Khawaja Asif Statement on Pakistan US Ties: पाकिस्तानचे संरक्षण मंत्री ख्वाजा आसिफ यांनी आपल्या देशाच्या परराष्ट्र धोरणाबाबत आणि अमेरिकेसोबतच्या ऐतिहासिक संबंधांबाबत अत्यंत खळबळजनक वक्तव्य केले आहे. पाकिस्तानच्या नॅशनल असेंब्लीमध्ये बोलताना त्यांनी मान्य केले की, अमेरिकेने आपल्या सामरिक हितासाठी पाकिस्तानचा वापर केला आणि काम पूर्ण झाल्यावर त्यांना ‘टॉयलेट पेपर’सारखे फेकून दिले. पाकिस्तानने भूतकाळात केलेल्या चुकांमुळेच आज देश दहशतवादाचा सामना करत असल्याचेही त्यांनी स्पष्टपणे कबूल केले.
“आम्ही आमचा इतिहास नाकारतो”
ख्वाजा आसिफ यांनी पाकिस्तानच्या दहशतवादी इतिहासावर भाष्य करताना सांगितले की, “आम्ही अनेकदा आमचा इतिहास नाकारतो आणि आमच्या चुका स्वीकारत नाही.” पाकिस्तानमधील आजचा दहशतवाद हा पूर्वीच्या लष्करी हुकूमशहांनी केलेल्या चुकांचा परिणाम आहे. १९९९ नंतर आणि विशेषतः २००१ मधील ९/११ च्या हल्ल्यानंतर अमेरिकेला साथ देणे पाकिस्तानसाठी अत्यंत विनाशकारी ठरले, असेही त्यांनी नमूद केले.
अफगाण युद्धातील सहभाग ही मोठी चूक
अफगाणिस्तानमधील युद्धांमध्ये पाकिस्तानचा सहभाग हा धर्मासाठी नसून केवळ एका महासत्तेला खूश करण्यासाठी होता, अशी स्पष्ट कबुली आसिफ यांनी दिली. ते म्हणाले की, झिया-उल-हक आणि परवेझ मुशर्रफ या दोन लष्करी हुकूमशहांनी पाकिस्तानला अफगाण युद्धात ढकलले. हे युद्ध ‘जिहाद’च्या नावाने लढले गेले असले तरी, प्रत्यक्षात तो एक दिशाभूल करणारा प्रकार होता. या युद्धांमुळे पाकिस्तानमध्ये हिंसाचार, कट्टरतावाद आणि आर्थिक संकट ओढवले गेले.
भरून न निघणारे नुकसान
संरक्षण मंत्र्यांच्या मते, पाकिस्तानच्या शिक्षण पद्धतीतही या युद्धांचे समर्थन करण्यासाठी बदल करण्यात आले, ज्याचे परिणाम आजही दिसून येतात. “या चुकांमुळे पाकिस्तानचे जे नुकसान झाले आहे, त्याची भरपाई कधीही होऊ शकत नाही,” अशा शब्दांत त्यांनी आपली खंत व्यक्त केली. अमेरिका या प्रदेशातून निघून गेली असली तरी, पाकिस्तानला मात्र अजूनही या हिंसाचाराच्या जखमा सोसाव्या लागत आहेत.
पाकिस्तानच्या एका वरिष्ठ मंत्र्याने आपल्याच देशाच्या धोरणांवर आणि लष्करी हुकूमशहांच्या निर्णयांवर अशा प्रकारे जाहीरपणे टीका केल्यामुळे जागतिक स्तरावर चर्चा रंगली आहे.
