Oggy vs Cockroach Janata Party: इंटरनेटवरील उपरोधिक आणि मजेशीर ट्रेड्सना भारतीय युजर्स नेहमीच पसंती देतात. काही दिवसांपूर्वी तुफान व्हायरल झालेल्या ‘कॉकरोच जनता पार्टी’ या पेजला टक्कर देण्यासाठी आता सोशल मीडियावर ‘ऑगी जनता पार्टी’ नावाचा एक नवा गट सक्रिय झाला आहे.
आपल्या बालपणीच्या आठवणींना उजाळा देणाऱ्या ‘ऑगी अँड द कॉक्रोचेस’ या प्रसिद्ध कार्टून शोवरून प्रेरित होऊन या नव्या पक्षाची स्थापना करण्यात आली आहे. हा नवा गट सध्या पहिल्या कॉकरोच पक्षाच्या धोरणांवर आणि हेतूंवर जाहीरपणे प्रश्नचिन्ह उपस्थित करत आहे. सोशल मीडियावरील या दोन्ही आभासी पक्षांमधील वाद सध्या नेटिझन्सचे भरपूर मनोरंजन करत आहे.
‘ऑगी जनता पार्टी’बद्दलच्या ५ महत्त्वाच्या गोष्टी
या नव्या डिजिटल मोहिमेची सर्वत्र चर्चा सुरू असून त्याबद्दलच्या प्रमुख गोष्टी खालीलप्रमाणे आहेत:
- पक्षाचा मुख्य हेतू: ऑगी जनता पार्टीच्या अधिकृत वेबसाईटनुसार, या पक्षाचा मुख्य उद्देश “सर्व प्रकारच्या कॉकरोचचा खात्मा करणे” हा आहे. त्यांनी आपल्या संदेशात लिहिले आहे की, कोणताही कॉकरोच, कोणत्याही आकाराचा किंवा कोणत्याही प्रजातीचा असो, त्याचा अंत निश्चित आहे.
- विरोधी पक्षाच्या अजेंड्यावर प्रश्न: भारतीय स्वातंत्र्यसैनिकांचे फोटो वापरून ऑगी पक्षाने एक पोस्ट शेअर केली आहे. यामध्ये त्यांनी लिहिले आहे की, ज्या भूमीला पराक्रमी तलवारींच्या धारेने आकार दिला, तिथे आजचे तरुण स्वतःला ‘कॉकरोच’ म्हणवून घेण्यात अभिमान बाळगत आहेत. ही देशातील वाढत्या बेरोजगारीची लक्षणे आहेत.
- नीट पेपर लीक प्रकरणाचा उल्लेख: सोशल मीडियावर केवळ मनोरंजन न करता या पक्षाने गंभीर मुद्द्यांवरही भाष्य केले आहे. त्यांनी इन्स्टाग्रामवर एक पोस्ट शेअर करत ‘नीट’ परीक्षा पेपर लीक प्रकरणातील पीडित विद्यार्थ्यांना न्याय देण्याची मागणी केली आहे. त्यांच्या मास्कॉटसोबत ‘विद्यार्थ्यांना न्याय मिळालाच पाहिजे’ असा संदेश देण्यात आला आहे.
कॉकरोच पक्षाच्या संस्थापकावर राजकीय संबंधांचे आरोप
ऑगी जनता पार्टीने इन्स्टाग्रामवर एक पोस्ट शेअर करून कॉकरोच जनता पार्टीचे संस्थापक अभिजित दिपके यांच्या राजकीय संबंधांवर बोट ठेवले आहे:
- अभिजित दिपके यांनी यापूर्वी आम आदमी पार्टीसाठी सोशल मीडिया आणि निवडणूक मोहिमेचे स्वयंसेवक म्हणून काम केले आहे.
- ऑगी पक्षाने दिपके यांची 2024 मधील एक जुनी पोस्ट शेअर केली आहे, ज्यामध्ये त्यांनी दिल्लीचे माजी उपमुख्यमंत्री मनीष सिसोडिया यांचे आभार मानले होते आणि पक्षाप्रती आपली बांधिलकी व्यक्त केली होती.
- ऑगी पक्षाने आपल्या बायोमध्ये “आम्हाला कोणत्याही राजकीय पक्षाचा पाठिंबा नाही, अमेरिकेत बसून चालणाऱ्या कॉकरोच पक्षासारखे आम्ही नाही” असा टोला देखील लगावला आहे.
प्राण्यांच्या हक्कांसाठी ६ कलमी जाहीरनामा
ऑगी जनता पार्टीने आपला 6 कलमी जाहीरनामा प्रसिद्ध केला असून यामध्ये प्राण्यांच्या कल्याणावर भर देण्यात आला आहे. पांढरा कुर्ता-पायजामा घातलेल्या ऑगीच्या फोटोसह त्यांनी लिहिले आहे की, एक दयाळू भारत हाच मजबूत भारत असू शकतो.
या जाहीरनाम्यात प्रत्येक भटक्या प्राण्याला मोफत आरोग्य सेवा देणे, प्राण्यांवर होणाऱ्या क्रूरतेविरोधात कडक कायदे करणे, प्राण्यांसाठी जास्त निवारे उभारणे, दररोज अन्न पुरवण्याची मोहीम राबवणे आणि दत्तक घेण्याबाबत जनजागृती करणे अशा मागण्या मांडण्यात आल्या आहेत. या अनोख्या डिजिटल पक्षाने लाँच झाल्यापासून अवघ्या काही दिवसांतच जवळपास 9,600 फॉलोअर्सचा टप्पा गाठला आहे.
हे देखील वाचा – Petrol Diesel Price Hike: पेट्रोल-डिझेलच्या किमतीत पुन्हा मोठी वाढ! गेल्या 10 दिवसांत तिसऱ्यांदा झटका
