CJP Protest: देशाच्या राजधानीत म्हणजेच नवी दिल्लीत एक मोठी राजकीय आणि सामाजिक घडामोडी पाहायला मिळाली. सोशल मीडियाच्या माध्यमातून कोट्यवधी तरुणांना आपल्याकडे आकर्षित करणाऱ्या ‘कॉकरोच जनता पार्टी’ने (CJP) पहिल्यांदाच रस्त्यावर उतरून थेट शक्तीप्रदर्शन केले. दिल्लीतील जंतरमंतरवर हजारोंच्या संख्येने तरुण एकत्र आले होते आणि त्यांनी सरकारविरोधात जोरदार घोषणाबाजी केली.
या आंदोलनाचे नेतृत्व करण्यासाठी पक्षाचे मुख्य नेते अभिजीत दीपके हे थेट अमेरिकेतून दिल्लीत दाखल झाले. त्यांनी विमानतळावरून बाहेर पडतानाच हातात डॉ. बाबासाहेब आंबेडकरांचे आत्मचरित्र घेतले होते, जिथे त्यांच्या स्वागतासाठी तरुणांची मोठी गर्दी जमली होती. नीट (NEET) आणि इतर शैक्षणिक गोंधळाचा निषेध करत त्यांनी केंद्रीय शिक्षणमंत्र्यांच्या राजीनाम्याची मागणी लावून धरली आहे.
मुख्यमंत्री देवेंद्र फडणवीस यांची आंदोलनावर कडक टीका
दिल्लीतील या आंदोलनाचे पडसाद आता महाराष्ट्रातही उमटू लागले आहेत. राज्याचे मुख्यमंत्री देवेंद्र फडणवीस यांनी या आंदोलनाचा तीव्र शब्दांत निषेध केला आहे:
- अराजकता पसरवण्याचा प्रयत्न: मुख्यमंत्री म्हणाले की, “जंतरमंतरवर ज्या प्रकारची भाषणे आणि घोषणाबाजी झाली, त्यावरून ही देशातील तरुणांची अभिव्यक्ती नसून, समाजात अराजकता पसरवण्याची मानसिकता असल्याचे स्पष्ट होते.”
- संविधानाचा चुकीचा वापर: “एकीकडे डॉ. बाबासाहेब आंबेडकरांचे संविधान हातात घ्यायचे आणि दुसरीकडे त्याच संविधानाने निर्माण केलेल्या देशातील यंत्रणा आणि व्यवस्था उखाडून टाकण्याची भाषा करायची, हा दुटप्पीपणा आहे,” असा टोला फडणवीसांनी लगावला.
- संविधानविरोधी चेहरा उघडा: संविधानाचे केवळ पुस्तक हातात घेऊन फिरल्याने कोणी संविधानप्रेमी होत नाही. त्यातील लोकशाहीची तत्त्वे नाकारणारे लोक हे बाबासाहेब आणि संविधानाचे खरे विरोधक आहेत. या आंदोलनामुळे त्यांचा अराजकतेचा खरा चेहरा देशासमोर उघडा पडला आहे, अशी टीका मुख्यमंत्र्यांनी केली.
संभाजीनगरमध्ये दीपके यांच्या घराबाहेर मोठा बंदोबस्त
एकीकडे दिल्लीमध्ये अभिजीत दीपके यांच्या आंदोलनाला तरुणांचा मोठा पाठिंबा मिळत असताना, दुसरीकडे महाराष्ट्रात राहणाऱ्या त्यांच्या कुटुंबीयांच्या सुरक्षेचा प्रश्न निर्माण झाला आहे. खबरदारीचा उपाय म्हणून छत्रपती संभाजीनगरमधील वाळूज परिसरातील दीपके यांच्या घराबाहेर पोलिसांनी मोठा बंदोबस्त तैनात केला आहे. आंदोलनाची सांगता करून अभिजीत दीपके हे आता दिल्लीहून थेट आपल्या आई-वडिलांना भेटण्यासाठी संभाजीनगरकडे रवाना झाले आहेत.
भारतीय युवक देश घडवण्यासाठी काम करेल: नितीन नबीन
या संपूर्ण प्रकरणावर भारतीय जनता पक्षाचे राष्ट्रीय अध्यक्ष नितीन नबीन यांनी देखील आपली महत्त्वाची भूमिका मांडली आहे. ते म्हणाले की, “आजचा भारतीय तरुण हा अत्यंत सकारात्मक असून तो स्वतःचे भविष्य सुरक्षित करण्यासाठी आणि राष्ट्र उभारणीसाठी काम करू इच्छितो. मात्र, काही घटकांकडून जाणीवपूर्वक तरुणाईला ‘अँटी इस्टॅब्लिशमेंट’ (शासनाविरोधी) असे नाव देण्याचा प्रयत्न केला जात आहे.”
भारताचा युवक हा केवळ नवीन शोध (इन्व्हेंट) आणि नवनिर्मितीसाठी ओळखला जावा. देशातील तरुण अत्यंत शिस्तबद्ध असून ते राष्ट्र निर्मितीसाठीच आपले योगदान देतील, असा विश्वास नबीन यांनी व्यक्त केला.
हे देखील वाचा – LPG Price Hike: सर्वसामान्यांना महागाईचा मोठा झटका! घरगुती गॅस सिलिंडरच्या किमतीत पुन्हा वाढ; पाहा नवीन दर
