Monsoon 2026 : महाराष्ट्रातील बळीराजा आणि सर्वसामान्य नागरिकांसाठी मान्सूनबाबत एक अतिशय चिंताजनक बातमी समोर आली आहे. भारतीय हवामान विभागाने (IMD) यंदाच्या पावसाळ्यासाठी आपला दुसरा अधिकृत अंदाज प्रसिद्ध केला आहे. या नव्या अहवालानुसार, राज्यात यंदा पावसाचे प्रमाण सामान्यपेक्षा कमी राहण्याची शक्यता असून, उन्हाचा चटका आणि उष्णतेच्या लाटा अधिक तीव्र राहतील, असा इशारा देण्यात आला आहे.
हवामान खात्याच्या माहितीनुसार, जून ते सप्टेंबर या चार महिन्यांच्या कालावधीत देशभरात दीर्घकालीन सरासरीच्या केवळ 90 टक्के पाऊस पडू शकतो. मध्य भारत आणि दक्षिण द्वीपकल्पीय भागात मोडणाऱ्या महाराष्ट्रात या दोन्ही विभागांमध्ये अनुक्रमे 43 टक्के आणि 45 टक्के कमी पाऊस पडण्याची शक्यता वर्तवण्यात आली आहे.
Maharashtra Weather Alert: मुख्य शेती पट्टा धोक्यात येण्याची भीती
राज्यातील विदर्भ, मराठवाडा आणि पश्चिम महाराष्ट्राचा मोठा भूभाग हा देशातील कोरडवाहू शेतीचा मुख्य कणा मानला जातो. मात्र, यंदा या भागात पावसाची मोठी तूट राहण्याची भीती आहे.
- कोअर झोनला फटका: मान्सूनच्या मुख्य पट्ट्यामध्ये (कोअर झोन) कमी पाऊस पडण्याची शक्यता 43 टक्के आहे. यामुळे खरीप हंगामातील पेरण्या आणि पिकांच्या उत्पादनावर विपरित परिणाम होऊ शकतो.
- जून महिन्यात ओढ: मान्सूनचा पहिला महिना असलेल्या जूनमध्ये देशभरात सरासरीच्या 92 टक्क्यांपेक्षा कमी पावसाची शक्यता आहे. परिणामी, जून उजाडला तरी महाराष्ट्रात पावसाची प्रतीक्षा कायम राहू शकते.
Maharashtra Rain Alert: रात्रीचा उकाडा वाढणार; उष्णतेच्या लाटांचा इशारा
पावसाची दडी असतानाच जून महिन्यात नागरिकांना तीव्र उन्हाचा सामना करावा लागणार आहे. विदर्भ, मराठवाड्यासह राज्याच्या अंतर्गत भागांमध्ये कमाल तापमान सरासरीपेक्षा जास्त राहील. विशेष म्हणजे, किमान तापमानातही वाढ होणार असल्यामुळे रात्रीच्या वेळीही थंड हवेऐवजी तीव्र उकाडा जाणवणार आहे.
IMD Rain Update Marathi: ‘एल निनो’चे संकट पुन्हा घोंगावणार
हवामान शास्त्रज्ञांच्या मते, सध्या पॅसिफिक महासागरात स्थिती सामान्य असली, तरी मान्सूनच्या उत्तरार्धात म्हणजेच ऑगस्ट-सप्टेंबर दरम्यान ‘एल निनो’ परिस्थिती निर्माण होण्याची दाट शक्यता आहे. जेव्हा जेव्हा एल निनो सक्रिय होतो, तेव्हा मध्य आणि पश्चिम भारतात पावसाचे प्रमाण लक्षणीय घटते, असा जुना इतिहास आहे.
पावसाच्या या टंचाईमुळे शेती, धरणांमधील पाणीसाठा, जलविद्युत निर्मिती आणि एकूणच पर्यावरणावर मोठा ताण पडण्याची शक्यता हवामान विभागाने आपल्या अहवालात स्पष्ट केली आहे.
IMD Rain Update Marathi: प्रशासनाला सतर्कतेचे आदेश; ५ महत्त्वाच्या सूचना
परिस्थितीचे गांभीर्य लक्षात घेऊन हवामान विभागाने राज्य सरकार आणि स्थानिक प्रशासनाला तात्काळ सज्ज राहण्याचे आवाहन केले असून खालील सूचना केल्या आहेत:
- पाणीसाठ्याचे चोख नियोजन आणि जलसंधारणाच्या उपाययोजना युद्धपातळीवर राबवाव्यात.
- शेतकऱ्यांसाठी शेतीविषयक आपत्कालीन योजना (कन्टिन्जन्सी प्लॅन) तयार ठेवाव्यात.
- उष्माघातापासून नागरिकांचा बचाव करण्यासाठी ठिकठिकाणी थंड निवारा केंद्रे सुरू करावीत.
- पिण्याच्या पाण्याची टंचाई भासणार नाही याची काळजी घ्यावी.
- उन्हाशी संबंधित आजारांचा सामना करण्यासाठी आरोग्य यंत्रणा सज्ज ठेवावी.
दरम्यान, हवामान विभागाकडून जुलै महिन्याचा सविस्तर अंदाज जूनच्या शेवटच्या आठवड्यात जाहीर केला जाईल.
हे देखील वाचा – IPL 2026 Final: किंग कोहली vs प्रिन्स गिल! RCB रचणार इतिहास की GT मारणार बाजी? कधी व कुठे पाहता येईल फायनल? वाचा
