Cyber Fraud: सायबर गुन्हेगार आता इतके हुशार आणि धीट झाले आहेत की सामान्य जनतेसोबतच देशातील बड्या नेत्यांना आणि त्यांच्या कुटुंबीयांनाही लक्ष्य करत आहेत. देशाचे माजी पंतप्रधान इंद्रकुमार गुजराल यांचे सुपुत्र आणि माजी राज्यसभा खासदार नरेश गुजराल यांच्यासोबत तब्बल 7.8 कोटी रुपयांची फसवणूक झाल्याचा धक्कादायक प्रकार समोर आला आहे.
हा संपूर्ण कट केवळ एका व्हॉट्सअॅप मेसेजच्या आधारे अत्यंत नियोजनबद्ध पद्धतीने रचण्यात आला होता. फसवणूक करणाऱ्यांनी इतक्या हुशारीने जाळे विणले की, एका अनुभवी राजकीय नेत्याच्या कंपनीतील वरिष्ठ अधिकारी आणि बँक देखील या जाळ्यात अलगद अडकले.
व्हॉट्सअॅपवर बॉसचा फोटो पाहून अधिकारी फसला; असे झाले कोटींचे व्यवहार
या अवाढव्य फसवणुकीची सुरुवात एका मोबाईल स्क्रीनवरून झाली. या गुन्ह्याची कार्यपद्धती खालीलप्रमाणे होती:
- डीपीचा गैरवापर: नरेश गुजराल यांच्या कंपनीत काम करणाऱ्या एका वरिष्ठ अधिकाऱ्याला एका अनोळखी नंबरवरून व्हॉट्सअॅपवर मेसेज आला. विशेष म्हणजे, त्या नंबरवर नरेश गुजराल यांचाच प्रोफाईल फोटो (DP) लावलेला होता. यामुळे अधिकाऱ्याला वाटले की त्याचे बॉसच त्याच्याशी बोलत आहेत.
- तातडीने निधीची मागणी: मेसेजमध्ये एका बँक खात्यात तातडीने मोठी रक्कम पाठवण्यास सांगण्यात आले. सुरुवातीला आरटीजीएसच्या माध्यमातून 1.5 कोटी रुपये ट्रान्सफर करण्याचे निर्देश दिले गेले.
- ४ दिवस वसुलीचा खेळ: अधिकाऱ्याने कोणताही संशय न घेता पैसे पाठवले. यानंतर ठगाने पुढील 4 दिवस सतत वेगवेगळ्या खात्यांमध्ये पैसे मागणे सुरूच ठेवले. एकापाठोपाठ एक असे करत एकूण 7.8 कोटी रुपये ठगाच्या खात्यात जमा झाले.
बँक अन् सीएफओ देखील चक्रावले
इतक्या मोठ्या रक्कमेचे व्यवहार एकाच वेळी होत असल्याचे पाहून बँकेला संशय आला होता. बँकेने तातडीने कंपनीच्या मुख्य वित्तीय अधिकाऱ्याशी (CFO) संपर्क साधला. मात्र, त्यांनीही हे आदेश थेट नरेश गुजराल यांच्याकडूनच आले असावेत असा अंदाज बांधून व्यवहारांना मंजुरी दिली.
या संपूर्ण प्रकरणाचा भांडाफोड 16 जून रोजी झाला. सतत पैसे पाठवण्याच्या मागणीमुळे त्रस्त झालेल्या त्या अधिकाऱ्याने शेवटी नरेश गुजराल यांची मुलगी दीक्षा यांच्याशी संपर्क साधला. “तुमचे वडील सतत पैसे ट्रान्सफर करायला सांगत आहेत,” असे अधिकाऱ्याने सांगताच दीक्षा यांना मोठा धक्का बसला.
कारण नरेश गुजराल यांनी असे कोणतेही आदेश दिलेले नव्हते. त्यानंतर कंपनीला आपण सायबर गुन्हेगारांचे शिकार झाल्याचे समजले.
बँक खाते गोठवले; ४ कोटी रुपये वाचवण्यात यश
फसवणूक झाल्याचे लक्षात येताच कुटुंबाने 16 जून रोजीच दिल्ली पोलिसांकडे ऑनलाईन तक्रार नोंदवली. या प्रकरणाचे गांभीर्य पाहून दिल्ली पोलिसांच्या विशेष सायबर पथकाने (IFSO) तातडीने तपास सुरू केला आणि ज्या बँक खात्यात पैसे गेले होते त्याचा माग काढला.
सायबर गुन्ह्यांमध्ये सामान्यतः पैसे काही मिनिटांत गायब केले जातात, मात्र या प्रकरणात पोलिसांना मोठे यश आले. चोरी झालेल्या रकमेतील तब्बल 4 कोटी रुपये पोलिसांनी ट्रॅक करून ते बँक खाते तात्काळ गोठवले आहेत. उरलेल्या रकमेचा शोध घेण्यासाठी पोलीस पथके रवाना झाली आहेत.
हे देखील वाचा – Operation Tiger Update: 6 बंडखोर खासदारांना ‘वाय प्लस’ सुरक्षा; संजय राऊतांच्या ‘ऑपरेशन तुडवा’च्या इशाऱ्यानंतर गृहमंत्रालयाचा अॅक्शन प्लॅन
