Nashik TCS Case : नाशिकमधील नामांकित आयटी कंपनी ‘टीसीएस’ (TCS) मधील महिला कर्मचाऱ्यांचे लैंगिक शोषण आणि सक्तीने धर्मांतर करण्याच्या प्रकरणाने राज्याच्या राजकारणात मोठी खळबळ उडवून दिली आहे. या प्रकरणातील मुख्य संशयित आरोपी निदा खान हिला अखेर पोलिसांनी बेड्या ठोकल्या आहेत. गेल्या अनेक दिवसांपासून फरार असलेल्या निदा खानचा शोध नाशिक गुन्हे शाखा आणि छत्रपती संभाजीनगर पोलिसांचे संयुक्त पथक घेत होते. अखेर छत्रपती संभाजीनगरमधील नरेगाव परिसरातील कैसर कॉलनीतील एका सदनिकेतून तिला ताब्यात घेण्यात आले आहे.
प्रकरणाची पार्श्वभूमी आणि गुन्ह्याचे स्वरूप
मार्च महिन्यात उघडकीस आलेल्या या घटनेत, महिला कर्मचाऱ्यांचा मानसिक छळ करणे, त्यांचे विनयभंग करणे, धार्मिक भावना दुखावणे आणि सर्वात गंभीर म्हणजे हिंदू तरुणींना इस्लाम धर्म स्वीकारण्यासाठी सक्ती करणे, असे नऊ गुन्हे दाखल करण्यात आले आहेत. या प्रकरणाचे गांभीर्य लक्षात घेऊन राज्य सरकारने याची चौकशी विशेष तपास पथकामार्फत (SIT) सुरू केली आहे. निदा खानच्या अटकेमुळे आता या आंतरराज्यीय रॅकेटचे धागेदोरे हाती लागण्याची शक्यता वर्तवली जात आहे.
संजय शिरसाट यांचे खळबळजनक आरोप
निदा खानच्या अटकेनंतर शिवसेना (शिंदे गट) नेते आणि सामाजिक न्याय मंत्री संजय शिरसाट यांनी एमआयएम (MIM) पक्षावर आणि माजी खासदार इम्तियाज जलील यांच्यावर जोरदार हल्ला चढवला आहे. शिरसाट यांच्या मते, निदा खान हिला लपवून ठेवण्यात आणि तिला कायदेशीर संरक्षण देण्यात एमआयएमचा मोठा हात आहे.
शिरसाट यांनी उपस्थित केलेले महत्त्वाचे मुद्दे:
१. राजकीय पाठबळ: निदा खान ही गेल्या दोन महिन्यांपासून संभाजीनगरमधील अशा भागात लपली होती, जिथे गुन्हेगारी आणि अमली पदार्थांचे व्यवहार चालतात. तिला एमआयएमने सक्रिय सहकार्य केल्याचा दावा शिरसाट यांनी केला आहे.
इम्तियाज जलील यांची चौकशी: “इम्तियाज जलील यांनी निदा खानच्या समर्थनार्थ पत्रकार परिषद घेतली होती. निदा खान इतर कुठेही न जाता थेट २. संभाजीनगरलाच का आली? यावरून तिचे आणि जलील यांचे संबंध स्पष्ट होतात,” असे म्हणत त्यांनी जलील यांच्या चौकशीची मागणी केली आहे. संजय शिरसाट यांनी स्पष्ट केले की, ते लवकरच मुख्यमंत्र्यांची भेट घेऊन या प्रकरणाच्या सखोल चौकशीची मागणी करणार आहेत.
