Maharashtra Farmer Loan Waiver: महाराष्ट्रातील लाखो शेतकऱ्यांसाठी कर्जमाफीच्या संदर्भात एक अत्यंत महत्त्वाची आणि मोठी अपडेट समोर आली आहे. राज्य सरकारने यापूर्वी जाहीर केलेली 30 जूनची कर्जमाफीची अंतिम मुदत आता हुकणार असल्याचे स्पष्ट झाले आहे. राज्याचे कृषीमंत्री दत्तात्रय भरणे यांनी स्वतः विधानसभेत बोलताना याविषयीची अधिकृत माहिती दिली. तांत्रिक आणि प्रशासकीय प्रक्रियांमुळे शेतकऱ्यांना आता या कर्जमाफीचा प्रत्यक्ष लाभ 5 जुलैनंतरच मिळणार आहे.
कृषीमंत्र्यांच्या या घोषणेनंतर शेतकरी वर्गात काहीशी अस्वस्थता पसरली आहे. तर दुसरीकडे, स्वाभिमानी शेतकरी संघटनेचे संस्थापक राजू शेट्टी यांनी या मुद्द्यावरून राज्य सरकारवर जोरदार प्रहार केला असून सरकार केवळ ‘टाईमपास’ करत असल्याचा गंभीर आरोप केला आहे.
५६ लाखांहून अधिक शेतकऱ्यांना फायदा; कृषीमंत्र्यांचे स्पष्टीकरण
विधानसभेत विरोधकांच्या प्रश्नांना उत्तर देताना कृषीमंत्री दत्तात्रय भरणे यांनी सरकारची बाजू मांडली. कर्जमाफीच्या विलंबाची कारणे आणि नियोजन स्पष्ट करताना ते म्हणाले:
- अटी आणि निकषांमध्ये बदल: कर्जमाफीच्या नियमांमध्ये आणि निकषांमध्ये काही महत्त्वाचे बदल करणे गरजेचे आहे. या संदर्भात विरोधी पक्षाने मांडलेल्या चांगल्या मुद्द्यांची सरकारने नोंद घेतली असून मुख्यमंत्री यावर सकारात्मक निर्णय घेत आहेत.
- ५६ लाख शेतकऱ्यांना लाभ: प्राथमिक अंदाजानुसार, राज्यातील 56 लाख पेक्षा जास्त शेतकऱ्यांना या कर्जमाफी योजनेचा थेट फायदा मिळणार असून त्यांच्या खात्यात रक्कम वर्ग केली जाईल.
- राज्यपालांची मंजुरी आवश्यक: सध्या विधीमंडळाचे अधिवेशन सुरू असून पुरवणी मागण्यांमध्ये कर्जमाफीच्या रक्कमेवर चर्चा सुरू आहे. या योजनेला मंजुरी मिळाल्यानंतर हे विधेयक अंतिम मंजुरीसाठी राज्यपालांकडे पाठवले जाईल. राज्यपालांच्या स्वाक्षरीनंतर, म्हणजेच 5 जुलैनंतर ही रक्कम शेतकऱ्यांना दिली जाईल.
कृषीमंत्र्यांनी पुढे सांगितले की, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार या सर्वांनाच बळीराजाची चिंता आहे. आम्ही सर्व शेतकऱ्यांचीच मुले आहोत, त्यामुळे अडचणीत असलेल्या शेतकऱ्यांना कर्जमुक्त करणे हे आमचे कर्तव्य असून सरकार प्रामाणिकपणे काम करत आहे.
‘सरकारचे तारीख पे तारीख नाटक’; राजू शेट्टींचा तीव्र संताप
दुसरीकडे, शेतकरी नेते राजू शेट्टी यांनी सरकारच्या या विलंबावर तीव्र नाराजी व्यक्त केली आहे. सरकारच्या या कारभारावर टीका करताना त्यांनी खालील मुद्दे उपस्थित केले:
- अर्थसंकल्पातील तरतुदीवर प्रश्न: अर्थमंत्र्यांनी बजेटमध्ये आधीच कर्जमाफीसाठी पैशांची तरतूद केल्याचे सांगितले होते, मग आता पुन्हा मंजुरीसाठी राज्यपालांकडे जाण्याची काय गरज आहे, असा सवाल त्यांनी केला.
- पैशांचा गैरवापर केल्याचा आरोप: सरकारकडे प्रत्यक्षात पैसाच शिल्लक नाही. कर्जमाफीसाठी राखीव ठेवलेला निधी सरकारने दुसऱ्या कामांसाठी वळवला असावा, असा संशय त्यांनी व्यक्त केला.
- शेतकरी पुन्हा थकबाकीदार होणार: 30 जून ही कर्जाची मुदत संपण्याची तारीख आहे. आता ही मुदत संपल्यामुळे शेतकरी पुन्हा एकदा अधिकृतपणे थकबाकीदार ठरतील. ज्या शेतकऱ्यांना 50 हजार रुपयांचे प्रोत्साहनपर अनुदान मिळणार होते, ते देखील या विलंबाTab मुळे अडचणीत येतील, अशी भीती त्यांनी व्यक्त केली.
सरकारने आता तरी कोणत्याही जाचक अटींशिवाय आणि प्रामाणिकपणे शेतकऱ्यांची संपूर्ण कर्जमाफी कधी होणार, हे एकदाच स्पष्ट सांगावे, अशी मागणी राजू शेट्टी यांनी केली आहे.
