Nilesh Rane : मालवण (Malvan) मध्ये नीलेश (Nilesh Rane) आणि नीतेश राणे (Nitesh Rane) बंधू यांच्यामधील वाद आता शेगेला पोहोचला आहे. शिवसेना (Shivsena) शिंदे गटाचे आमदार नीलेश राणे यांनी स्टिंग ऑपरेशन करून भाजपा (BJP) कार्यकर्ते विजय केनवडेकर यांच्या घरातून २५ लाख रुपये भरलेली बॅग पकडली. या प्रकरणी केनवडेकर यांची साधी चौकशीही न होता उलट पोलिसांनी बेकायदेशीर घरात घुसल्याबद्दल नीलेश राणे यांच्याच विरुद्ध गुन्हा दाखल करून त्यांना नोटीस पाठवली आहे. याबाबत आज नितेश राणे यांना पत्रकार परिषदेत विचारले असता भाजपा फक्त विकास कामांबद्दल बोलेल असे म्हणत त्यांनी थेट उत्तर द्यायचे टाळले. केसरकर यांच्याबाबतच्या प्रश्नांना मात्र त्यांनी सविस्तर उत्तरे दिली.
भाजपा कार्यकर्ते विजय केनवडेकर यांनी निलेश राणे हे बेकायदेशीरपणे आपल्या घरात घुसल्याची तक्रार मालवण पोलीस स्टेशनमध्ये दिली. त्यानुसार आज निलेश राणेंवर गुन्हा दाखल करण्यात आला. मालवण पोलीस स्थानकात 189(1), 189(2), 329(4), 356(2) नुसार गुन्हा दाखल झाला आहे. आमदार निलेश राणे यांच्यासह चौघांवर गुन्हा दाखल करण्यात आला आहे. १८९ (१) बेकायदेशीर जमाव, १८९ (२) सार्वजनिक शांतता भंग करणे, ३२९(४) चोरीच्या उद्देशाने घरात प्रवेश, ३५६ (२) मानहानी केल्याबद्दल गुन्हा दाखल करण्यात आला आहे.
या बाबत माहिती देतांना नीलेश राणे म्हणाले की, हे मला अपेक्षित होते. ज्यांच्या घरी पैसे सापडले त्यांना साधी नोटीसही नाही. त्यांना चौकशीसाठी बोलावले नाही. मी गुन्हा पकडून दिला , मात्र ते मोकाट आहेत. ज्याने या धाडीवेळी चित्रिकरण केले त्याच्या विरुद्धही गुन्हा दाखल केला आहे. त्यांना मी सोडणार नाही. पोलिसांनी केवळ नोटीस देऊन पुढे काय होईल ? अटक कधी करणार हेही सांगितले पाहिजे. रवींद्र चव्हाण यांच्या मार्गदर्शनाखाली हे सारे झाले आहे.. माझ्यावर दबाव टाकण्याचा प्रयत्न आहे. पण हा वाद आता वाढणार आहे.
आज मंत्री नितेश राणे यांनी पत्रकार परिषद घेतली. मात्र परिषदेत नितेश राणे यांच्या मागे एका व्यक्तीने भाजपाचा झेंडा हातात धरलेला होता आणि अंगावर पूर्ण भाजपाच्या झेंड्याच्या रंगाचा टी-शर्ट, चेहऱ्यावरही भगवा आणि हिरवा रंग अगदी डोक्यापासून पायापर्यंत पक्षाच्या रंगात रंगलेला. यावरून जर भाजपाचेच मंत्री पत्रकार परिषद घेत आहेत, तर अशा प्रकारे एका व्यक्तीला पार्श्वभूमीला उभे करण्याची गरज काय? असे सवाल उपस्थित होऊ लागले आहेत.
