Shirish Valsangkar Family : सोलापुरातील प्रसिद्ध व दिवंगत मेंदूरोगतज्ज्ञ डॉ. शिरीष वळसंगकर यांच्या निधनानंतर त्यांच्या कुटुंबातील अंतर्गत संपत्तीचा वाद आता अत्यंत टोकाच्या आणि गंभीर वळणावर पोहोचला आहे. डॉ. वळसंगकर यांचे जावई सुजय फडके यांच्या विरोधात कौटुंबिक नात्यातीलच एका महिलेने विनयभंगाची तक्रार दाखल केली असून, पोलिसांनी या प्रकरणी गुन्हा नोंदवला आहे. या घटनेमुळे वैद्यकीय आणि सामाजिक वर्तुळात मोठी खळबळ उडाली आहे.
मिळालेल्या माहितीनुसार, १८ एप्रिल २०२५ रोजी सोलापुरातील नामांकित न्युरोफिजिशियन डॉ. शिरीष वळसंगकर यांनी राहत्या घरी आत्महत्या केली होती. त्यांच्या या अकस्मात निधनानंतर वळसंगकर कुटुंबात संपत्तीच्या अधिकारावरून वाद उफाळून आले. डॉ. वळसंगकर यांचे जावई संशयित आरोपी सुजय फडके आणि त्यांच्या नात्यातीलच एका पीडित महिलेमध्ये गेल्या काही महिन्यांपासून मालमत्तेच्या कारणावरून तीव्र मतभेद सुरू होते. या वादाचे पर्यवसान अखेर पोलीस तक्रारीत झाले आहे.
पीडित महिलेने सोलापुरातील सदर बाजार पोलीस ठाण्यात दिलेल्या फिर्यादीनुसार, जानेवारी २०२६ ते जून २०२६ या सहा महिन्यांच्या कालावधीत सुजय फडके यांनी त्यांना मानसिक व शारीरिकदृष्ट्या प्रचंड त्रास दिला. पीडितेचा छळ करण्याच्या उद्देशाने तिला घरातून येण्या-जाण्यास मज्जाव करण्यात आला. इतकेच नव्हे तर, तिच्या गोपनीयतेचा संकोच करत तिच्या संमतीशिवाय घरात सीसीटीव्ही कॅमेरे बसवण्यात आले. तसेच घरातील वीज आणि पाणी पुरवठा खंडित करून तिला मूलभूत सुविधांपासून वंचित ठेवण्यात आले. या सर्व प्रकारांमुळे अत्यंत मानहानीकारक परिस्थिती निर्माण झाली असून, आपला विनयभंग करण्यात आल्याचे पीडितेने तक्रारीत नमूद केले आहे. यावरून सदर बाजार पोलिसांनी सुजय फडके यांच्याविरुद्ध विनयभंगाचा गुन्हा दाखल करून पुढील कायदेशीर तपासाला सुरुवात केली आहे. या गंभीर वादामुळे गेल्या १५ दिवसांपासून दोन्ही बाजूच्या व्यक्तींच्या पोलीस ठाण्यात सातत्याने फेऱ्या सुरू होत्या.
देशभरात नावलौकिक असलेले बहुआयामी व्यक्तिमत्त्व-
या संपूर्ण प्रकरणाच्या केंद्रस्थानी असलेले दिवंगत डॉ. शिरीष पद्माकर वळसंगकर (वय ६९ वर्षे) हे केवळ सोलापुरातच नव्हे, तर संपूर्ण देशात एक अग्रगण्य मेंदूरोगतज्ज्ञ म्हणून परिचित होते. त्यांनी सोलापूरच्या दयानंद कला व विज्ञान महाविद्यालयातून आपले प्राथमिक महाविद्यालयीन शिक्षण पूर्ण केले होते. त्यानंतर सोलापूरच्याच डॉ. वैशंपायन स्मृती शासकीय वैद्यकीय महाविद्यालयातून (व्ही. एम. मेडिकल कॉलेज) त्यांनी ‘एमबीबीएस’ आणि ‘एमडी’च्या पदव्या संपादित केल्या. वैद्यकीय क्षेत्रातील उच्च शिक्षणासाठी त्यांनी लंडन गाठले आणि तेथील नामांकित ‘रॉयल कॉलेज ऑफ फिजिशियन्स’मधून ‘एमआरसीपी (युके)’ ही अत्यंत प्रतिष्ठेची पदवी संपादन केली. लंडनमधील ‘मैदा वेल न्यूरोलॉजिकल हॉस्पिटल’मध्ये त्यांनी वैद्यकीय प्रशिक्षण घेतले आणि भारतात परतल्यानंतर मुंबईच्या ‘बॉम्बे हॉस्पिटल’मधून त्यांनी आपल्या रुग्णसेवेचा यशस्वी श्रीगणेशा केला.
डॉ. वळसंगकर यांनी कोल्हापूरच्या सीपीआर रुग्णालय आणि कुर्डुवाडी प्राथमिक आरोग्य केंद्रातही आपली सेवा दिली होती. त्यांनी मेंदूविकारांशी संबंधित विविध गुंतागुंतीच्या शस्त्रक्रिया आणि उपचारांवर आधारित अनेक महत्त्वपूर्ण शोधनिबंध आंतरराष्ट्रीय आणि राष्ट्रीय वैद्यकीय परिषदांमध्ये सादर केले होते. सन १९९९ मध्ये त्यांनी सोलापुरात अत्यंत अत्याधुनिक सुविधांनी सज्ज अशा ‘एस. पी. इन्स्टिट्यूट ऑफ न्यूरोसायन्सेस’ (SPM न्यूरो हॉस्पिटल) या रुग्णालयाची स्थापना केली. महाराष्ट्र, कर्नाटक आणि तेलंगणा या तीन राज्यांच्या सीमावर्ती भागातील रुग्णांसाठी हे रुग्णालय वरदान ठरले आहे.
वैद्यकीय क्षेत्रातील दैदिप्यमान कामगिरीव्यतिरिक्त डॉ. वळसंगकर हे अत्यंत हौशी आणि बहुआयामी व्यक्तिमत्त्वाचे धनी होते. त्यांना विमान उड्डाणाची प्रचंड आवड होती. संपूर्ण भारतभर पर्यटनाचा आनंद घेण्यासाठी त्यांनी स्वतःचे खाजगी विमान देखील खरेदी केले होते. या विमानाने त्यांनी देशाच्या विविध भागांत प्रवास केला होता. केवळ स्वतः विमान चालवण्याचा आनंद न घेता, त्यांनी अनेक नवशिक्या हौशी वैमानिकांना विमान उड्डाणाचे शास्त्रशुद्ध मार्गदर्शनही केले होते.
