Teena Choudhry Viral Video Explanation: काही दिवसांपूर्वी सोशल मीडियावर एक व्हिडिओ तुफान व्हायरल झाला होता, ज्यामध्ये एक महिला ट्रॅफिक जॅममुळे संतप्त होऊन मंत्र्यांच्या ताफ्यासमोर उभी राहून जाब विचारताना दिसत होती.
या महिलेचे नाव टीना चौधरी असून, आता त्यांनी या संपूर्ण प्रकरणावर आपली बाजू मांडली आहे. “परिस्थिती हाताबाहेर जाण्यापूर्वी सुमारे दीड तास माझ्याकडे पूर्णपणे दुर्लक्ष करण्यात आले होते,” असा दावा त्यांनी केला आहे.
Teena Choudhry Viral Video Explanation: नेमकं काय घडलं होतं त्या दिवशी?
टीना चौधरी यांनी सांगितले की, 21 एप्रिल रोजी त्या त्यांच्या मुलीला संगीत वर्गातून आणण्यासाठी गेल्या होत्या. दुपारी 4 वाजता मुलीला सोडून त्या पावणेपाच वाजता तिला घेण्यासाठी निघाल्या. मात्र, महिंद्रा ताझजवळ वळण घेताना त्या ट्रॅफिकमध्ये अडकल्या. सुमारे 25 मिनिटे गाडीत बसून राहिल्यानंतरही वाहतूक पुढे सरकत नव्हती, तेव्हा त्या नेमकी अडचण काय आहे हे पाहण्यासाठी गाडीबाहेर पडल्या.
Teena Choudhry Viral Video Explanation: “पोलिसांकडून कोणताही प्रतिसाद मिळाला नाही”
त्यांच्या म्हणण्यानुसार, रस्त्यावर दोन बस उभ्या होत्या ज्यांनी मार्ग रोखला होता. टीना यांनी तिथे उपस्थित असलेल्या अनेक पोलीस कर्मचाऱ्यांशी संपर्क साधला, मात्र दीड तास उलटूनही कोणीही त्यांचे ऐकून घेतले नाही किंवा मदत केली नाही. पोलिसांचे लक्ष वेधून घेण्यासाठीच त्यांनी जमिनीवर पाण्याची बाटली फेकली होती, असेही त्यांनी स्पष्ट केले.
Teena Choudhry Viral Video Explanation: मंत्री गिरीश महाजन यांच्याशी संवाद
व्हायरल व्हिडिओमध्ये टीना चौधरी या मंत्री गिरीश महाजन यांच्याशी बोलताना दिसत आहेत. यावर भाष्य करताना त्या म्हणाल्या की, “साडेसहा वाजले होते आणि माझी मुलगी वाट पाहत असेल या विचाराने मी अस्वस्थ होते. त्या रॅलीमध्ये गिरीश महाजन हे एकमेव व्यक्ती होते ज्यांनी माझे म्हणणे ऐकून घेण्याचा प्रयत्न केला. त्यांच्या सूचनेनंतरच त्या दोन बस बाजूला करण्यात आल्या आणि रस्ता मोकळा झाला.”
लष्करी वारसा आणि प्रशासनाला खडे बोल
आपल्या कौटुंबिक पार्श्वभूमीबद्दल बोलताना टीना यांनी सांगितले की, त्यांच्या कुटुंबातील 8 सदस्यांनी भारतीय सैन्यात सेवा बजावली आहे. त्यांचे वडील दोन युद्धे लढले आहेत. “जेव्हा तुम्ही गणवेश परिधान करता, तेव्हा तुम्ही जनसेवेसाठी असता. याचा अर्थ असा नाही की तुम्ही सर्वसामान्यांशी अनादराने वागावे किंवा त्यांना घाबरवावे,” अशा कडक शब्दांत त्यांनी प्रशासनाला सुनावले.
राजकीय वळण न देण्याचे आवाहन
हा व्हिडिओ व्हायरल झाल्यानंतर अनेकांनी याला राजकीय वळण देण्याचा प्रयत्न केला. यावर टीना यांनी स्पष्ट केले की, “कृपया माझ्या खांद्यावर बंदूक ठेवून कोणावरही निशाणा साधू नका. सर्वच राजकीय पक्ष सामान्य जनतेच्या समस्यांकडे दुर्लक्ष करतात. मला तुमची आवाज बनण्याची गरज नाही, तुमचा स्वतःचा आवाज बुलंद करा.” सध्या आपण सुरक्षित असून लोकांनी दाखवलेल्या प्रेमाबद्दल त्यांनी आभार मानले आहेत.
हे देखील वाचा – Pune Rape Case News : पुण्यातील नसरापूर प्रकरणाची राष्ट्रीय महिला आयोगाकडून स्वेच्छा दखल; खटला फास्ट ट्रॅक कोर्टात चालवण्याचे निर्देश
