Manoj Jarange Patil : मराठा आरक्षणाच्या मुद्द्यावरून राज्य सरकारला धारेवर धरणारे आंदोलक मनोज जरांगे पाटील यांनी पुन्हा एकदा आक्रमक पवित्रा घेतला आहे. सरकारकडून सातत्याने होणाऱ्या दिरंगाईमुळे संताप व्यक्त करत जरांगे पाटील यांनी येत्या ३० मे पासून ‘आरपार’च्या लढाईसाठी आमरण उपोषणाची घोषणा केली आहे. नुकत्याच पार पडलेल्या पत्रकार परिषदेत त्यांनी महायुती सरकारवर अत्यंत बोचऱ्या शब्दांत टीका केली असून, यावेळचे आंदोलन अधिक तीव्र आणि निर्णायक असेल, असा इशारा दिला आहे.
मनोज जरांगे पाटील यांनी आपल्या भाषणात विदर्भ आणि मराठवाड्याच्या दुरावस्थेवर बोट ठेवले. “आम्हाला ना शेतीसाठी पाणी मिळत आहे, ना हक्काचे आरक्षण. आम्ही नेमकी काय चूक केली आहे? आम्ही महाराष्ट्राच्या सरकारवर विश्वासाने विसंबून राहिलो आणि समाजात एकजूट निर्माण करण्याचा प्रयत्न केला, परंतु हे सरकार केवळ समाजात फूट पाडण्याचे आणि ‘लावालावी’चे राजकारण करण्यात मग्न आहे,” अशा शब्दांत त्यांनी आपला उद्वेग व्यक्त केला. मराठा समाजाला केवळ आश्वासनांचे गाजर दाखवून सरकार आपली पोळी भाजून घेत असल्याचा गंभीर आरोपही त्यांनी यावेळी केला.
यावेळी जरांगे पाटील यांनी महायुतीमधील प्रमुख नेत्यांवर आणि सरकारच्या कार्यपद्धतीवर थेट हल्ला चढवला. “जे नेते खऱ्या अर्थाने गरिबांचे प्रश्न सोडवण्याचा प्रयत्न करतात, त्यांनाच हे सरकार जाणीवपूर्वक लक्ष्य करत आहे. उपमुख्यमंत्री अजित पवार आणि उपमुख्यमंत्री एकनाथ शिंदे यांच्या गटातील काही मंत्र्यांना जाणीवपूर्वक टार्गेट केले जात आहे,” असा खळबळजनक दावा त्यांनी केला. सरकारच्या अंतर्गत राजकारणामुळे जनसामान्यांचे आणि मराठा आरक्षणाचे प्रश्न प्रलंबित राहत असल्याचा आरोप त्यांनी केला.
जरांगे पाटील यांनी स्पष्ट केले की, मराठा समाजाने आतापर्यंत अत्यंत संयम दाखवला आहे, परंतु सरकारकडून मिळणारी वागणूक अत्यंत निराशाजनक आहे. “आता चर्चा आणि बैठकांचा काळ संपला असून कृतीची वेळ आली आहे,” असे देखील ते म्हणाले.
