगर येथील सिव्हिल हॉस्पिटलच्या चौथ्या मजल्यावरून उडी मारून आपले जीवन संपवले. त्याच्या खिशात पोलिसांना एक सुसाईड नोट सापडली, ज्यामध्ये त्याने आपल्या पत्नीची (प्रियांका, २९ वर्षे) आणि मुलीची (परी, २ वर्षे) हत्या केल्याची कबुली दिली होती.
“मी आणि माझी पत्नी मानसिक आरोग्याच्या समस्यांनी त्रस्त होतो, त्यामुळे मी हे टोकाचे पाऊल उचलले,” असे त्याने चिठ्ठीत नमूद केले होते.
घराच्या अंगणात सापडले सांगाडे
सुसाईड नोटमधील माहितीनुसार, पोलिसांनी शहापूर येथील गिरीशच्या घरी जाऊन शोध घेतला. अंगणातील एका खोलीबाहेर फरशा नसलेल्या जागी सिमेंटचे प्लॅस्टर दिसले. कार्यकारी दंडाधिकाऱ्यांच्या उपस्थितीत तिथे खोदकाम केले असता, ३ फूट खोलीवर प्रियांका आणि परी यांचे कुजलेले मृतदेह सापडले. ७ महिन्यांपूर्वी १८ सप्टेंबर २०२५ रोजी या मायलेकी बेपत्ता झाल्या होत्या.
आजोबांचा ७ महिने शोध सुरूच होता
प्रियांकाचे संगोपन करणाऱ्या तिच्या आजोबांनी (रमण योगी) गेल्या ७ महिन्यांपासून त्यांची खूप शोधाशोध केली होती. गिरीश दरवेळी उडवाउडवीची उत्तरे द्यायचा. अखेर कंटाळून आजोबांनी १८ एप्रिल रोजी पोलीस ठाण्यात बेपत्ता झाल्याची तक्रार नोंदवली होती. पोलिसांनी गिरीशला चौकशीसाठी बोलावले होते, मात्र पोलिसांच्या भीतीने जबाब देण्यापूर्वीच त्याने आत्महत्या केली.
एक मूल सुदैवाने वाचले
या कुटुंबात दोन जुळी मुले होती. त्यापैकी परी ही आपल्या आई-वडिलांसोबत राहत होती, तर तिचे जुळे भावंड एका नातेवाईकाकडे राहत असल्याने या भीषण घटनेतून वाचले आहे. पोलिसांनी आता या दोघांचे सांगाडे शवविच्छेदनासाठी पाठवले असून त्यांची ओळख पटवण्यासाठी डीएनए चाचणी केली जाणार आहे. या गुन्ह्यात गिरीशला कोणी मदत केली होती का, याचा तपास आता पोलीस करत आहेत.
हे देखील वाचा –
West Bengal CM Race: बंगालमध्ये भाजपचा ऐतिहासिक विजय! आता मुख्यमंत्री कोण? ‘या’ नावांची जोरदार चर्चा
