Vidhan Parishad Election 2026 : राज्य विधान परिषदेच्या रिक्त जागांसाठी आज अत्यंत चुरशीच्या आणि शांततापूर्ण वातावरणात मतदान प्रक्रिया पार पडली. लोकशाहीच्या या उत्सवात मतदारांनी अत्यंत उत्साहाने भाग घेतल्याचे पाहायला मिळाले. संपूर्ण राज्याचा विचार केला, तर सर्वच मतदारसंघांमध्ये सरासरी ९५ टक्क्यांपेक्षा जास्त मतदानाची नोंद झाली असून, हा आकडा लोकशाहीच्या बळकटीकरणाचा एक महत्त्वाचा संकेत मानला जात आहे. अनेक संवेदनशील आणि प्रतिष्ठेच्या जागांवर मतदारांनी सकाळपासूनच मतदान केंद्रांवर रांगा लावल्या होत्या.
या वेळच्या निवडणुकीचे मुख्य वैशिष्ट्य म्हणजे काही जिल्ह्यांमध्ये मतदारांनी शंभर टक्के मतदानाचा हक्क बजावून एक नवा आदर्श प्रस्थापित केला आहे. प्राप्त आकडेवारीनुसार, नाशिक आणि भंडारा या जिल्ह्यांमध्ये तब्बल १००% मतदान झाले असून, येथील सर्वच मतदारांनी प्रक्रियेत सक्रिय सहभाग नोंदवला. यापाठोपाठ इतर जिल्ह्यांमध्येही मतदानाचा टक्का अत्यंत आश्वासक राहिला. यामध्ये सोलापूर जिल्हा अव्वल स्थानी राहिला, जिथे ९९.६८% मतदानाची नोंद झाली. त्याखालोखाख बीडमध्ये ९९.४९%, तर परभणी जिल्ह्यात ९९.७८% मतदारांनी आपल्या मतदानाचा हक्क बजावला. मराठवाड्यातील अत्यंत महत्त्वाच्या मानल्या जाणाऱ्या जालना जिल्ह्यातही ९८.९०% इतके विक्रमी मतदान झाले.
विदर्भाचा विचार केल्यास, नागपूर जिल्ह्यात ९८.४४% मतदारांनी आपल्या लोकशाही कर्तव्याचे पालन केले, तर अमरावती जिल्ह्यात हेच प्रमाण ९४.६८% इतके नोंदवले गेले. सर्वच जिल्ह्यांमधील ही आकडेवारी पाहता, लोकप्रतिनिधी निवडण्यासाठी मतदारांमध्ये कमालीची जागरूकता आणि उत्सुकता असल्याचे स्पष्ट होत आहे. संपूर्ण मतदान प्रक्रिया अत्यंत पारदर्शक आणि कडक बंदोबस्तात पार पडली असून, कुठेही अनुचित प्रकार घडल्याचे वृत्त नाही.
