RCB vs GT IPL 2026 Final: क्रिकेट विश्वातील सर्वात मोठी लीग म्हणजेच आयपीएल 2026 च्या विजेतेपदासाठी आज दोन तगडे संघ समोरासमोर ठाकणार आहेत. गतविजेता रॉयल चॅलेंजर्स बेंगळुरू (RCB) आणि माजी विजेता गुजरात टायटन्स (GT) यांच्यात अहमदाबादच्या नरेंद्र मोदी स्टेडियमवर हा महाअंतिम सामना खेळवला जाईल.
हा हाय-व्होल्टेज सामना भारतीय वेळेनुसार संध्याकाळी 7:30 वाजता सुरू होणार आहे. दोन्ही संघांचा चालू हंगामातील फॉर्म पाहता क्रिकेट चाहत्यांना एका अटीतटीच्या लढतीची अपेक्षा आहे.
RCB vs GT IPL 2026 Final: बेंगळुरूकडे इतिहास रचण्याची सुवर्णसंधी
रजत पाटीदारच्या नेतृत्वाखाली खेळणारा बेंगळुरूचा संघ सलग दुसऱ्यांदा आयपीएल ट्रॉफी जिंकण्यासाठी मैदानात उतरेल. पहिल्या क्वालिफायर सामन्यात बेंगळुरूने गुजरातचा 92 धावांनी दारूण पराभव करून फायनलमध्ये थेट प्रवेश केला होता. त्या सामन्यात कर्णधार रजत पाटीदारने अवघ्या 33 चेंडूत नाबाद 93 धावा ठोकल्या होत्या, ज्यामुळे आरसीबीने प्ले-ऑफच्या इतिहासातील 254/5 हा सर्वोच्च स्कोअर उभारला होता.
जर आज बेंगळुरूने विजय मिळवला, तर सलग दोनदा आयपीएल ट्रॉफी जिंकणारा तो तिसरा संघ ठरेल. यापूर्वी केवळ चेन्नई सुपर किंग्स (2010 आणि 2011) आणि मुंबई इंडियन्स (2019 आणि 2020) यांनाच अशी कामगिरी करता आली आहे.
RCB vs GT IPL 2026 Final: दोन्ही संघांचे बलस्थान आणि प्रमुख खेळाडू
या महामुकाबल्यात दोन्ही बाजूला एकापेक्षा एक मॅचविनर खेळाडू आहेत, ज्यांच्या कामगिरीवर सर्वांच्या नजरा खिळल्या असतील:
- बेंगळुरू (RCB): विराट कोहली 600 धावांसह संघाचा टॉप स्कोअरर आहे. त्याला मध्यक्रमात पाटीदार आणि देवदत्त पडिक्कलची उत्तम साथ मिळत आहे. गोलंदाजीत भुवनेश्वर कुमारने सर्वाधिक 28 बळी घेतले असून रसिक दार, क्रुणाल पंड्या आणि जोश हेझलवूड देखील फॉर्मात आहेत.
- गुजरात (GT): क्वालिफायर 1 मधील पराभवानंतर गुजरातने दुसऱ्या क्वालिफायरमध्ये राजस्थान रॉयल्सचा 7 गड्यांनी पराभव करून फायनल गाठली. कर्णधार शुभमन गिलने मागील सामन्यात शानदार शतक झळकावले होते.
ऑरेंज आणि पर्पल कॅपसाठी चुरस
या सामन्यात वैयक्तिक मानाच्या कॅपसाठी खेळाडूंमध्ये मोठी चढाओढ पाहायला मिळणार आहे:
- ऑरेंज कॅप शर्यत: शुभमन गिल (722 धावा) आणि साई सुदर्शन (710 धावा) हे दोघेही ऑरेंज कॅपच्या शर्यतीत आघाडीवर आहेत.
- पर्पल कॅप शर्यत: गुजरातचा कागिसो रबाडा 28 विकेट्ससह पहिल्या स्थानावर आहे, तर बेंगळुरूचा भुवनेश्वर कुमार 26 विकेट्ससह त्याला कडवी टक्कर देत आहे.
RCB vs GT IPL 2026 Final: हेड-टू-हेड रेकॉर्ड्स आणि इतिहास
आयपीएलच्या इतिहासात आतापर्यंत बेंगळुरू आणि गुजरात यांच्यात एकूण 9 सामने खेळले गेले आहेत. यामध्ये बेंगळुरूने 5 सामन्यात बाजी मारली आहे, तर गुजरातला 4 सामन्यात विजय मिळाला आहे.
चालू हंगामाचा विचार केला तर दोन्ही संघ 3 वेळा आमनेसामने आले आहेत, ज्यापैकी आरसीबीने 2 आणि जीटने 1 सामना जिंकला आहे. विशेष म्हणजे गुजरातने जो एकमेव सामना जिंकला तो याच अहमदाबादच्या मैदानावर झाला होता, जिथे आज फायनल खेळवली जात आहे.
RCB vs GT IPL 2026 Final: लाईव्ह सामना कुठे पाहता येणार?
भारतातील क्रिकेट चाहत्यांना या अंतिम सामन्याचा आनंद टीव्ही आणि मोबाईलवर घेता येईल. या सामन्याचे थेट प्रक्षेपण जिओहॉटस्टारवर ऑनलाईन पाहता येईल. तसेच टीव्हीवर स्टार स्पोर्ट्स 1, स्टार स्पोर्ट्स 1 हिंदी, तामिळ, तेलुगु आणि कन्नड या वाहिन्यांवर हा सामना थेट प्रक्षेपित केला जाईल.
हे देखील वाचा – Abhishek Banerjee Attacked: “शासकच बनले मारेकरी!”; पुतण्यावर झालेल्या हल्ल्यानंतर ममता बॅनर्जींचा भाजप सरकारवर हल्लाबोल
