Dhurandhar 2 : अभिनेता रणवीर सिंह आणि दिग्दर्शक आदित्य धर यांची मुख्य जोडगोळी असलेल्या ‘धुरंधर २’ (धुरंधर: द रिव्हेंज) या चित्रपटाने बॉक्स ऑफिसवर यशाचे नवनवे विक्रम प्रस्थापित केले आहेत. प्रदर्शित होऊन एक महिन्याहून अधिक काळ लोटला असूनही, या चित्रपटाचा थिएटरमधील प्रभाव तसूभरही कमी झालेला नाही. विशेष म्हणजे, पाचव्या आठवड्यात अक्षय कुमार आणि प्रियदर्शन जोडीचा ‘भूत बंगला’ हा चित्रपट प्रदर्शित झालेला असतानाही, ‘धुरंधर २’ने आपली पकड घट्ट ठेवत प्रेक्षकांना सिनेमागृहांकडे खेचून आणले आहे.
३५ व्या दिवशीही कोट्यवधींची कमाई
सॅकनिल्कच्या ताज्या आकडेवारीनुसार, प्रदर्शनाच्या ३५ व्या दिवशी म्हणजेच पाचव्या बुधवारी ‘धुरंधर २’ने भारतात १.७० कोटी रुपयांची निव्वळ कमाई केली आहे. यासह, या चित्रपटाची देशांतर्गत एकूण कमाई आता ११२१.०९ कोटी रुपयांच्या ऐतिहासिक टप्प्यावर पोहोचली आहे. पाचव्या सोमवारी १.६२ कोटी आणि मंगळवारी २.१० कोटींचा गल्ला जमवल्यानंतर, बुधवारीही या चित्रपटाने आपला प्रभाव टिकवून ठेवला आहे. जरी आता कमाईचा वेग काहीसा मंदावून आकडे सिंगल डिजिटमध्ये आले असले, तरी पाचव्या आठवड्यात अशी कामगिरी करणे ही भारतीय सिनेसृष्टीतील दुर्मिळ घटना मानली जात आहे.
यशाची गणिते आणि ‘पुष्पा २’शी तुलना
१९ मार्च रोजी प्रदर्शित झालेल्या या स्पाय-ॲक्शन थ्रिलरने पहिल्याच आठवड्यात ६७४.१७ कोटींची विक्रमी कमाई करून सर्वांचे लक्ष वेधले होते. दुसऱ्या आठवड्यात २६३.६५ कोटी, तिसऱ्या आठवड्यात ११०.६० कोटी आणि चौथ्या आठवड्यात ५४.७० कोटींचा व्यवसाय करत या चित्रपटाने ‘ब्लॉकबस्टर’ची मोहोर उमटवली. आता ‘धुरंधर २’च्या नजरा अल्लू अर्जुनच्या ‘पुष्पा २’च्या १२६५.९७ कोटींच्या विक्रमावर लागल्या आहेत. भारतीय सिनेसृष्टीतील सर्वाधिक कमाई करणाऱ्या चित्रपटांच्या यादीत अव्वल स्थान गाठण्यासाठी रणवीरच्या या सिनेमाला अजून १०० कोटींहून अधिक रकमेची गरज आहे.
कथानक आणि संगीताची जादू-
‘धुरंधर २’च्या या यशामागे केवळ स्टार पॉवर नसून, आदित्य धर यांचे कसदार दिग्दर्शन, खिळवून ठेवणारी पटकथा आणि कर्णमधुर संगीत यांचा मोठा वाटा आहे. समीक्षकांनी या चित्रपटातील रणवीर सिंहच्या अभिनयाचे तोंडभरून कौतुक केले आहे. ‘भूत बंगला’सारख्या मोठ्या बजेटच्या चित्रपटाकडून मिळणारी कडवी स्पर्धा असूनही, ‘धुरंधर २’ने दिलेली ही झुंज बॉलिवूडच्या इतिहासात सुवर्ण अक्षरांनी लिहिली जाईल.
