Finn Allen Breaks Chris Gayle Record: टी-20 क्रिकेटमध्ये ‘युनिव्हर्स बॉस’ म्हणून ओळखल्या जाणाऱ्या ख्रिस गेलचा एक मोठा आणि ऐतिहासिक विक्रम आज मोडीत निघाला आहे. न्यूझीलंडच्या स्फोटक सलामीवीर फिन्न ॲलनने दक्षिण आफ्रिकेविरुद्धच्या सेमीफायनलमध्ये केवळ 33 चेंडूत शतक झळकावून ख्रिस गेलला मागे टाकले आहे.
कोलकात्याच्या ईडन गार्डन्सवर खेळल्या गेलेल्या या सामन्यात ॲलनने सुरुवातीपासूनच आक्रमक पवित्रा घेत दक्षिण आफ्रिकेचा फायनलमधील प्रवेशाचा मार्ग रोखला.
ख्रिस गेलचा 10 वर्ष जुना विक्रम उद्ध्वस्त
वेस्ट इंडिजच्या ख्रिस गेलने 2016 मध्ये इंग्लंडविरुद्ध वानखेडे स्टेडियमवर अवघ्या 47 चेंडूत शतक झळकावून टी-20 वर्ल्ड कपमधील सर्वात वेगवान शतकाचा विक्रम आपल्या नावावर केला होता. फिन्न ॲलनने तो तब्बल 14 चेंडू शिल्लक असतानाच मोडीत काढला. ॲलनच्या या खेळीमुळे ख्रिस गेल आता दुसऱ्या क्रमांकावर फेकला गेला आहे.
मैदानावर चौकार आणि षटकारांचा पाऊस
फिन्न ॲलनने आपल्या खेळीत 303.03 च्या अवाढव्य स्ट्राइक रेटने धावा कुटल्या. त्याने आपल्या शतकी खेळीत एकूण 10 चौकार आणि 8 उत्तुंग षटकार मारले. विशेष म्हणजे, संपूर्ण सामन्यात त्याने केवळ 4 चेंडू निर्धाव (Dot Balls) खेळले. त्याच्या या विध्वंसक फलंदाजीमुळे न्यूझीलंडने 170 धावांचे लक्ष्य अवघ्या 13 व्या षटकातच पूर्ण केले. ॲलनने आपल्या धावांमधील 88 टक्के धावा केवळ चौकार आणि षटकारांच्या मदतीने वसूल केल्या.
ऐतिहासिक कामगिरीनंतर ॲलनची प्रतिक्रिया
विजयानंतर बोलताना फिन्न ॲलनने आपल्या या कामगिरीचे श्रेय भारताच्या दौऱ्याला दिले. “ख्रिस गेलसारख्या महान खेळाडूचा विक्रम मोडणे ही माझ्यासाठी खूप मोठी गोष्ट आहे. मी फक्त चेंडूच्या गुणवत्तेवर प्रहार करण्याचा प्रयत्न केला आणि सायफर्टच्या साथीमुळे मला सुरुवातीलाच गती मिळाली,” असे ॲलनने नमूद केले. त्याने रचिन रवींद्रसोबत मिळून 22 चेंडूत 56 धावांची भागीदारी करत न्यूझीलंडचा विजय निश्चित केला.
हे देखील वाचा – US Iran Conflict : हिंदी महासागरात युद्धाचा भडका! अमेरिकने इराणची युद्धनौका उडवली; व्हिडिओ आला समोर
