Solapur Crime : माणुसकीला काळिमा फासणारी एक संतापजनक घटना सोलापूर शहरातील लोकमान्य नगर परिसरात घडली आहे. कौटुंबिक वादाचे पर्यावसान भीषण हिंसाचारात झाले असून, एका नराधम पतीने आपल्या पत्नीच्या अंगावर पेट्रोल ओतून तिला जिवंत जाळण्याचा प्रयत्न केला आहे. या दुर्दैवी घटनेत नर्गिस फैजान शेख (वय ३६) ही महिला गंभीररित्या भाजली असून, सध्या तिच्यावर सोलापूरच्या शासकीय रुग्णालयात उपचार सुरू आहेत.
विवाह आणि वादाची पार्श्वभूमी
नर्गिस आणि फैजान जावेद शेख यांचा विवाह ७ सप्टेंबर २०२४ रोजी मोठ्या उत्साहात संपन्न झाला होता. लग्नानंतर सुरुवातीचे दोन ते तीन महिने त्यांचा संसार सुरळीत चालला. मात्र, त्यानंतर त्यांच्या सुखी संसाराला वादाची ग्रहण लागले. पती-पत्नीमधील मतभेद इतके विकोपाला गेले की, दोघेही एकमेकांपासून विभक्त राहू लागले होते. गेल्या काही काळापासून त्यांच्यात कायदेशीररित्या ‘तलाक’ (घटस्फोट) घेण्यावरून सातत्याने खटके उडत होते, ज्याचा राग फैजानच्या मनात धुमसत होता.
घटनेचा थरार: विश्वासाचा घात-
बुधवार, १५ एप्रिल रोजी रात्री साधारण साडेनऊ ते दहाच्या सुमारास फैजान हा नर्गिसच्या माहेरी म्हणजेच लोकमान्य नगर येथे पोहोचला. यावेळी त्याने अत्यंत थंड डोक्याने कट रचला होता. त्याने आपली पत्नी आणि सासूला विश्वासात घेतले. “मला नर्गिसशी एकांतात काही महत्त्वाचे बोलायचे आहे,” असे सांगून तो तिला एका खोलीत घेऊन गेला. नर्गिसला वाटले की कदाचित तो तडजोड करायला आला असावा, मात्र फैजानच्या मनात क्रूर विचार घोळत होते.
दोघांमध्ये चर्चा सुरू असताना पुन्हा एकदा वादाची ठिणगी पडली. याच रागाच्या भरात फैजानने सोबत लपवून आणलेली पेट्रोलची बाटली काढली आणि नर्गिसच्या अंगावर ओतून तिला लायटरने पेटवून दिले. आगीच्या ज्वाळांनी वेढलेली नर्गिस वेदनेने विव्हळत घराबाहेर धावत आली. तिचा आक्रोश ऐकून परिसरातील नागरिक आणि नातेवाईकांनी धाव घेत आग विझवण्याचा प्रयत्न केला, मात्र तोपर्यंत ती गंभीर जखमी झाली होती. संधी साधून आरोपी फैजानने घटनास्थळावरून पोबारा केला.
पोलीस कारवाई आणि सद्यस्थिती
घटनेची माहिती मिळताच सोलापूर पोलिसांनी तातडीने घटनास्थळी धाव घेऊन पंचनामा केला. पीडित महिलेची प्रकृती चिंताजनक असल्याने तिला तातडीने वैद्यकीय मदत पुरवण्यात आली आहे. पोलिसांनी याप्रकरणी फैजान जावेद शेख विरोधात खुनाचा प्रयत्न केल्याचा गुन्हा दाखल करण्याची प्रक्रिया सुरू केली असून, फरार आरोपीच्या अटकेसाठी पथके रवाना करण्यात आली आहेत.
भरवस्तीत घडलेल्या या अघोरी कृत्यामुळे सोलापूर शहरात तीव्र संताप व्यक्त होत असून, महिलांच्या सुरक्षेचा प्रश्न पुन्हा एकदा ऐरणीवर आला आहे.
